Jamaat-e-Islami : बांगलादेशात जमात-ए-इस्लामीवरील बंदी हटली; हसीना सरकारचा निर्णय उलटवला

By, Pravin Wankhade - August 30, 2024 10:30:25

0

वृत्तसंस्था

ढाका : बांगलादेशातील अंतरिम सरकारने बुधवारी जमात-ए-इस्लामी ( Jamaat-e-Islami ) पक्षावरील बंदी उठवली. जमात-ए-इस्लामी हा बांगलादेशातील सर्वात मोठा मुस्लीम पक्ष आहे. हसीना सरकारने 1 ऑगस्ट रोजी त्यावर बंदी घातली होती. विद्यार्थ्यांच्या आंदोलनात दंगल भडकवल्याचा आरोप त्यांच्यावर होता.

बांगलादेशच्या गृहमंत्रालयाने नोटीस जारी करून म्हटले आहे की, जमात-ए-इस्लामी पक्ष आणि त्याच्याशी संलग्न संघटनांचा दहशतवादी कारवायांमध्ये सहभाग असल्याचा कोणताही पुरावा नाही. त्यामुळे त्यांच्यावर घातलेली बंदी उठवली जात आहे.

Assam : आसाम विधानसभेने मुस्लीम विवाह आणि घटस्फोटाशी संबंधित विधेयक केले मंजूर

जमात-ए-इस्लामी पक्षावर 2013 पासून निवडणूक लढविण्यास बंदी

2013 मध्ये उच्च न्यायालयाने जमात-ए-इस्लामी पक्षाचा जाहीरनामा संविधानाचे उल्लंघन असल्याचे म्हटले होते. यानंतर पक्षाला निवडणूक लढविण्यास बंदी घालण्यात आली. 2018 मध्ये निवडणूक आयोगाने जमातची नोंदणीही रद्द केली होती.

अंतरिम सरकारने त्यांच्यावरील बंदी उठवली असली, तरी त्यांच्यावर निवडणूक लढवण्याची बंदी कायम आहे. जमात-ए-इस्लामी पक्षाच्या नेत्यांनी सोमवारी इंडियन मीडिया करस्पॉन्डंट असोसिएशन बांगलादेशच्या प्रतिनिधींसोबत बैठक घेतली. यादरम्यान पक्षाचे वकील शिशिर मोनीर यांनी सांगितले की, पक्ष निवडणूक लढवण्यावरील बंदी हटवण्यासाठी पुढील आठवड्यात सर्वोच्च न्यायालयात याचिका दाखल करणार आहे.

या बैठकीत पक्षाचे नेते डॉ शफीकुर रहमान यांनीही भारत आणि बांगलादेश यांच्यातील संबंधांवर भर दिला. शफीकुर म्हणाले, “जमातचे भारताशी जुने संबंध आहेत. आम्हाला भारतासोबतचे संबंध आणखी सुधारायचे आहेत. आम्हाला आशा आहे की भारतालाही तेच हवे असेल.”

पक्ष भारताच्या फाळणीला विरोध करायचा, नंतर पाकिस्तान समर्थक झाला

जमात-ए-इस्लामी पक्षाची स्थापना ब्रिटिश राजवटीत 1941 मध्ये झाली. भारतीय स्वातंत्र्य चळवळीच्या काळात पक्षाने फाळणीला विरोध केला होता. फाळणीमुळे मुस्लिम ऐक्याला धोका निर्माण होईल, असा पक्षाचा विश्वास होता. यामुळे देशातील मुस्लीम वेगळे होतील. पक्षाने यावर जीनांच्या मुस्लीम लीगच्या विचारांना विरोध केला.

मात्र, स्वातंत्र्यानंतर पक्षाच्या नेत्यांनी मुस्लीम लीगला पाठिंबा दिला. पक्षाची भूमिका नेहमीच पाकिस्तान समर्थक राहिली आहे. शरिया कायदा लागू करण्याची मागणीही ते करतात.

1971 मध्ये स्वतंत्र बांगलादेशच्या निर्मितीला पक्षाने विरोध केला होता. बांगलादेशच्या स्वातंत्र्य चळवळीविरुद्धही मोहिमा सुरू केल्या. जमातच्या नेत्यांवर कट्टरतावादाला प्रोत्साहन आणि अल्पसंख्याकांवर हल्ले केल्याचा आरोप आहे.