Assam gang rape :आसाम गँगरेपच्या मुख्य आरोपीचा बुडून मृत्यू; पोलीस क्राइम सीनवर नेत असताना तलावात मारली होती उडी

By, Pravin Wankhade - August 24, 2024 12:30:51

0

वृत्तसंस्था

गुवाहाटी : आसामच्या नागाव जिल्ह्यात १४ वर्षीय अल्पवयीन मुलीवर झालेल्या सामूहिक बलात्कारातील मुख्य आरोपी तफजुल इस्लामचा शनिवारी (२४ ऑगस्ट) पाण्यात बुडून मृत्यू झाला. पोलिसांच्या ताब्यातून पळून जाताना त्याने तलावात उडी मारली होती. नागावचे पोलिस अधीक्षक (एसपी) स्वप्नील डेका यांनी सांगितले की, आरोपीला शुक्रवारी (23 ऑगस्ट) अटक करण्यात आली. आज पहाटे 3:30 वाजता, त्याला क्राइम सीन रिक्रएट करण्यासाठी घटनास्थळी ठिकाणी नेले जात होते.

एसपींच्या म्हणण्यानुसार, त्याने पळून जाण्याचा प्रयत्न केला आणि तलावात उडी मारली. पोलिसांनी तातडीने शोधमोहीम सुरू केली. एसडीआरएफची टीमही घटनास्थळी पोहोचली. सुमारे दोन तासांच्या शोधानंतर आरोपीचा मृतदेह तलावातून बाहेर काढण्यात आला.

ट्यूशनवरून परतणाऱ्या मुलीवर तिघांनी बलात्कार केला

नागावच्या धिंग येथे गुरुवारी (२२ ऑगस्ट) सायंकाळी 14 वर्षीय मुलीवर तीन जणांनी बलात्कार केला. पीडित मुलगी ट्यूशनवरून सायकलवरून घरी परतत होती. दरम्यान, मोटारसायकलवरून आलेल्या तिघांनी तिला घेरले आणि गैरवर्तन केले. बलात्कारानंतर आरोपी पीडितेला जखमी आणि बेशुद्धावस्थेत रस्त्याच्या कडेला तलावाजवळ सोडून पळून गेला. स्थानिक लोकांनी तिला पाहून रुग्णालयात दाखल केले. पोलिसांनाही कळवण्यात आले.

Ramdas Athawale : ‘बदलापूरची घटना मानवतेसाठी लज्जास्पद असून आरोपींना…’ ; रामदास आठवले

तिसरा आरोपी अद्याप फरार

पोलिसांनी आतापर्यंत दोन आरोपींना अटक केली असून त्यापैकी एकाचा मृत्यू झाला आहे. तिसऱ्याचा शोध सुरू आहे. या घटनेनंतर संपूर्ण आसाममध्ये निदर्शने होत आहेत. अनेक संघटनांनी शुक्रवारी (23 ऑगस्ट) धिंगमध्ये एक दिवसीय बंदची हाक दिली.

पोलीस डीजीपी जीपी सिंग धिंग येथे पोहोचल्याने परिसरातील तणाव आणखी वाढला. दोषींना अटक करण्याची मागणी करत लोक रस्त्यावर उतरले. दुकानदारांनी आपली दुकाने बंद केली. सामाजिक संस्था आणि राजकीय पक्षांनी दोषींवर कठोर कारवाई आणि महिला आणि मुलींच्या सुरक्षेची मागणी केली.