कुख्यात गुंड शरद मोहोळची हत्या; भाजपशी कनेक्शनची माध्यमांमध्ये चर्चा!!

By, Pravin Wankhade - January 5, 2024 05:54:21

0

प्रतिनिधी

पुणे : कुख्यात गुंड शरद मोहोळची गोळ्या झाडून हत्या करण्यात आली आहे. कोथरुडमध्ये दोन अज्ञातांनी मुळशी पॅटर्न स्टाईलने येऊन 3 गोळ्या झाडल्यानंतर शरद मोहोळला ससून रुग्णालयात दाखल करण्यात आले होते. मात्र उपचार सुरु असतानाच शरद मोहोळचा मृत्यू झाला आहे. दिवसाढवळ्या झालेल्या हत्येनंतर पुण्यात दहशतीचे वातावरण निर्माण झाले आहे. घटनेची माहिती मिळताच पोलिसांनी घटनास्थळी धाव घेऊन तपास सुरु केला आहे. Murder of notorious gangster Sharad Mohol

पण त्याचवेळी माध्यमांमध्ये शरद मोहोळच्या भाजपच्या कनेक्शनची चर्चा सुरू झाली. शरद मोहोळची स्वाती मोहोळ हिने काही दिवसांपूर्वीच भाजपमध्ये प्रवेश केल्याने भाजप कनेक्शनची चर्चा होत राहिली. शरद मोहोळ हा कुख्यात गुंड संदीप मोहोळ याचा ड्रायव्हर होता. मारणे टोळीने संदीपची हत्या केल्यानंतर शरद मोहोळ गुन्हेगारी क्षेत्रात एक्टिव्ह झाला.

कोथरुड भागात दहशत असलेला शरद मोहोळवर दुपारी सुतारदरा परिसरात अज्ञात हल्लेखोरांनी पिस्तुलातून तीन गोळ्या झाडल्या. बाईकवरून आलेल्या अज्ञात आरोपींनी शरद मोहोळ याच्या दिशेने 3 गोळ्या झाडल्या. त्यातील 1 गोळी शरद मोहोळ याच्या खांद्याला लागली. गंभीर जखमी झालेल्या शरद मोहोळ तातडीने वनाज इथल्या सह्याद्री रुग्णालयात दाखल करण्यात आले होते. दुपारी 1.30 वाजण्याच्या सुमारास हा संपूर्ण प्रकार घडला आहे. गोळ्या झाडल्यानंतर आरोपी पसार झाले होते.

काही महिन्यांपूर्वीच झाली होती सुटका

शरद मोहोळ यांच्यासह इतर 7 जणांची जून महिन्यात पुणे सत्र न्यायालयाने निर्दोष मुक्तता केली होती. अतिरिक्त सत्र न्यायाधीश व्हि. डी. निंबाळकर यांनी हा निकाल दिला होता. मोहोळ याच्यासह त्याच्या सहकाऱ्यांवर पौड पोलीस ठाण्यात अपहरण, खंडणी, जिवे मारण्याची धमकी असे गुन्हे दाखल होते. 2011 मध्ये पौड इथल्या एका व्यावसायिकाचे खंडणीसाठी अपहरण करण्यात आले होते. याप्रकरणी पौड पोलीस ठाण्यात मोहोळवर गुन्हा दाखल करण्यात आला होता. या प्रकरणात कोणतेही साक्षीदार साक्ष देण्यासाठी पुढे आले नाहीत. त्यामुळे मोहोळ आणि त्याच्या साथीदारासंदर्भात कोणतेही पुरावे मिळाले नाहीत.

जर्मन बेकरी बॉम्बस्फोट, कर्नाटक मधील चिन्नास्वामी स्टेडियम येथील बॉम्बस्फोट, दिल्ली येथील बॉम्बस्फोट प्रकरणातील कुख्यात दहशतवादी कातिल सिद्धकी याच्या खुनाच्या गुन्ह्यातूनही 2 वर्षांपूर्वी शरद मोहोळची निर्दोष मुक्तता झाली होती. येरवडा कारागृहातील अतिसुरक्षित समजल्या जाणाऱ्या अंडा सेलमध्ये कातिल सिद्दिकी याची बर्मुडाच्या नाडीने गळा आवळून हत्या करण्यात आली होती. या प्रकरणातही शरद मोहोळचे नाव आले होते.

पत्नीचा भाजप प्रवेश

दरम्यान, काही महिन्यांपूर्वी शरद मोहोळची पत्नी स्वाती मोहोळ यांनी भाजपमध्ये प्रवेश केला होता. पालकमंत्री चंद्रकांत पाटील यांच्या उपस्थितीत हा पक्षप्रवेश पार पडला होता. यावेळी भाजपचे प्रदेश सरचिटणीस मुरलीधर मोहोळ आणि शहराध्यक्ष जगदीश मुळीक या वेळी उपस्थित होते. स्वाती मोहोळ यांनी भाजपात प्रवेश केल्यानंतर चंद्रकांत पाटील यांनी ट्विट करत याची माहिती दिली होती.