केरळचे मंत्री के. टी. जलील सत्तेच्या गैरवापराबद्दल दोषी; मंत्रीपदावर राहण्याचा हक्क गमावला; केरळच्या लोकायुक्तांचा निकाल

वृत्तसंस्था

तिरूअनंतपूरम :  केरळचे उच्च शिक्षणमंत्री के. टी. जलील यांना पदाचा गैरवापर करून आपल्याच नातलगांना पदाची खिरापत वाटण्याच्या प्रकरणात केरळच्या लोकायुक्तांनी दोषी ठरविले आहे.Kerala Lokayukta has found Kerala Minister KT Jaleel, guilty of “allegations of abuse of power, favouritism, nepotism and violation of Oath of Office”

त्याच बरोबर ते मंत्रिपदावर राहण्यास लायक नाहीत, अशा कडक शब्दांमध्ये ताशेरे ओढले आहेत. केरळ विधानसभा निवडणूकीचे मतदान संपल्यानंतर लोकायुक्तांचा रिपोर्ट आला आहे.



के. टी. जलील यांच्या विरोधात हा दुसरा मामला आहे. आधीच जलील यांना सोने तस्करी मामल्यात राष्ट्रीय तपास यंत्रणा एनआयएने तपास आणि चौकशीसाठी समन्स देऊन बोलावले होते.

लोकायुक्तांनी ताशेरे मारलेला मामला केरळच्या अल्पसंख्याक विकास वित्त निगमच्या महाप्रबंधक पदावर के. टी. अदीब या आपल्याच नातेवाईकाची वर्णी लावल्याबद्दलचा आहे.

तसेच त्यांनी मंत्रीपदाचा गैरवापर करून अल्पसंख्याक विकास वित्त निगमच्या जनरल मॅनेजरपदाच्या नियुक्तीचे निकषही बदलून टाकल्याबद्दल त्यांना लोकायुक्तांनी दोषी ठरविले आहे.

लोकायुक्त सायरिक जोसेफ आणि उपलोकायुक्त हरून अल रशीद या दोघांनी एकमताने के. टी. जलील यांना पदाच्या गैरवापराबद्दल दोषी ठरवून त्यांना मंत्रीपदावर राहण्याचा अधिकार नसल्याचे ताशेरे मारले आहेत. जलील यांच्या बाबतचा रिपोर्ट लोकायुक्त जोसेफ यांनी मुख्यमंत्री पिनरई विजयन यांना पाठवून दिला आहे.

के. टी. जलील हे अपक्ष आमदार म्हणून निवडून आले असले तरी मूळचे ते मुस्लीम लीगच्या मुस्लीम स्टुडंट फेडरेशनचे नेते आहेत. ते सध्या केरळच्या मार्क्सवादी कम्युनिस्ट पक्षाचे संलग्न आमदार म्हणून विधानसभेत बसतात. सोने तस्करी प्रकरणातही त्यांचे नाव आले आहे.

लोकायुक्तांचा निकाल आल्यानंतर भाजप आणि काँग्रेस नेत्यांनी ताबडतोब के. टी. जलील यांचा राजीनामा मागितला आहे. त्याचबरोबर केरळ विधानसभेसाठी मतदान झाल्यानंतर हा रिपोर्ट येण्याकडेही दोन्ही पक्षांनी लक्ष वेधले आहे. आपण वकीलांशी सल्लामसलत करून पुढचे राजकीय पाऊल उचलणार असल्याचे जलील यांनी सांगितले.

Kerala Lokayukta has found Kerala Minister KT Jaleel, guilty of “allegations of abuse of power, favouritism, nepotism and violation of Oath of Office”

हे ही वाचा