त्रिशा कृष्णन प्रकरणात उदयनिधी स्टालिन यांना दिलासा; चौकशीनंतर मुक्त करण्याचे हायकोर्टाचे निर्देश

By, wankhadepravin - August 5, 2026 07:00:30

0

विशेष प्रतिनिधी

चेन्नई : अभिनेत्री त्रिशा कृष्णन यांच्याविषयी कथित आक्षेपार्ह टिप्पणी केल्याच्या प्रकरणात द्रमुक (DMK) नेते उदयनिधी स्टालिन यांना मंगळवारी पोलिसांनी चौकशीसाठी ताब्यात घेतले. या प्रकरणावर सुनावणी करताना मद्रास उच्च न्यायालयाने चौकशी पूर्ण झाल्यानंतर उदयनिधी स्टालिन यांना तात्काळ मुक्त करण्याचे निर्देश दिले. Trisha Krishnan

सुनावणीदरम्यान सरकारी वकिलांनी न्यायालयाला सांगितले की, उदयनिधी स्टालिन यांना अटक करण्याचा किंवा न्यायालयीन कोठडीत पाठवण्याचा कोणताही प्रस्ताव नाही. हे प्रकरण एका महिलेच्या सन्मानाशी संबंधित असल्याने कायदेशीर प्रक्रियेचा भाग म्हणून त्यांची चौकशी केली जात असल्याचे त्यांनी स्पष्ट केले.

तंजावूरमध्ये सुरू आहे चौकशी

सरकारी पक्षाच्या माहितीनुसार, संबंधित घटना तंजावूर जिल्ह्यात घडली होती. त्यामुळे तपासाच्या अनुषंगाने उदयनिधी स्टालिन यांना तेथे नेऊन चौकशी करण्यात येत आहे. ही केवळ तपास प्रक्रिया असून अटक करण्याचा कोणताही हेतू नसल्याचे सरकारी वकिलांनी न्यायालयात सांगितले.

Say No to Drugs : ड्रग फ्री मुंबईसाठी प्रत्येक घटकाचा सहभाग आवश्यक; छत्रपती शिवाजी महाराजांचा गनिमी कावा वापरून करणार ब्रँडचे जाळे उद्ध्वस्त!!

ही भूमिका नोंदवून मद्रास उच्च न्यायालयाने तपास यंत्रणांना चौकशी सुरू ठेवण्यास परवानगी दिली. मात्र, चौकशी पूर्ण होताच उदयनिधी स्टालिन यांना तात्काळ सोडण्यात यावे, असे स्पष्ट निर्देश न्यायालयाने दिले.

नेमके प्रकरण काय?

तंजावूर येथे कावेरी नदीच्या पाणीप्रश्नी आयोजित आंदोलनादरम्यान उदयनिधी स्टालिन यांनी मुख्यमंत्री जोसेफ विजय यांच्यावर टीका केली. त्यावेळी उपस्थितांपैकी काहींनी अभिनेत्री त्रिशा कृष्णन यांचे नाव घेतल्यानंतर उदयनिधी स्टालिन यांनी केलेले एक विधान द्विअर्थी आणि आक्षेपार्ह असल्याचा आरोप करण्यात आला.

या कथित वक्तव्यानंतर राजकीय आणि सामाजिक स्तरावर तीव्र प्रतिक्रिया उमटल्या असून, प्रकरण न्यायालयापर्यंत पोहोचले आहे. सध्या या प्रकरणाचा तपास सुरू असून, चौकशी पूर्ण झाल्यानंतर पुढील कायदेशीर प्रक्रिया राबवली जाणार आहे.