पाकिस्तानात राजकीय संकट : इम्रान खान यांचा आपल्या खासदारांना आदेश, अविश्वास ठरावावर मतदानाच्या दिवशी गैरहजर राहा!

By, Sachin Deshmukh - March 30, 2022 10:15:54

0

आपल्या सत्तेवर आलेल्या संकटाचा सामना करत असलेले पाकिस्तानचे पंतप्रधान इम्रान खान यांनी त्यांचा पक्ष पाकिस्तान तहरीक-ए-इन्साफ (पीटीआय) च्या खासदारांना अविश्वास ठरावाच्या दिवशी नॅशनल असेंब्लीतून दूर राहण्यास सांगितले आहे. पाकिस्तानच्या विरोधी पक्षांनी पंतप्रधान इम्रान खान यांच्या सरकारविरोधात अविश्वास प्रस्ताव आणला आहे, ज्यावर एप्रिलच्या पहिल्या आठवड्यात मतदान होण्याची शक्यता आहे.Political Crisis in Pakistan Imran Khan orders his MPs to abstain on polling day on no-confidence motion!

वृत्तसंस्था

इस्लामाबाद : आपल्या सत्तेवर आलेल्या संकटाचा सामना करत असलेले पाकिस्तानचे पंतप्रधान इम्रान खान यांनी त्यांचा पक्ष पाकिस्तान तहरीक-ए-इन्साफ (पीटीआय) च्या खासदारांना अविश्वास ठरावाच्या दिवशी नॅशनल असेंब्लीतून दूर राहण्यास सांगितले आहे. पाकिस्तानच्या विरोधी पक्षांनी पंतप्रधान इम्रान खान यांच्या सरकारविरोधात अविश्वास प्रस्ताव आणला आहे, ज्यावर एप्रिलच्या पहिल्या आठवड्यात मतदान होण्याची शक्यता आहे.

विरोधी पक्षांनी सोमवारी नॅशनल असेम्बलीमध्ये अविश्वास ठराव मांडला. 2018 मध्ये सत्तेवर आल्यानंतर इम्रान खान यांची सर्वात मोठी राजकीय परीक्षा आहे. त्यांच्यासाठीही संकट मोठे आहे, कारण त्यांच्याच पक्षात मतभेद असल्याच्या बातम्या आल्या आहेत आणि सरकार स्थापन करण्यात मदत करणाऱ्या काही राजकीय पक्षांनीही इम्रानपासून दुरावा केला आहे.

इम्रान खान यांची सत्तेसाठी टिच्चून गोलंदाजी सुरू; अविश्वास ठरावावर ३१ मार्च रोजी मतदान

पीटीआयच्या खासदारांना लिहिलेल्या पत्रात इम्रान खान म्हणाले की, ज्या तारखेला या ठरावावर मतदान होणार आहे, त्या तारखेला नॅशनल असेंब्लीमधील सर्व पीटीआय खासदारांनी बैठकीपासून आणि मतदानापासून दूर राहावे. सर्व सदस्यांनी या सूचनेचे प्रामाणिकपणे पालन करावे आणि देशाच्या संविधानातील कलम ६३ (अ) मधील तरतुदीमागील कारण समजून घ्यावे, असे ते म्हणाले.

अविश्वास प्रस्तावामुळे कोणत्याही पंतप्रधानाची गेली नाही सत्ता

पाकिस्तानच्या इतिहासात आजपर्यंत एकाही पंतप्रधानाला अविश्वास प्रस्तावाद्वारे सत्तेवरून हटवण्यात आलेले नाही. अविश्वास प्रस्तावाच्या आव्हानाला सामोरे जाणारे इम्रान खान हे तिसरे पंतप्रधान आहेत. देशाचे अंतर्गत व्यवहार मंत्री शेख रशीद यांनी म्हटले आहे की, नॅशनल असेंब्ली 3 एप्रिल रोजी पंतप्रधान इम्रान यांच्याविरोधात विरोधकांच्या अविश्वास प्रस्तावावर मतदान करू शकते.

इम्रान यांना बहुमतासाठी 172 मतांची गरज

पाकिस्तानच्या 342 सदस्यांच्या नॅशनल असेंब्लीमध्ये इम्रान खान यांच्या पक्ष पीटीआयकडे केवळ 155 जागा आहेत. इम्रान खान यांना पंतप्रधानपदी राहण्यासाठी 172 मतांची गरज आहे आणि त्यांना हटवण्यासाठी विरोधकांची 172 मतांची गरज आहे. दुसरीकडे, विरोधी पक्षांनी दावा केला आहे की त्यांना इम्रान खान यांचे सरकार पाडण्यासाठी आवश्यक असलेल्या नॅशनल असेंब्लीच्या 172 सदस्यांचा पाठिंबा आहे.