न्यूयॉर्कमधील इस्कॉन मंदिरात मोहन भागवत; बेघरांसाठी भोजन वाटप, ‘कृष्ण चेतना’तून एकतेचा संदेश

By, wankhadepravin - August 29, 2026 07:00:54

0

विशेष प्रतिनिधी

नवी दिल्ली : राष्ट्रीय स्वयंसेवक संघाचे (RSS) सरसंघचालक मोहन भागवत सध्या अमेरिका दौऱ्यावर आहेत. या दौऱ्यादरम्यान त्यांनी न्यूयॉर्कमधील इस्कॉन मंदिराला भेट दिली. यावेळी त्यांनी बेघर नागरिकांसाठी राबवण्यात येणाऱ्या भोजन वाटपाच्या उपक्रमात सहभाग घेतला. तसेच, संघर्ष आणि मतभेद दूर करण्यासाठी ‘कृष्ण चेतने’च्या भूमिकेवर भाष्य केले. Mohan Bhagwat

मोहन भागवत यांनी न्यूयॉर्कमधील 26 सेकंड अव्हेन्यू येथील इस्कॉन मंदिराला भेट दिली. याच ठिकाणी 1966 मध्ये इंटरनॅशनल सोसायटी फॉर कृष्णा कॉन्शसनेस अर्थात इस्कॉनची सुरुवात झाली होती.

इस्कॉनचे गव्हर्निंग बॉडी कमिशनर गौरांग दास यांनी वृत्तसंस्था एएनआयशी बोलताना सांगितले की, आज इस्कॉनची जगभरातील 120 देशांमध्ये तब्बल 1,300 मंदिरे आहेत. स्वामी प्रभुपाद यांनी सनातन हिंदू धर्माचा संदेश जगाच्या विविध भागांमध्ये पोहोचवण्यात महत्त्वाची भूमिका बजावल्याचेही त्यांनी सांगितले.

रिक्षा-टॅक्सीचालकांना मराठीसाठी आणखी एक वर्षाची मुदतवाढ

‘श्रीकृष्ण चेतनेची अतुलनीय देणगी’

मंदिराला भेट दिल्यानंतर मोहन भागवत यांनी आपल्या भावना संदेशाच्या माध्यमातून व्यक्त केल्या. हे ठिकाण जगाला ‘श्रीकृष्ण चेतनेची अतुलनीय देणगी’ देणारे प्रेरणादायी स्थान असल्याचे त्यांनी म्हटले. प्रत्येक व्यक्ती आणि प्रत्येक गोष्टीत वास करणाऱ्या परमेश्वराप्रती शुद्ध सात्त्विक प्रेमाची भावना येथे अनुभवत असल्याचेही त्यांनी नमूद केले.

यावेळी भागवत यांनी श्रील प्रभुपाद यांच्या प्रतिमेला पुष्पहार अर्पण केला. तसेच, ‘झिरो हंगर न्यूयॉर्क’ या उपक्रमांतर्गत भक्ति सेंटरमध्ये 1 लाखावे भोजन वितरित करण्याच्या कार्यक्रमाचे उद्घाटन केले.

‘चेतनाच लोकांना एकत्र आणते’

इस्कॉन मंदिरातील भाविकांना संबोधित करताना मोहन भागवत यांनी जगभरातील संघर्ष आणि मतभेदांचा उल्लेख केला. विविधता आणि द्वंद्व असूनही लोकांना एकत्र आणणारी शक्ती म्हणजे ‘चेतना’ असल्याचे त्यांनी सांगितले.

जगात अनेक संघर्ष आणि मतभेद आहेत. मात्र, या सर्वांमध्ये माणसांना जोडणारी गोष्ट म्हणजे चेतना आणि तीच ‘कृष्ण चेतना’ असल्याचे भागवत यांनी स्पष्ट केले. विविधता आणि संघर्ष असले तरी त्यामागे एकत्वाची भावना असल्याचा संदेश त्यांनी दिला.

इस्कॉनचे कम्युनिकेशन मंत्री आणि गव्हर्निंग बॉडी कमिशनर अनुत्तमा दास यांनीही मोहन भागवत यांच्या भेटीबद्दल आनंद व्यक्त केला. जगभरात ईश्वरचेतना आणि कृष्ण चेतनेची मूल्ये पोहोचवण्यासाठी एकत्रितपणे काम करण्याबाबत चर्चा झाल्याचे त्यांनी सांगितले.

शनिवारी मॅडिसन स्क्वेअर गार्डनमध्ये संबोधन

मोहन भागवत यांचा न्यूयॉर्क दौरा त्यांच्या आगामी कार्यक्रमाच्या पार्श्वभूमीवरही महत्त्वाचा आहे. शनिवारी ते मॅडिसन स्क्वेअर गार्डनमध्ये भारतीय वंशाच्या नागरिकांना संबोधित करणार आहेत. आरएसएसच्या शताब्दी वर्षाच्या कार्यक्रमांचा भाग म्हणून ‘युनिव्हर्सल वननेस सेलिब्रेशन’ या कार्यक्रमाचे आयोजन करण्यात आले आहे.

या कार्यक्रमात हिंदू-अमेरिकन संघटना आणि भारतीय वंशाचे नागरिक सहभागी होण्याची अपेक्षा आहे. समान वारसा, आंतरधर्मीय संवाद आणि एकता या विषयांवर कार्यक्रमात चर्चा होणार आहे.

मोहन भागवत मंगळवारी न्यूयॉर्कमध्ये दाखल झाले असून, त्यांच्या तीन देशांच्या दौऱ्यात अमेरिका, कॅनडा आणि ब्रिटनचा समावेश आहे.