Jharkhand Champai Soren : झारखंडचे माजी मुख्यमंत्री चंपाई सोरेन म्हणाले- चांगला मित्र मिळाला तर सोबत जाणार, आठवडाभरात स्पष्ट होईल

By, Pravin Wankhade - August 22, 2024 10:30:59

0

वृत्तसंस्था

रांची : झारखंडचे माजी मुख्यमंत्री आणि उच्च शिक्षण मंत्री चंपाई सोरेन ( Champai Soren ) आता नवीन पक्ष स्थापन करणार आहेत. दिल्लीहून सरायकेला परतल्यानंतर 12 तासांनी बुधवारी, 21 ऑगस्ट रोजी त्यांनी आपल्या निवासस्थानी ही घोषणा केली. चंपाई म्हणाले की, आम्ही राजकारणातून संन्यास घेणार नाही. आम्ही जो अध्याय सुरू केलेला आहे, त्याचे चॅप्टर बदलत राहणार आहेत. नवीन संघटना मजबूत करू. वाटेत कोणी मित्र भेटला तर मैत्री करू.

चंपाई म्हणाले- आठवडाभरात सगळं स्पष्ट होईल

निवडणुकीच्या पार्श्वभूमीवर नवीन पक्ष काढण्यासाठी कमी वेळ शिल्लक आहे, यावर चंपाई म्हणाले की, तुम्हाला यात काय अडचण आहे. 3-4 दिवसात 30-40 हजार कार्यकर्ते आले, मग आम्हाला नवीन पक्ष काढायला काय हरकत आहे? सात दिवसांत सर्वकाही स्पष्ट होईल.

केरळ हायकोर्टाचा गंभीर आजारी व्यक्तीच्या पत्नीच्या याचिकेवर दिलासा; व्यक्तीच्या संमतीशिवाय शुक्राणू काढू शकणार

जेव्हा पत्रकाराने झारखंड सरकारमध्ये कायम राहणार का असे विचारले तेव्हा चंपाई रागाने म्हणाले, ‘आम्ही म्हटले आहे की आम्ही एक नवीन अध्याय सुरू करत आहोत. जेव्हा आपण नवीन अध्याय सुरू करू तेव्हा आपण एका किंवा दोन ठिकाणी राहू का? जनतेच्या पाठिंब्याने आमचे मनोबल उंचावले आहे. त्यामुळेच आता पुढे जावंसं वाटलं. मंत्रिपदाचा राजीनामा कधी देणार, हे वेळच सांगेल, असे चंपाई यांनी सांगितले.

16 ऑगस्टपासून भाजपमध्ये प्रवेशाची चर्चा सुरू झाली होती

16 ऑगस्ट रोजी चंपाई सोरेन यांच्यासह जेएमएमचे आमदार समीर मोहंती, दशरथ गगराई, नीरल पूर्ती, चम्रा लिंडा, रामदास सोरेन, संजीव सरदार आणि मंगल कालिंदी यांनी भाजपमध्ये प्रवेश केल्याची चर्चा सुरू झाली. असा प्रश्न त्यांना विचारला असता त्यांनी ती अफवा असल्याचे सांगत फेटाळून लावले.

18 ऑगस्ट रोजी अचानक चंपाई सोरेन कोलकाता येथील दमदम विमानतळावरून दिल्लीला जात असल्याची माहिती समोर आली. ते 1 वाजता दिल्ली विमानतळावर उतरले. येथे त्यांनी भाजपच्या वरिष्ठ नेत्यांशी भेट घेतल्याची चर्चा सुरू झाली. जेव्हा त्यांना विचारण्यात आले की ते भाजपमध्ये जाणार आहेत का, तेव्हा चंपाई यांनी स्पष्ट केले की “मी जिथे आहे तिथेच राहीन”.

काही वेळाने त्यांनी सोशल मीडियावर एक लांबलचक पोस्ट लिहिली आणि म्हटले की ‘जेएमएममध्ये त्यांना खुर्चीवरून हटवून अपमानित करण्यात आले आहे. आता त्यांच्याकडे फक्त तीनच पर्याय उरले आहेत: निवृत्ती, नवीन संस्था किंवा दुसऱ्या कोणासोबत जाणे…’

20 ऑगस्ट रोजी रांचीच्या सीएम हाऊसमध्ये अचानक गोंधळ झाला. चंपाई सोरेन यांच्यासोबत असल्याचे सांगितले जात असलेल्या आमदारांनी अचानक एक एक करत सीएम हाऊस गाठले. येथे त्यांनी मुख्यमंत्री हेमंत सोरेन यांची जवळपास 3 तास भेट घेतली. यानंतर आमदार म्हणाले की, ‘आम्ही मुख्यमंत्री हेमंत सोरेन यांच्यासोबत होतो, आहोत आणि राहू. JMM सोडून कुठेही जात नाही.

दुसरीकडे चंपाई सोरेनही दिल्लीहून कोलकातामार्गे सरायकेला पोहोचले. भाजपमध्ये प्रवेश करण्याच्या प्रश्नावर काहीही बोलण्यास नकार दिला. ते म्हणाले की, ‘पक्षाचे नुकसान करण्याचा त्यांचा कोणताही हेतू नाही.’