Jammu and Kashmir : जम्मू-काश्मीर विधानसभेच्या 24 जागांवर उद्या मतदान; 219 उमेदवारांपैकी 110 कोट्यधीश, 36 जणांविरुद्ध फौजदारी खटले

By, Pravin Wankhade - September 17, 2024 09:30:01

0

वृत्तसंस्था

श्रीनगर : जम्मू-काश्मीर ( Jammu and Kashmir ) विधानसभा निवडणुकीच्या पहिल्या टप्प्यात उद्या 18 सप्टेंबर रोजी 7 जिल्ह्यांतील 24 विधानसभा जागांवर मतदान होणार आहे. ज्यामध्ये 23.27 लाख मतदारांचा समावेश असेल. पहिल्या टप्प्यातील 24 जागांपैकी 8 जागा जम्मू विभागात आणि 16 जागा काश्मीर खोऱ्यात आहेत. जास्तीत जास्त 7 जागा अनंतनागमध्ये आणि किमान 2 जागा शोपियान आणि रामबन जिल्ह्यात आहेत.

निवडणूक आयोगाने दिलेल्या माहितीनुसार पहिल्या टप्प्यात 219 उमेदवार रिंगणात आहेत. यामध्ये 9 महिला आणि 92 अपक्ष उमेदवारांचा समावेश आहे. 110 उमेदवार कोट्यधीश आहेत तर 36 उमेदवारांवर गुन्हे दाखल आहेत.

Raj Thackeray : ‘मग अजित रानडेंची नियुक्ती करताना, ही बाब लक्षात आली नव्हती का?’ ; राज ठाकरेंचा सवाल!

मुफ्ती कुटुंबाचा बालेकिल्ला असलेली बिजबेहारा जागाही याच टप्प्यात आहे. येथे पीडीपी प्रमुख मेहबूबा मुफ्ती यांची कन्या इल्तिजा प्रथमच निवडणूक लढवत आहेत. मेहबूबा आणि त्यांचे वडील मुफ्ती मोहम्मद सईद हे मुख्यमंत्री राहिले आहेत.

जम्मू-काश्मीरमधील 90 विधानसभा जागांवर 18 सप्टेंबर, 25 सप्टेंबर आणि 1 ऑक्टोबरला तीन टप्प्यांत मतदान होणार आहे. 8 ऑक्टोबरला निकाल जाहीर होणार आहे.

जम्मू-काश्मीरमध्ये 10 वर्षांनंतर विधानसभा निवडणुका होत आहेत. 2014 च्या निवडणुकीत पीडीपीला सर्वाधिक 28 आणि भाजपला 25 जागा मिळाल्या होत्या. दोन्ही पक्षांनी मिळून सरकार स्थापन केले होते.

अनंतनागच्या 7 जागांवर सर्वाधिक मतदान

पहिल्या टप्प्यात अनंतनागच्या 7, पुलवामाच्या 4, कुलगाम, किश्तवाड आणि डोडामधील 3-3, शोपियान आणि रामबनच्या 2-2 जागांवर मतदान होणार आहे. डोडा, रामबन आणि किश्तवाड हे जिल्हे जम्मू विभागात येतात, तर अनंतनाग, पुलवामा, कुलगाम आणि शोपियान हे काश्मीर विभागात येतात. पुलवामाच्या पंपोर सीटवर सर्वाधिक 14 उमेदवार आहेत. त्याचवेळी अनंतनागच्या बिजबेहारा जागेवर केवळ 3 उमेदवारांमध्ये निवडणूक लढत आहे.

पीडीपीकडे सर्वाधिक 18 उमेदवार कोट्यधीश

असोसिएशन फॉर डेमोक्रॅटिक रिफॉर्म्स (ADR) ने जम्मू आणि काश्मीर विधानसभा निवडणुकीच्या पहिल्या टप्प्यातील 219 उमेदवारांच्या शपथपत्रांवर आधारित अहवाल तयार केला आहे. एडीआरच्या अहवालानुसार फेज-1 च्या 219 उमेदवारांची सरासरी मालमत्ता 3 कोटी रुपये आहे.

219 पैकी 50% म्हणजेच 110 उमेदवार कोट्यधीश आहेत. त्यांच्याकडे एक कोटी किंवा त्याहून अधिक किमतीची संपत्ती आहे. मेहबूबा मुफ्ती यांच्या नेतृत्वाखालील पीपल्स डेमोक्रॅटिक पार्टी (पीडीपी) चे 21 पैकी 18 उमेदवार कोट्यधीश आहेत.

36 उमेदवारांवर गुन्हे दाखल, 5 रेड अलर्ट जागा

ADR अहवालानुसार, 219 पैकी 16% म्हणजेच 36 उमेदवारांवर फौजदारी गुन्हे दाखल आहेत. 11% म्हणजे 25 उमेदवार असे आहेत ज्यांच्यावर खून, अपहरण यासारखे गंभीर गुन्हे दाखल आहेत. 4 उमेदवारांवर खुनाच्या प्रयत्नाचे गुन्हे दाखल आहेत. 2 जणांवर महिला अत्याचाराचे गुन्हे दाखल आहेत. यातील एका उमेदवारावर बलात्काराचा गुन्हाही दाखल आहे.

पहिल्या टप्प्यात 24 पैकी 5 रेड अलर्ट जागा आहेत. रेड अलर्ट जागा अशा आहेत जिथे 3 किंवा त्याहून अधिक उमेदवारांवर फौजदारी गुन्हे दाखल आहेत. 5 जागांमध्ये कोकरनाग (ST), दोडा, पुलवामा, डोरू, भदरवाह यांचा समावेश आहे.