भाजपचे ज्येष्ठ नेते लालकृष्ण अडवाणी यांना रुग्णालयातून डिस्चार्ज; प्रकृतीत सुधारणा

By, wankhadepravin - October 19, 2026 04:00:00

0

विशेष प्रतिनिधी

नवी दिल्ली : भारतीय जनता पक्षाचे ज्येष्ठ नेते आणि माजी उपपंतप्रधान लालकृष्ण अडवाणी यांना प्रकृतीत सुधारणा झाल्यानंतर सोमवारी दिल्लीतील इंद्रप्रस्थ अपोलो रुग्णालयातून डिस्चार्ज देण्यात आला. वयाच्या ९८व्या वर्षी असलेल्या अडवाणी यांना छातीत संसर्ग झाल्यामुळे १६ ऑक्टोबर रोजी रुग्णालयात दाखल करण्यात आले होते.

रुग्णालय प्रशासनाने दिलेल्या माहितीनुसार, अडवाणी यांच्यावर वरिष्ठ न्यूरोलॉजी सल्लागार डॉ. विनीत सुरी यांच्या देखरेखीखाली उपचार सुरू होते. रुग्णालयात दाखल केल्यानंतर त्यांना अतिदक्षता विभागात (ICU) ठेवण्यात आले होते. त्या वेळी त्यांची प्रकृती स्थिर होती आणि डॉक्टरांकडून त्यांच्यावर बारकाईने लक्ष ठेवण्यात येत होते.

वृत्तसंस्था एएनआयने सूत्रांच्या हवाल्याने दिलेल्या माहितीनुसार, अडवाणी यांना शुक्रवारी सायंकाळी सुमारे ७.३० वाजता रुग्णालयात दाखल करण्यात आले होते. उपचारांनंतर त्यांच्या प्रकृतीत सुधारणा झाल्याने त्यांना घरी सोडण्याचा निर्णय घेण्यात आला.

‘सत्ता बदलायची असेल तर निवडणुका जिंका’; रेजीम चेंजच्या मुद्द्यावर फडणवीसांचा विरोधकांना इशारा

लालकृष्ण अडवाणी यांनी भारतीय जनता पक्षाच्या संघटनात्मक आणि राजकीय वाटचालीत महत्त्वाची भूमिका बजावली आहे. त्यांनी अनेक वेळा भाजपचे राष्ट्रीय अध्यक्षपद भूषवले. तसेच, २००२ ते २००४ या कालावधीत त्यांनी देशाचे उपपंतप्रधान म्हणून काम पाहिले.

भाजपला राष्ट्रीय राजकारणात एक प्रमुख राजकीय शक्ती म्हणून स्थापित करण्यात अडवाणी यांचे योगदान महत्त्वपूर्ण मानले जाते. त्यांच्या प्रकृतीत सुधारणा झाल्यानंतर त्यांना रुग्णालयातून डिस्चार्ज देण्यात आल्याने त्यांच्या समर्थकांना दिलासा मिळाला आहे.