अर्थसंकल्पीय अधिवेशनापूर्वी सरकारने बोलावली सर्वपक्षीय बैठक!

By, Pravin Wankhade - July 18, 2024 05:00:38

0

विरोधकांसोबतचा गतिरोध संपवण्याचा प्रयत्न करणार Before the budget session the government called an all party meeting

विशेष प्रतिनिधी

नवी दिल्ली : मोदी सरकारच्या तिसऱ्या कार्यकाळातील पहिला अर्थसंकल्प २३ जुलै रोजी येणार आहे. २२ जुलैपासून अर्थसंकल्पीय अधिवेशन सुरू होणार आहे. याआधी मोदी सरकारने विरोधकांसोबतचा गतिरोध संपवण्याचा प्रयत्न केला असून २१ जुलै रोजी सर्वपक्षीय बैठक बोलावली आहे.

संसदीय कामकाज मंत्रालयाने प्रसिद्धीपत्रकाद्वारे याबाबत माहिती दिली. ज्यामध्ये असे म्हटले होते की, संसदेच्या अर्थसंकल्पीय अधिवेशनापूर्वी केंद्रीय संसदीय कामकाज मंत्री किरेन रिजिजू संसदेच्या दोन्ही सभागृहातील राजकीय पक्षांच्या नेत्यांची बैठक घेणार आहेत. २१ जुलै रोजी सकाळी ११ वाजता मुख्य समिती कक्ष, संसद भवन संलग्न येथे सर्वपक्षीय बैठक होणार आहे.

संसदेचे अर्थसंकल्पीय अधिवेशन २२ जुलैपासून सुरू होणार आहे. अर्थमंत्री निर्मला सीतारामन २३ जुलै रोजी अर्थसंकल्प सादर करणार आहेत. हे अर्थसंकल्पीय अधिवेशन १२ ऑगस्टला संपणार आहे. तत्पूर्वी मंगळवारी हलवा समारंभ पार पडला. ज्यामध्ये अर्थमंत्र्यांनी सर्व अधिकाऱ्यांना स्वतःच्या हाताने हलव्याचे वाटप केले.

हलवा सोहळा बजेट तयार करण्याच्या प्रक्रियेच्या शेवटच्या टप्प्याचे प्रतीक आहे. नॉर्थ ब्लॉकमध्ये झालेल्या या हलवा सोहळ्यात केंद्रीय अर्थमंत्री निर्मला सीतारामन यांच्याशिवाय राज्यमंत्री पंकज चौधरी यांच्यासह अनेक मंत्रालयांचे सचिव सहभागी झाले होते. यावेळी अर्थसंकल्प तयार करणे व संकलन प्रक्रियेशी संबंधित अधिकारी व कर्मचारी उपस्थित होते.