मुलींसाठी वरदान ठरलेल्या सुकन्या समृद्धी योजनेतून अधिक लाभ मिळणार; मोदी सरकारने वाढवला व्याज दर!

By, Sachin Sutar - April 11, 2023 06:45:45

0

मुलींच्या सुरक्षित भविष्यासाठी मोदी सरकारने २२ जानेवारी २०१५ रोजी सुकन्या समृद्धी योजना सुरू केली होती.

विशेष प्रतिनिधी

नवी दिल्ली : पंतप्रधान नरेंद्र मोदी यांच्या नेतृत्वाखालील केंद्र सरकार महिला आणि बाल कल्याण, महिला सक्षमीकरण आणि महिला सुरक्षेसाठी पूर्णपणे कटिबद्ध आहे. मोदी सरकारने आता सुकन्या समृद्धी योजनेसाठी नवीन व्याजदर जाहीर केले आहेत. आता सुकन्या समृद्धी योजनेचा व्याजदर ७.६० टक्क्यांवरून ८ टक्के करण्यात आला आहे. या योजनेचा व्याजदर दर तीन महिन्यांनी निश्चित केला जात असल्याने, तो सध्या एप्रिल ते जून२०२३ साठी आहे. Sukanya Samriddhi Yojana will give more benefits Modi government increased the interest rate

मुलींच्या सुरक्षित भविष्यासाठी मोदी सरकारने २२ जानेवारी २०१५ रोजी सुकन्या समृद्धी योजना सुरू केली होती. योजनेअंतर्गत पोस्ट ऑफिसमध्ये ० ते १० वयोगटातील मुलींचे खाते उघडले जाईल. सध्या या खात्यांमधील ठेवींवर वार्षिक व्याजदर ७.६ टक्क्यांवरून ८ टक्के करण्यात आला आहे. मुलींच्या भवितव्यासाठी पैसे जोडण्याची ही एक उत्तम योजना आहे. कोणतीही व्यक्ती १० वर्षांपर्यंतच्या मुलीसाठी हे खाते उघडू शकते. मुलगी २१ वर्षांची झाल्यावर खाते परिपक्व होते. मुलींच्या सुवर्ण आणि सुरक्षित भविष्यासाठी तयार करण्यात आलेल्या या योजनेंतर्गत, १८ वर्षांच्या झाल्यावर त्यांना संपूर्ण शिक्षण आणि लग्नाच्या खर्चाची व्यवस्था करण्याचे आश्वासन दिले जाते. सुकन्या समृद्धी योजनेत दरवर्षी किमान २५० रुपये आणि जास्तीत जास्त १.५० लाख रुपये जमा करता येतात. यामध्ये जमा केलेल्या रकमेवर आयकर कायद्याच्या कलम 80C अंतर्गत कपातीचा लाभ मिळतो.

अवघ्या दोन दिवसांत १०.९० लाख नवीन खाती उघडली –

मोदी सरकारच्या धोरणांमुळे आणि योजनांमुळे इंडिया पोस्टने अवघ्या दोन दिवसांत सुकन्या समृद्धी योजनेची १०.९० लाख नवीन खाती उघडली आहेत. स्वातंत्र्याच्या अमृत महोत्सवाअंतर्गत १ ते ८ फेब्रुवारी दरम्यान देशभरात ७.५० लाख सुकन्या समृद्धी खाती उघडण्यासाठी विशेष जनजागृती मोहीम राबविण्यात आली.

पोस्ट विभागाची ही जनजागृती मोहीम अतिशय यशस्वी झाली. मोहिमेनंतर ९ आणि १० फेब्रुवारी रोजी देशभरातील एक लाखाहून अधिक पोस्ट ऑफिसमध्ये सुमारे १०.९० लाख नवीन सुकन्या समृद्धी खाती उघडण्यात आली. टपाल विभागाने ७.५० लाख नवीन खाती उघडण्याचे उद्दिष्ट ठेवले आहे, मात्र यामध्ये आणखी ३.४० लाख खाती उघडण्यात आली. सुकन्या समृद्धी योजनेअंतर्गत गेल्या आठ वर्षांत २.७० कोटींहून अधिक खाती उघडण्यात आली आहेत.