हरित सिंहस्थ कुंभमेळ्यासाठी रामतीर्थ गोदावरी सेवा समितीचे उपक्रम; स्टीलची 30 लाख ताटे, ग्लास वाटपासह गोदावरी महात्म्याचे दस्तावेजीकरण

By, Pravin Wankhade - June 30, 2025 07:00:06

0

विशेष प्रतिनिधी

नाशिक : २०२६ – २७ मध्ये होणारा नाशिक आणि त्रंबकेश्वरचा सिंहस्थ कुंभमेळा यशस्वी करण्यासाठी शासकीय स्तरावरून होणाऱ्या प्रयत्नांच्या पार्श्वभूमीवर रामतीर्थ गोदावरी सेवा समितीने विविध उपक्रम सुरू करायचे ठरविले असून सिंहस्थ कुंभमेळा पर्यावरण पूरक आणि हरित व्हावा यासाठी सेवा समितीने पुढाकार घेतला आहे. सिंहस्थ कुंभमेळ्याच्या निमित्ताने एक पर्यावरण पूरक काम करणारी एक जन चळवळ उभी करण्याचा मानस असून त्यामध्ये समाजातल्या सर्व स्तरांमध्ये युवक, युवती, स्वयंसेवक सांस्कृतिक दूत, डिजिटल प्रचारक, महिला स्वयंसहाय्यता गट, बचत गट, निवृत्त अधिकारी यांचा समावेश करण्याचा सेवा समितीचा प्रयत्न आहे.

या संदर्भातली सविस्तर माहिती रामतीर्थ गोदावरी सेवा समितीने आज पत्रकार परिषदेत दिली. समितीचे अध्यक्ष जयंत गायधनी, विश्वस्त धनंजय बेळे, नरसिंह कृपादास, आर्किटेक शैलेश देवी, इस्कॉन मंदिराचे कृष्णधन प्रभू आदींनी पत्रकार परिषदेला संबोधित केले.

त्याचबरोबर सिंहस्थ कुंभमेळा हा पावसाळ्यातच येत असल्यामुळे सगळीकडे चिखल, ओलावा, गर्दी यामुळे यापूर्वीचा अनुभव लक्षात घेऊन त्याच्या अडचणी निवारण्यासाठी समितीने कार्यात्मक पुढाकार घेतला आहे. कुंभमेळ्यात होणारी गर्दी, लाखो भाविकांच्या भोजनासाठी वापरल्या जाणाऱ्या कागदी किंवा पानांच्या पत्रावळी किंवा प्लास्टिकचा कचरा प्रचंड प्रमाणात विखुरला जातो. तो गोदावरी पात्रात मिसळून पर्यावरणाची प्रचंड प्रमाणात हानी होते. हे लक्षात घेऊन रामतीर्थ गोदावरी सेवा समितीने पुनर्वापर योग्य स्टीलची 30 लाख ताटे आणि क्लास तसेच कापडी पिशव्यांचे वाटप करण्याचे ठरविले आहे. समितीने त्या संदर्भात नियोजन केले आहे. यासाठी महाराष्ट्र शासनाच्या प्रदूषण नियंत्रण महामंडळाचा तांत्रिक सल्ला आणि सहकार्य समिती घेणार आहे. त्याचबरोबर नाशिक मधल्या उद्योग संघटना, समाजसेवी संस्था, दानशूर व्यक्ती यांचे देखील या उपक्रमासाठी विविध प्रकारे सहकार्य घेण्याचा सेवा समितीचा मानस आहे.

आगामी सिंहस्थ कुंभमेळ्यापर्यंत सेवा समितीने विद्यार्थ्यांकरिता प्रवाह पर्यावरण शिबिरे, सेवा प्रशिक्षण शिबिरे आयोजित केली असून त्यामध्ये विविध बचत गट औद्योगिक आस्थापना विविध गणेश मित्र मंडळ यांनाही सामावून घेतले जाणार आहे.

Hindi Language GRs Canceled हिंदी भाषेसंदर्भातील दोन्ही शासन जीआर रद्द; CM देवेंद्र फडणवीसांची मोठी घोषणा

गोदावरी महात्म्याचे दस्तावेजीकरण

सिंहस्थ कुंभमेळा दर बारा वर्षांनी येतो. मात्र त्या संदर्भात योग्य माहिती आणि ऐतिहासिक संदर्भ देण्याच्या दृष्टिकोनातून गोदावरी सेवा समितीने गोदावरी नदीच्या ऐतिहासिक सांस्कृतिक आणि अध्यात्मिक संशोधनावर आधारित संदर्भ ग्रंथ प्रकाशित करण्याचे ठरविले आहे. हा ग्रंथ जनसामान्य भक्त आणि अभ्यासक यांना वितरित करून गोदावरीचे ऐतिहासिक सांस्कृतिक आणि अध्यात्मिक महात्म्य पुढच्या पिढीपर्यंत पोहोचविण्यासाठी समिती प्रयत्न असणार आहे.

या पत्रकार परिषदेला रामतीर्थ गोदावरी सेवा समितीचे सचिव मुकुंदा खोचे, स्वागत समितीचे प्रमुख रामेश्वर मालाणी, रणजीत सिंग आनंद, माध्यम संपर्कप्रमुख राजेंद्र फड, वैभव क्षेमकल्याणी, शिवाजी बोंदर्डे आदी उपस्थित होते.