पश्चिम बंगालमध्ये राष्ट्रपती राजवट लागू करा, काँग्रेसची मागणी; ED अधिकाऱ्यांवर प्राणघातक हल्लानंतर पोलिसांनी नोंदवल्या 3 FIR

By, Pravin Wankhade - January 6, 2024 02:00:20

0

वृत्तसंस्था

कोलकाता : अंमलबजावणी संचालनालयाच्या (ईडी) अधिकार्‍यांवर छापेमारीदरम्यान राज्यातील सत्ताधारी तृणमूल काँग्रेसच्या एका नेत्याच्या समर्थकांनी हल्ला केल्यानंतर पश्चिम बंगालमधील राजकीय तापमान वाढले आहे. ज्या वेळी ईडीच्या टीमवर हल्ला करण्यात आला आणि त्यांना लक्ष्य करण्यात आले, त्यावेळी ईडी अधिकाऱ्यांसह सीआरपीएफचे फक्त 27 जवान होते. या हल्ल्यात तीन अधिकारी गंभीर जखमी झाले आहेत. ईडीच्या अधिकाऱ्यांनी सांगितले की, हल्ल्यादरम्यान जमावाने त्यांचा मोबाईल फोन, लॅपटॉप, रोख रक्कम आणि पाकीट हिसकावून घेतले. बंगाल पोलिसांनी याप्रकरणी तीन एफआयआर नोंदवले आहेत.Impose President’s Rule in West Bengal, Congress demands; Police registered 3 FIRs after assault on ED officials

पश्चिम बंगालमधील वर्धमान रेल्वे स्थानकावर अपघात; पाण्याची टाकी कोसळून 2 ठार, 15 जण जखमी

काँग्रेसने म्हटले- बंगालमध्ये राष्ट्रपती राजवट लागू करा

या घटनेनंतर एकीकडे विरोधकांनी राज्यात राष्ट्रपती राजवट लागू करण्याची मागणी केली असतानाच दुसरीकडे राज्यपाल सीव्ही आनंद बोस यांनीही सर्व घटनात्मक पर्यायांचा विचार करून योग्य ती कारवाई करण्याचे संकेत दिले आहेत. राज्यात राष्ट्रपती राजवट लागू करण्याची मागणी करताना काँग्रेस नेते अधीर रंजन चौधरी म्हणाले, ‘ईडीच्या अधिकाऱ्यांवर हल्ले होत आहेत. राष्ट्रपती राजवट लागू करण्यासाठी हे योग्य कारण आहे. पश्चिम बंगालमध्ये कायदा आणि सुव्यवस्थेची स्थिती बिकट आहे.

भारतीय जनता पक्षाने (भाजप) उत्तर 24 परगणा जिल्ह्यातील संदेशखळी येथील घटनेचे वर्णन थेट संघराज्य रचनेवर हल्ला असे केले आहे, तर काँग्रेसने राज्यात त्वरित राष्ट्रपती राजवट लागू करण्याची मागणी केली आहे. केंद्रीय मंत्री गिरीराज सिंह यांनी ममता बॅनर्जी यांची किम जोंगशी तुलना केली. ईडी टीमवर झालेल्या हल्ल्याबाबत पश्चिम बंगाल भाजप अध्यक्ष सुकांता मजुमदार म्हणाले की, यात रोहिंग्यांचा हात आहे. बंगालींच्या बाबतीतही असेच घडणार असल्याचे ते म्हणाले. ईडीच्या हल्ल्यावर केंद्रीय गृह राज्यमंत्री निशीथ प्रामाणिक यांनी हा राज्याच्या संघीय रचनेवर हल्ला असल्याचे म्हटले आहे.

टीएमसीने आरोप फेटाळून लावले

तथापि, सत्ताधारी टीएमसीने हे आरोप फेटाळून लावले आणि केंद्रीय एजन्सीच्या अधिकाऱ्यांनी स्थानिक लोकांना भडकावल्याचा आरोप केला. ईडीच्या अधिकार्‍यांनी तृणमूल काँग्रेसचे नेते शेख शाहजहान यांच्या निवासस्थानावर छापा टाकला आणि शाहजहानच्या समर्थकांकडून हल्ले झाले तेव्हा ही घटना घडली. समर्थकांनी अधिकारी आणि त्यांच्या वाहनांची तोडफोड केली. शाहजहान हे राज्यमंत्री ज्योतिप्रिया मल्लिक यांचे निकटवर्तीय मानले जातात. कोट्यवधी रुपयांच्या रेशन वितरण घोटाळ्याप्रकरणी ज्योतिप्रिया मल्लिक यांना अटक करण्यात आली आहे.

एका अधिकाऱ्याने सांगितले की, ईडीचे अधिकारी सकाळी संदेशखळी भागातील शेख यांच्या निवासस्थानी पोहोचले तेव्हा मोठ्या संख्येने तृणमूल काँग्रेसच्या समर्थकांनी ईडी अधिकाऱ्यांना आणि त्यांच्यासोबत असलेल्या केंद्रीय दलाला घेराव घातला. यानंतर त्यांनी निदर्शने केली आणि नंतर त्याच्यावर हल्ला केला त्यानंतर अधिकाऱ्यांना ऑटो रिक्षा आणि दुचाकीवरून जागा सोडण्यास भाग पाडले.