मनी मॅटर्स : आर्थिक फसवणुकीला तसेच सायबर गुन्ह्यांना बळी पडू नका

By, Sachin Deshmukh - December 28, 2021 08:05:43

0

गेल्या काही वर्षात सायबर गुन्ह्यांचे प्रमाण फार वाढलेले आहे. आर्थिक फसवणुकीचे गुन्हे अनेक प्रकारचे असतात. फसवणुकीला बळी पडणाऱ्या व्यक्ती श्रीमंत, गरीब, सुशिक्षित, अडाणी अशा कोणत्याही प्रकारच्या असू शकतात. प्रत्येकाची कथा वेगळी, प्रत्येकाच्या समस्याही वेगळ्या. प्रत्येकालाच वाटत असते की माझेच दुःख मोठे आहे. पण दुःखाची ही भावनाच गुन्हेगारांचे प्रमुख हत्यार आहे. सावज हेरताना गुन्हेगार सर्वात आधी त्याची दुखरी नस ओळखतो आणि बरोबर त्यावरच फुंकर मारतो.Don’t fall victim to financial fraud as well as cyber crime

त्यामुळे होणारी फसवणूक टाळण्यासाठी कायम खबरदारीचे उपाय माहिती हवेत. व्यक्तिगत समस्या सर्वसामान्यपणे व्यक्तीच्या भावनिक बाजूसही निगडित असतात. सोशल मीडिया हा सायबर गुन्हेगारांचा प्रमुख अड्डा आहे. सोशल नेटवर्किंग साईटवर सतत सक्रिय असणारे, छोट्याशा कौतुकाने भाळणारे, स्वप्नांच्या विश्वात वावरणारे, स्वतःला एकाकी समजणारे अनेक दुःखी चेहरे या समस्येने ग्रस्त असतात. केवळ सोशल मीडियामुळेच नव्हे तर, वास्तवातही अशा व्यक्ती सहजपणे गुन्हेगारांच्या जाळ्यात अडकतात.

यातून वाचण्यासाठी सावधगिरी कशी बाळगायची याची माहिती हवी. यासाठीच आपल्या कौटुंबिक समस्या, निकटवर्तीयांवरचा क्षणिक राग, दुःख या गोष्टी शक्यतो अगदी जवळच्या व खात्रीच्या व्यक्ती सोडून कोणालाही सांगू नका. आवश्यकता वाटल्यास कौटुंबिक सल्लागाराचा सल्ला घ्या. विनाकारण उठसूठ कोणालाही आपल्या समस्या सांगत बसू नका. कारण यानिमित्ताने तुमच्या जवळ यायची संधी तुम्ही अपरिचित लोकांना देत असता.

यातून लोक तुमच्या आर्थिक परिस्थीतीचा, अडचणींचा अंदाज बांधतात आणि दुखरी नस ओळखून बरोबर गैरफायदा उठवतात. सायबर गुन्हेगार तर नेहमी याचा अभ्यास करीत असतात. कोणालाही बॅंकेच्या अकाउंटची, एटीएमच्या पिनची माहिती कदापी देवू नका. नेट बॅंकिग करीत असाल तर कोणालाही त्याचा पासवर्ड सांगू नका. अर्थात विविध बॅंका ही माहिती नेहमी देतच असतात. मात्र तरीही मानवी स्वभाव विचित्र असतो. त्यामुळे कळते पण वळत नाही असी स्थिती होते. अनेक जण एटीएममध्ये जातात आणि माहिती नसल्याने कार्ड चक्क दुसऱ्याला ऑपरेट करण्यास देतात. हे फार धोक्याचे असते. त्यामुळे अशा गोष्टी कधीही करू नका.