डिसेंबर २०२१ पर्यंत येऊ शकते RBI ची स्वतःची क्रिप्टोकरन्सी! गव्हर्नर शक्तिकांत दास यांचे मोठे विधान

By, Ayesha Tamboli - August 27, 2021 05:59:19

0

RBI own cryptocurrency : सीएनबीसीशी बोलताना गव्हर्नर शक्तिकांत दास म्हणाले की, डिसेंबर 2021 पर्यंत आरबीआय आपल्या डिजिटल चलनासाठी चाचणी सुरू करू शकते. RBI own cryptocurrency may come by December! Governor Shaktikant Das’s big statement

विशेष प्रतिनिधी

नवी दिल्ली : भारतीय रिझर्व्ह बँक आपल्या डिजिटल चलनाबाबत बऱ्याच काळापासून काम करत आहे. सीएनबीसीशी बोलताना गव्हर्नर शक्तिकांत दास म्हणाले की, डिसेंबर 2021 पर्यंत आरबीआय आपल्या डिजिटल चलनासाठी चाचणी सुरू करू शकते.

जगभरातील केंद्रीय बँका या दिशेने काम करत आहेत. चीन, युरोप आणि यूकेच्या मध्यवर्ती बँका व्यावसायिक आणि सार्वजनिक वापरासाठी क्रिप्टोकरन्सीची शक्यता पडताळून पाहत आहेत.

कोणत्याही केंद्रीय बँकेने जारी केलेल्या डिजिटल चलन किंवा क्रिप्टोकरन्सीला CBDC (केंद्रीय बँक डिजिटल चलने) असे नाव देण्यात आले आहे. या चलनाला पूर्ण कायदेशीर मान्यता असेल. सध्याच्या फियाट चलनाची ही डिजिटल आवृत्ती असेल, असे तज्ज्ञांचे म्हणणे आहे.

RBI Monetary Policy : आरबीआयच्या व्याजदरात कोणताही बदल नाही, जीडीपी वाढीचा दर 9.5 टक्के

शक्तिकांत दास म्हणाले की, आम्ही CBDC बद्दल अत्यंत सावधगिरी बाळगत आहोत, कारण ती पूर्णपणे नवीन संकल्पना आहे. डिजिटल चलनाच्या विविध पैलूंवर रिझर्व्ह बँक गांभीर्याने विचार करत आहे.

सर्वप्रथम ते प्रत्येक प्रकारे सुरक्षित असले पाहिजे. याव्यतिरिक्त त्याचा भारतीय वित्तीय व्यवस्थेवर कोणताही नकारात्मक परिणाम होऊ नये. विशेषतः कोरोनानंतर अर्थव्यवस्थेवर अजूनही दबाव आहे. अशा स्थितीत रिझर्व्ह बँक वित्तीय बाजाराबाबत अत्यंत सावध आहे.

सर्वोच्च न्यायालयाच्या वतीने बंदी हटवल्यानंतर क्रिप्टोकरन्सीसंबंधी भारतातील क्रेझ खूप वाढली आहे. ग्लोबल क्रिप्टो ॲडॉप्शन इंडेक्स 2021 मध्ये भारताचा दुसरा क्रमांक आहे. त्याने चीन, अमेरिका, यूके आणि इंग्लंडसारख्या देशांना मागे टाकले आहे.

जून 2020 ते जुलै 2021 दरम्यान क्रिप्टोकरन्सीच्या स्वीकृती दरात 880 टक्के वाढ झाली आहे. 2019 च्या तिसऱ्या तिमाहीच्या तुलनेत (ऑक्टोबर-डिसेंबर 2019), त्यात 2300 टक्के ऐतिहासिक वाढ नोंदवण्यात आली आहे.

विविध पैलूंवर काम सुरू

ऑगस्टमध्ये चलनविषयक धोरण समितीच्या बैठकीनंतर डेप्युटी गव्हर्नर टी. रवी शंकर म्हणाले होते की, रिझर्व्ह बँक या वर्षाच्या अखेरीस कायदेशीर डिजिटल चलनाचे ऑपरेशनचे मॉडेल आणू शकते.

ते म्हणाले होते की, या चलनाच्या सर्व बाबींवर तंत्रज्ञान, वितरण यंत्रणा, प्रमाणीकरण यंत्रणा यावर काम केले जात आहे. 22 जुलै रोजी ते म्हणाले की, भारत टप्प्याटप्प्याने डिजिटल चलन सुरू करण्याचा विचार करत आहे.

खासगी क्रिप्टोकरन्सीबाबत चिंता कायम – गव्हर्नर दास

डिजिटल चलनावर अनेक वर्षांपासून काम सुरू आहे. तथापि, बिटकॉइन आणि इथेरियम सारख्या खासगी क्रिप्टोकरन्सीच्या वाढत्या लोकप्रियतेने लक्ष वेधले आहे. या सर्व क्रिप्टोकरन्सी ब्लॉकचेन तंत्रज्ञानावर आधारित आहेत.

एमपीसीच्या पत्रकार परिषदेत गव्हर्नर शक्तिकांत दास म्हणाले की, केंद्रीय बँकेची चिंता खासगी क्रिप्टोकरन्सीबाबत आहे. ते म्हणाले की, ती अद्याप नियंत्रित केलेली नाही आणि ही बाब सरकारशीही शेअर केली गेली आहे.

RBI own cryptocurrency may come by December! Governor Shaktikant Das’s big statement

महत्त्वाच्या बातम्या