संयुक्त राष्ट्रांच्या अहवालात दावा : सध्याचे संकट काहीच नाही, पाकिस्तानात पुढच्या काही महिन्यांत अन्नाचे दुर्भिक्ष्य आणखी वाढेल|UN report claims: Current crisis is nothing, food famine in Pakistan will worsen in next few months

संयुक्त राष्ट्रांच्या अहवालात दावा : सध्याचे संकट काहीच नाही, पाकिस्तानात पुढच्या काही महिन्यांत अन्नाचे दुर्भिक्ष्य आणखी वाढेल

वृत्तसंस्था

नवी दिल्ली : पाकिस्तानमधील आर्थिक संकटासोबतच राजकीय संकटही गडद होत आहे. मात्र, त्याचा सर्वाधिक फटका देशातील गरीब आणि मध्यमवर्गाला बसला आहे. कहर म्हणजे पाकिस्तानात पिठाचे पोते आणि रेशनसाठी लोक भांडताना दिसत आहेत. त्याचबरोबर दैनंदिन गरजेच्या अनेक महत्त्वाच्या वस्तूंच्या किमती इतर देशांच्या तुलनेत अनेक पटींनी जास्त आहेत. दरम्यान, संयुक्त राष्ट्राच्या एका अहवालामुळे पाकिस्तानची चिंता वाढली आहे. पाकिस्तानचे सध्याचे अन्न संकट येत्या काही महिन्यांत गंभीर होऊ शकते, असा दावा या अहवालात करण्यात आला आहे.UN report claims: Current crisis is nothing, food famine in Pakistan will worsen in next few months

UN अहवालाचे शीर्षक ‘Hunger Hotspots: FAO-WFP Early Warning on Severe Food Insecurity’ असे आहे. या अहवालात ज्या देशांत आगामी काळात अन्नपदार्थांची तीव्र टंचाई निर्माण होण्याची शक्यता आहे अशा देशांबाबत इशारा देण्यात आला आहे. हा अहवाल अन्न आणि कृषी संघटना (FAO) आणि जागतिक अन्न कार्यक्रम (WFP) या संयुक्त राष्ट्र संघटनेने तयार केला आहे. या अहवालात विविध देशांना जून ते नोव्हेंबर या कालावधीतील परिस्थितीबाबत सतर्क राहण्यास सांगण्यात आले आहे.

पाकिस्तानातून आलेले हिंदू पुन्हा बेघर, जिल्हाधिकारी टीना दाबी यांच्या आदेशानंतर घरांवर बुलडोझर!

अहवालानुसार, आधीच जागतिक आर्थिक संकट आणि देशावरील वाढत्या कर्जामुळे पाकिस्तान आर्थिक संकटात सापडला आहे. अहवालात असे म्हटले आहे की, एप्रिल 2023 ते जून 2026 पर्यंत 77.5 अब्ज डॉलर (सुमारे 21 लाख 83 हजार कोटी पाकिस्तानी रुपये) इतके विदेशी कर्ज फेडायचे आहे. हा आकडा भयावह आहे कारण पाकिस्तानचा एकूण जीडीपी केवळ 350 अब्ज डॉलर (सुमारे 98 लाख 62 हजार कोटी पाकिस्तानी रुपये) आहे.

पाकिस्तान का आहे अडचणीत?

संयुक्त राष्ट्रांच्या अहवालात असेही म्हटले आहे की, पाकिस्तानमधील वाढती राजकीय अस्थिरता आणि सुधारणांमध्ये मागे पडल्यामुळे आंतरराष्ट्रीय नाणेनिधीने (IMF) त्यासाठी नवीन कर्ज वाटपदेखील थांबवले आहे. त्याच वेळी, त्याचे सहकारी देशही त्याला मदत करण्यास नाखुश आहेत. त्याच अहवालात असे म्हटले आहे की हे राजकीय आणि आर्थिक संकट ऑक्टोबर 2023 मध्ये होणाऱ्या निवडणुकांपर्यंत कायम राहू शकते. या काळात परकीय चलनाचा तुटवडा आणि पाकिस्तानी रुपयाच्या घसरणीमुळे खाद्यपदार्थ खरेदी करण्याची पाकिस्तानची क्षमताही कमी होईल आणि त्यांच्या किमती सतत गगनाला भिडतील. एवढेच नाही तर देशाला आपल्या ऊर्जेची गरज भागवणेही कठीण होऊन वीज कपात रोखणे अशक्य होईल.

अहवालानुसार, सप्टेंबर ते डिसेंबर 2023 दरम्यान, पाकिस्तानमधील सुमारे 8.5 दशलक्ष लोकांना गंभीर अन्न असुरक्षिततेचा सामना करावा लागणार आहे. आगामी काळात अन्नसुरक्षेसोबतच कुपोषणात होणारी गंभीर वाढ आणि पाकिस्तानची सतत ढासळणारी आर्थिक स्थिती यांचा कुटुंबांच्या क्रयशक्तीवर विपरीत परिणाम होणार आहे. त्यामुळे त्यांना जीवनावश्यक खाद्यपदार्थ व इतर महत्त्वाच्या वस्तू गोळा करणे कठीण होणार आहे.