बिहारमध्ये बहुमत चाचणी अगोदर काँग्रेसला आमदार फुटण्याची भीती!

By, Pravin Wankhade - February 4, 2024 06:00:54

0

आमदारांना दौऱ्यावर पाठवण्याची योजना आखली जात आहे.

विशेष प्रतिनिधी

नवी दिल्ली : बिहारमधील राजकारण आणि सरकारसाठी १२ फेब्रुवारी हा दिवस खूप खास असणार आहे. या दिवशी विधानसभेत नितीश कुमार यांच्या एनडीए सरकारची फ्लोर टेस्ट होणार आहे. या दिवशी जर नितीश सरकार बहुमत सिद्ध करू शकले नाही तर पुन्हा एकदा भूकंप होईल. मात्र, सरकारला बहुमत मिळेल, असा विश्वास आहे. नितीश सरकारकडे बहुमतापेक्षा 6 आमदार जास्त आहेत, मात्र तेजस्वी यादव यांच्या ‘खेळ बाकी आहे’ या विधानानंतर अनेक तर्कवितर्क लावले जात आहेत.Before the majority test in Bihar Congress MLAs fear to split

बिहारमध्ये भाजपमध्ये देखील खांदेपालट; सम्राट चौधरी, विजय सिन्हा उपमुख्यमंत्रीपदी!!

दरम्यान, काँग्रेस हायकमांडला आपले आमदार फुटण्याची भीती आहे. या संदर्भात शनिवारी दिल्लीत राज्यातील काँग्रेस आमदारांची बैठक झाली. या बैठकीला 19 पैकी 17 आमदार उपस्थित होते. दोन गैरहजर आमदारांपैकी एका आमदाराचा मुलगा आजारी असून दुसरा आमदार स्वत: आजारी असल्याचे सांगण्यात येत आहे. हे आमदार पक्ष फोडून वेगळे गट निर्माण करतील, अशी भीती काँग्रेस हायकमांडला वाटत असल्याने त्यांना दौऱ्यावर पाठवण्याची योजना आखली जात आहे.

सूत्रांनी दिलेल्या माहितीनुसार, झारखंडच्या आमदारांप्रमाणे बिहारमधील काँग्रेस आमदारांनाही काँग्रेस शासित राज्यात पाठवले जाऊ शकते. सूत्रांनी दिलेल्या माहितीनुसार, पक्षाचे दोन आमदारही दिल्लीत अडकले आहेत. सध्या बहुतांश आमदार दिल्लीतील बिहार निवासस्थानी मुक्कामी आहेत. राज्याचे दोन्ही उपमुख्यमंत्री सम्राट चौधरी आणि विजय सिन्हा हेही दिल्लीत आले आहेत. दोन्ही नेते पक्षाच्या प्रमुख नेत्यांची भेट घेणार आहेत.

सूत्रांनी दिलेल्या माहितीनुसार, हायकमांड सोमवारी आपल्या सर्व आमदारांना हैदराबाद किंवा बंगळुरूला पाठवू शकते. दिल्लीत शनिवारी झालेल्या बैठकीतून गायब असलेले बिक्रमचे आमदार सिद्धार्थ सौरभ हे पक्षाच्या वरिष्ठ नेत्यांच्या संपर्कात असून तेही दिल्लीत पोहोचले आहेत. याशिवाय मणिहरीचे आमदार मनोहर प्रसाद सिंह यांची प्रकृती खराब असली तरी ते हायकमांडच्या संपर्कात आहेत.