शेतकऱ्यांसाठी मोठी बातमी! 25 ऑगस्टनंतर राज्यात पावसाचा जोर वाढणार; पंजाबराव डखांचा अंदाज

By, wankhadepravin - August 22, 2026 11:30:30

0

विशेष प्रतिनिधी

मुंबई : राज्यातील अनेक भागांत सध्या पावसाने उघडीप दिली असून, ऐन पावसाळ्यात उन्हाळ्यासारखी परिस्थिती निर्माण झाली आहे. अनेक जिल्ह्यांमध्ये अपेक्षित पाऊस न झाल्याने शेतकऱ्यांची चिंता वाढली आहे. पिकांना पाण्याची गरज असताना शेतकरी आभाळाकडे डोळे लावून बसले आहेत. अशातच हवामान अभ्यासक पंजाबराव डख यांनी आगामी काळातील पावसाबाबत महत्त्वाचा अंदाज व्यक्त केला आहे. Rainfall intensity

25 ते 28 ऑगस्टदरम्यान पावसाचा जोर वाढणार?

पंजाबराव डख यांच्या अंदाजानुसार, 25 ते 28 ऑगस्टदरम्यान राज्यातील काही भागांत मुसळधार पाऊस होण्याची शक्यता आहे. या कालावधीत विदर्भातील अनेक जिल्ह्यांना पावसाचा फटका बसू शकतो.

धुळे, चंद्रपूर, वर्धा, नागपूर, भंडारा आणि गोंदिया या भागांत पावसाची शक्यता असल्याचे डख यांनी सांगितले आहे. त्यानंतर वाशिम, हिंगोली, अकोला, अमरावती, बुलढाणा, परभणी, नांदेड, बीड, जालना, जळगाव, छत्रपती संभाजीनगर यासह मराठवाडा आणि उत्तर महाराष्ट्रातील काही भागांतही पावसाचा जोर वाढू शकतो.

संविधानाच्या गप्पा, पण चर्चेपासून पळ! फडणवीसांचा विरोधकांना थेट सवाल

सप्टेंबरमध्ये सर्वदूर पावसाचा अंदाज

ऑगस्टच्या शेवटच्या आठवड्यानंतर सप्टेंबरच्या पहिल्या आठवड्यात राज्यात मोठ्या प्रमाणात पाऊस होण्याचा अंदाज पंजाबराव डख यांनी व्यक्त केला आहे. सप्टेंबरमध्ये अनेक भागांत पावसाची स्थिती सुधारण्याची शक्यता असल्याचे त्यांनी म्हटले आहे.

तसेच, यंदा ऑक्टोबरमध्ये परतीच्या पावसाचा जोरही वाढू शकतो, असा अंदाज त्यांनी व्यक्त केला आहे. त्यामुळे ऑगस्टमध्ये काही भागांत पाऊस कमी असला तरी पुढील काळात परिस्थितीत बदल होण्याची शक्यता आहे.

शेतकऱ्यांचे पावसाकडे लक्ष

पावसाळा सुरू होऊन अडीच महिन्यांचा कालावधी उलटला असतानाही राज्यातील अनेक भागांत समाधानकारक पाऊस झालेला नाही. काही ठिकाणी जुलैमध्ये पावसाने हजेरी लावली; मात्र त्यानंतर अनेक भागांत पावसाने दडी मारली.

पावसाअभावी शेतीपिकांसह जनावरांच्या चाऱ्याचा आणि काही भागांत पिण्याच्या पाण्याचा प्रश्न निर्माण होण्याची शक्यता आहे. त्यामुळे आता 25 ऑगस्टपासून पावसाचा अंदाज प्रत्यक्षात कितपत खरा ठरतो, याकडे शेतकऱ्यांचे लक्ष लागले आहे.

टीप: पंजाबराव डख यांचा अंदाज हा वैयक्तिक हवामान अंदाज आहे. अचूक आणि अधिकृत जिल्हानिहाय हवामानासाठी भारतीय हवामान विभाग (IMD) चे अपडेट्स पाहणे महत्त्वाचे आहे.