पावसाने पाठ फिरवली, टोमॅटोनेही साथ सोडली; बीडच्या शेतकऱ्याने अखेर उचललं मोठं पाऊल!

By, wankhadepravin - September 19, 2026 02:00:58

0

विशेष प्रतिनिधी

बीड : एकीकडे कापसाच्या जागतिक मागणीमुळे शेतकऱ्यांना आशेचा किरण दिसत असताना, दुसरीकडे बीड जिल्ह्यातील आष्टी तालुक्यात पावसाअभावी शेतकऱ्यांची परिस्थिती गंभीर झाली आहे. मागील दोन महिन्यांपासून पाऊस नसल्याने पिकांना पाणी देणे कठीण झाले आहे. त्यातच टोमॅटोला योग्य भाव मिळत नसल्याने शेतकऱ्यांना मोठा आर्थिक फटका बसत आहे.

आष्टी तालुक्यातील बेलेकर नामक शेतकऱ्यांनी एका एकर क्षेत्रात टोमॅटोची लागवड केली होती. या लागवडीसाठी त्यांना सुमारे ४० हजार रुपये खर्च आला. मात्र, बाजारात टोमॅटोला अपेक्षित भाव मिळाला नाही. त्यामुळे लागवडीचा खर्चही वसूल झाला नसल्याचे त्यांनी सांगितले.

एसटीच्या १२५ बसस्थानकांवर उभारणार ‘हिरकणी कक्ष’; स्तनदा मातांसाठी सुरक्षित आणि खासगी सुविधा

चार लाखांचे उत्पन्न मिळालेल्या शेतात यंदा रोपे उपटली

मागील वर्षी याच एक एकर क्षेत्रातून टोमॅटोच्या लागवडीतून सुमारे चार लाख रुपयांचे उत्पन्न मिळाले होते. त्यामुळे यंदाही चांगले उत्पादन आणि उत्पन्न मिळेल, अशी शेतकऱ्यांची अपेक्षा होती.

मात्र, यंदा पावसाने दडी मारली आणि टोमॅटोच्या दरातही घसरण झाली. पिकाची देखभाल करण्यासाठी पाण्याची कमतरता भासत असल्याने बेलेकर यांनी आपल्या एक एकर शेतातील टोमॅटोची रोपे उपटून फेकून दिली. उत्पादनासाठी केलेला खर्च वाया गेल्याने शेतकऱ्यांसमोर आर्थिक संकट निर्माण झाले आहे.

सरकारने मदतीसाठी पुढे यावे, शेतकऱ्यांची मागणी

पावसाअभावी पिकांचे नुकसान होत असून, बाजारभावही मिळत नसल्याने शेतकरी दुहेरी संकटात सापडले आहेत. अल्पभूधारक शेतकऱ्यांना या परिस्थितीचा मोठा फटका बसत आहे.

शासनाने पावसाची स्थिती आणि पीक नुकसानीचा आढावा घेऊन शेतकऱ्यांना मदत करावी, अशी मागणी करण्यात आली आहे. कापूस उत्पादकांना जागतिक बाजारातील मागणीचा फायदा मिळण्याची अपेक्षा असली, तरी मराठवाड्यातील पावसावर अवलंबून असलेल्या शेतकऱ्यांसाठी तातडीच्या मदतीचा प्रश्न महत्त्वाचा बनला आहे.