शुभमन गिल वनडेचा नंबर 1 फलंदाज बनला; आयसीसीची क्रमवारी जाहीर, सिराज गोलंदाजीत अव्वल

By, Pravin Wankhade - November 9, 2023 01:15:18

0

वृत्तसंस्था

नवी दिल्ली : भारतीय क्रिकेटपटू शुभमन गिल आयसीसी एकदिवसीय क्रमवारीत जगातील नंबर-1 फलंदाज बनला आहे. पाकिस्तानच्या बाबर आझमला मागे टाकत त्याने ही कामगिरी केली आहे. बाबर 951 दिवस पहिल्या क्रमांकावर राहिला. आयसीसीने बुधवारी ताजी वनडे क्रमवारी जाहीर केली.Shubman Gill becomes No 1 ODI batsman; ICC rankings announced, Siraj tops in bowling

गिल 830 गुणांसह अव्वल स्थानी पोहोचला आहे. बाबर आझम 824 गुणांसह दुसऱ्या स्थानावर आहे. क्विंटन डी कॉक 771 गुणांसह तिसऱ्या स्थानावर आहे. विराट कोहली चौथ्या स्थानावर पोहोचला आहे. भारताचा मोहम्मद सिराज गोलंदाजी क्रमवारीत अव्वल स्थानी पोहोचला आहे. सिराजसह भारताचे चार गोलंदाज टॉप-10 मध्ये आपले स्थान निश्चित करण्यात यशस्वी ठरले आहेत.

पाकिस्तान विरुद्धच्या सामन्यात हुकमी एक्का परततोय; शुभमन गिल इज बॅक!!

श्रीलंकेविरुद्धच्या खेळीचा फायदा गिलला मिळाला

श्रीलंकेविरुद्ध खेळलेल्या 92 धावांच्या खेळीचा फायदा गिलला मिळाला आहे. त्याने 92 चेंडूंचा सामना केला आणि 100 च्या स्ट्राईक रेटने 92 धावा केल्या. या खेळीत त्याने 11 चौकार आणि 2 षटकार मारले.

कोहलीने तीन स्थानांनी झेप घेतली

गेल्या आठवड्यात विराट कोहली सातव्या स्थानावर होता. त्याला विश्वचषकात दक्षिण आफ्रिकेविरुद्धच्या 101 धावांच्या खेळीचा फायदा झाला आणि त्याने 770 गुणांसह तीन क्रमांकांनी झेप घेत चौथ्या स्थानावर झेप घेतली आहे.

सिराजला दोन स्थानांचा फायदा

मोहम्मद सिराजने गोलंदाजांमध्येही अव्वल स्थान पटकावले आहे. गेल्या आठवड्यात जाहीर झालेल्या क्रमवारीत पाकिस्तानचा गोलंदाज शाहीन आफ्रिदी अव्वल स्थानावर होता. सिराजने गेल्या आठवड्यातील मानांकनानंतर खेळल्या गेलेल्या सामन्यात दक्षिण आफ्रिकेविरुद्ध 1 बळी आणि श्रीलंकेविरुद्ध 3 बळी घेतले होते. सिराजला दोन स्थानांचा फायदा झाला आहे. गेल्या आठवड्यात जाहीर झालेल्या क्रमवारीत तो तिसऱ्या स्थानावर होता.

सिराजशिवाय कुलदीप यादव, जसप्रीत बुमराह आणि मोहम्मद शमी यांनी ताज्या जागतिक क्रमवारीत भारताकडून पहिल्या दहामध्ये आपले स्थान निश्चित केले आहे. कुलदीप यादवला तीन स्थानांचा फायदा झाला. तो सातव्या स्थानावरून चौथ्या स्थानावर गेला. जसप्रीत बुमराह आठव्या आणि मोहम्मद शमी दहाव्या स्थानावर आहे.

शाकिब अल हसन अष्टपैलू खेळाडूंच्या क्रमवारीत अव्वल स्थानावर कायम

बांगलादेशचा अष्टपैलू खेळाडू शकीब अल हसन 327 गुणांसह वनडे अष्टपैलू खेळाडूंच्या यादीत अव्वल स्थानावर आहे. अफगाणिस्तानचा मोहम्मद नबी 290 गुणांसह दुसऱ्या स्थानावर कायम आहे.