मनीष सिसोदियांची आज कोर्टात हजेरी, कोठडी वाढवण्याची मागणी करू शकते ईडी

By, Pravin Wankhade - April 17, 2023 10:30:34

0

वृत्तसंस्था

नवी दिल्ली : दिल्ली मद्य धोरणप्रकरणी अटक करण्यात आलेले माजी उपमुख्यमंत्री मनीष सिसोदिया यांना आज न्यायालयात हजर करण्यात येणार आहे. येथे ईडी कोर्टाकडून सिसोदिया यांच्या कोठडीत वाढ करण्याची मागणी करू शकते. गेल्या सुनावणीत न्यायालयाने सिसोदिया यांना 17 एप्रिलपर्यंत ईडी कोठडीत पाठवले होते.Manish Sisodian to appear in court today, ED may seek extension of custody

कोर्ट 18 एप्रिल रोजी सिसोदिया यांच्या जामीन अर्जावरही सुनावणी करणार आहे. दुसरीकडे, रविवारी सीबीआयने दिल्लीचे मुख्यमंत्री अरविंद केजरीवाल यांची साडेनऊ तास चौकशी केली.

आम आदमी पार्टीला राष्ट्रीय दर्जा; आनंदाचा क्षणी केजरीवालांना आली तिहार तुरुंगवासी मनीष सिसोदिया, सत्येंद्र जैन यांची आठवण!!

चौकशी संपल्यानंतर केजरीवाल यांनी माध्यमांशी बोलताना सांगितले की, एजन्सीने मला 56 प्रश्न विचारले. आदरातिथ्याबद्दल मी सीबीआय अधिकाऱ्यांचे आभार मानू इच्छितो. त्यांनी मैत्रीपूर्ण पद्धतीने प्रश्न विचारले.

याप्रकरणी दिल्लीचे माजी उपमुख्यमंत्री मनीष सिसोदिया ईडीच्या ताब्यात आहेत. 8 तासांच्या चौकशीनंतर 26 फेब्रुवारीला सीबीआयने त्यांना अटक केली होती. 7 दिवसांच्या सीबीआय कोठडीनंतर, न्यायालयाने 6 मार्च रोजी सिसोदिया यांना 14 दिवसांच्या न्यायालयीन कोठडीत तिहार तुरुंगात पाठवले होते. येथे ईडीने दिल्लीच्या माजी उपमुख्यमंत्र्यांची मद्य धोरण प्रकरणाशी संबंधित मनी लाँड्रिंग प्रकरणात चौकशी केली होती, एजन्सीने सिसोदिया यांना तुरुंगातूनच अटक केली होती.

ईडीने तिहार तुरुंगात केली सिसोदिया यांची चौकशी

वृत्तानुसार, या प्रकरणात अटक करण्यात आलेल्या इतर दोन आरोपींसह ईडीची टीम तिहारला पोहोचली होती. नवीन दारू धोरण बनवताना दक्षिण दिल्लीतील व्यापाऱ्यांकडून 100 कोटींची लाच घेतल्याचे ईडीने सांगितले होते. या प्रकरणी ईडीने हैदराबादचे व्यापारी अरुण रामचंद्र पिल्लई आणि अमनदीप धल्ल यांना 6 मार्च रोजी अटक केली होती. या प्रकरणी तेलंगणाचे मुख्यमंत्री के. चंद्रशेखर राव (केसीआर) यांची कन्या के. कविता यांचेही नाव पुढे आले होते. याप्रकरणी एजन्सीने कविता यांचीही चौकशी केलेली आहे.