कर्नाटक मुख्यमंत्रिपदासाठी डीके शिवकुमार यांची नवी खेळी, काँग्रेस अध्यक्ष खरगेंचे नाव केले पुढे

By, Pravin Wankhade - April 11, 2023 09:30:16

0

प्रतिनिधी

बंगळुरू : कर्नाटक विधानसभा निवडणुकीच्या काही आठवड्यांपूर्वी प्रदेश काँग्रेस कमिटीचे अध्यक्ष डीके शिवकुमार यांनी पक्षाचे राष्ट्रीय अध्यक्ष मल्लिकार्जुन खरगे यांचे नाव मुख्यमंत्रिपदासाठी घेतल्याने काँग्रेसच्या अंतर्गत चर्चांना उधाण आले आहे.DK Shivakumar On Karnataka Chief Minister face, Says Congress president Kharge Could Be First Dalit CM Of State

काँग्रेसमध्ये मुख्यमंत्रिपदासाठी त्यांच्यात आणि सिद्धरामय्या यांच्यात थेट स्पर्धा असताना शिवकुमार यांनी खरगे यांच्या नावाचा उल्लेख केला आहे.

कर्नाटक भाजपकडून स्टार कँपेनर्सच्या डिमांडमध्ये योगी, जयशंकर, हेमंत विश्वशर्मा टॉपवर; जयशंकर तर सरप्राईज एलिमेंट!!

खरगे यांचे नाव का पुढे आले?

कर्नाटक प्रदेश काँग्रेस अध्यक्षांनी ‘अनुसूचित जातीचे मुख्यमंत्री’ हा नवा मुद्दा काढून सिद्धरामय्यांची मुख्यमंत्रिपदाची महत्त्वाकांक्षा धुळीस मिळवण्याचा प्रयत्न केल्याचे पक्षातील काहींचे मत आहे. विधानसभा निवडणुकीनंतर राज्याचे मुख्यमंत्री झाल्यास पक्षाचे राष्ट्रीय अध्यक्ष मल्लिकार्जुन खरगे यांच्या नेतृत्वाखाली काम करण्यास तयार असल्याचे शिवकुमार यांनी शनिवारी (8 एप्रिल) सांगितले होते.

पत्रकार परिषदेत ते म्हणाले होते, ‘मल्लिकार्जुन खरगे हे माझे नेते आहेत आणि ते अखिल भारतीय काँग्रेस कमिटीचे (AICC) अध्यक्ष आहेत. मला त्यांच्या हाताखाली काम करायला आवडेल. ते आपल्या राज्याची आणि देशाची संपत्ती आहेत. पक्ष जो निर्णय घेईल त्याला मी बांधील आहे.

पक्ष सर्वात महत्त्वाचा

शिवकुमार यांनी सोमवारी (10 एप्रिल) पत्रकारांना सांगितले की, ‘पक्ष जे सांगेल त्याचे पालन झाले पाहिजे. खरगे पक्षाचे प्रमुख आहेत, ते मी पक्षावर सोडतो. सिद्धरामय्या आणि इतर काय म्हणतील यापेक्षा पक्ष महत्त्वाचा आहे. कर्नाटक प्रदेश काँग्रेस कमिटीच्या अध्यक्षांच्या वक्तव्याबाबत विचारले असता, माजी मुख्यमंत्री सिद्धरामय्या यांनी रविवारी सांगितले की, सर्व लोकांना हायकमांडचे पालन करावे लागेल.

1999, 2004 आणि 2013 मध्ये खरगे मुख्यमंत्री होण्याच्या शर्यतीत यशस्वी होऊ शकले नाहीत, असे पक्षातील सूत्रांचे म्हणणे आहे. खरगे राज्याच्या राजकारणात परतण्याची शक्यता कमी असल्याचे काही काँग्रेस कार्यकर्त्यांचे म्हणणे आहे. दुसरीकडे पक्षाच्या एका नेत्याने सांगितले की, “खरगे हे काँग्रेसचे राष्ट्रीय अध्यक्ष आहेत आणि 2024 च्या लोकसभा निवडणुकीच्या दृष्टीने (त्यांना) मोठी भूमिका बजावायची आहे.”

कर्नाटकात अद्याप एकही अनुसूचित जातीचा मुख्यमंत्री नाही

कर्नाटकात कधीही अनुसूचित जातीचा मुख्यमंत्री नव्हता आणि काँग्रेसमधील नेत्यांचा एक भाग असा दबाव आणत आहे की पक्षाने अनुसूचित जातीच्या नेत्याला मुख्यमंत्री म्हणून विचारात घ्यावे, कारण पक्षाकडे समाजातील अनेक सक्षम नेते आहेत. राज्यातील पक्षाचे ज्येष्ठ नेते आणि माजी उपमुख्यमंत्री जी. परमेश्वरा यांनी नुकतेच सांगितले होते की, काँग्रेस सत्तेत आल्यास तेही मुख्यमंत्रिपदाच्या दावेदारांपैकी आहेत.