शी जिनपिंग आता पूर्वीपेक्षा जास्त शक्तिशाली, तिसऱ्यांदा झाले राष्ट्राध्यक्ष, 2018 मध्येच रद्द केला होता 2 टर्मचा नियम|Xi Jinping now more powerful than ever, third term as president, 2-term rule abolished in 2018

शी जिनपिंग आता पूर्वीपेक्षा जास्त शक्तिशाली, तिसऱ्यांदा झाले राष्ट्राध्यक्ष, 2018 मध्येच रद्द केला होता 2 टर्मचा नियम

वृत्तसंस्था

बीजिंग : नॅशनल पीपल्स काँग्रेस (NPC) च्या 14व्या बैठकीत शी जिनपिंग यांना तिसऱ्यांदा राष्ट्राध्यक्ष बनण्यास मान्यता देण्यात आली आहे, ज्यामुळे त्यांची राजकीय ताकद आता पूर्वीपेक्षाही वाढली आहे. शुक्रवारी (10 मार्च) त्यांना तिसऱ्यांदा राष्ट्राध्यक्षपदी विराजमान करण्यात आले. सध्या सुरू असलेल्या बैठकीत जिनपिंग यांनी चीन सरकार आणि अर्थव्यवस्थेवर आपली पकड आणखी मजबूत केली आहे.Xi Jinping now more powerful than ever, third term as president, 2-term rule abolished in 2018

नॅशनल पीपल्स काँग्रेस, चीनच्या संसदेने रविवारी (5 मार्च) आपली वार्षिक बैठक सुरू केली. आठवडाभरापासून ही बैठक सुरू आहे. यामध्ये 69 वर्षीय शी यांना काही आव्हानांचाही सामना करावा लागला. त्यांच्या झीरो-कोविड धोरणाबाबतही अनेक प्रश्न निर्माण झाले. मात्र, या सगळ्यावर त्यांनी मात केली आहे. खासदारांनी त्याऐवजी बीजिंगच्या विज्ञान मंत्रालयाच्या सर्वसमावेशक सुधारणा आणि तांत्रिक क्षमतांवर लक्ष केंद्रित केले आहे.

शी जिनपिंग यांच्या भाषणात चीनच्या मेक ओव्हर वर भर; चीनला जगाला सांगायचीय चिनी सभ्यतेची गोष्ट!!

जिनपिंग आणखी मजबूत

वृत्तानुसार या बैठकीत शी जिनपिंग यांचा कार्यकाळ तिसऱ्यांदा वाढवण्यात आला आहे. त्यामुळे चीनमधील त्यांची ताकद आणखी मजबूत होणार आहे. त्यांच्या या नियुक्तीमुळे ते आधुनिक चीनचे सर्वात जास्त काळ सत्ता गाजवणारे राज्यकर्ते बनले आहेत. याचा अर्थ असा होतो की, शी यांनी सत्ता चांगली सांभाळली आणि जर कोणी आव्हान दिले नाही तर त्यांचा कार्यकाळ आणखी मोठा होईल.

चीन लष्करावर 18 लाख कोटी खर्च करणार

जिनपिंग यांचा तिसरा कार्यकाळ अशा वेळी सुरू झाला आहे, जेव्हा जगातील दुसरी सर्वात मोठी अर्थव्यवस्था संथ गतीने वाढत आहे. मात्र, या बैठकीत चीन 2023 मध्ये आपल्या संरक्षणावर 18 लाख कोटी रुपये खर्च करणार असल्याचा निर्णय घेण्यात आला आहे. जे भारताच्या संरक्षण बजेटपेक्षा 3 पट जास्त आहे. त्याचबरोबर 2023 साठी चीनच्या आर्थिक विकासाचे लक्ष्य 5 टक्के ठेवण्यात आले आहे.

2012 मध्ये जिनपिंग सत्तेवर आले होते. त्यांच्या आधी राष्ट्राध्यक्ष असलेले सर्व नेते 5 वर्षांच्या दोन टर्मसाठी किंवा वयाच्या 68व्या वर्षी निवृत्त होत असत. 2018 मध्ये, चीनने राष्ट्राध्यक्षपदाची 2-टर्मची मर्यादा रद्द केली. यानंतर जिनपिंग आता चीनचे सर्वात शक्तिशाली नेते बनले आहेत.