Kolkata : ‘आंदोलनाच्या नावाखाली बॉयफ्रेंडसोबत फिरतात’, कोलकात्यातील आंदोलक डॉक्टरांवर टीएमसी खासदाराचे वादग्रस्त वक्तव्य

By, Pravin Wankhade - August 20, 2024 09:00:13

0

वृत्तसंस्था

कोलकाता : कोलकाता ( Kolkata ) येथील आरजी कार मेडिकल कॉलेज आणि हॉस्पिटलमध्ये प्रशिक्षणार्थी डॉक्टरवर बलात्कार करून तिची हत्या झाल्याच्या घटनेने सर्वसामान्यांमध्ये खळबळ उडाली आहे. देशभरातील रुग्णालयातील डॉक्टर आणि आरोग्य कर्मचारी या घृणास्पद घटनेचा निषेध करत आहेत. बांकुराचे तृणमूल काँग्रेसचे खासदार अरुप चक्रवर्ती यांनी या आंदोलनाबाबत वादग्रस्त विधान केले आहे.

तृणमूल काँग्रेसचे खासदार अरुप चक्रवर्ती म्हणाले की, मुख्यमंत्र्यांना बदनाम करण्याचा कोणताही प्रयत्न केल्यास त्याचे गंभीर परिणाम होतील. सध्या सुरू असलेल्या आंदोलनात सहभागी होणाऱ्या डॉक्टरांना जनतेच्या रोषाला सामोरे जावे लागू शकते, असा इशाराही त्यांनी दिला आहे. वैद्यकीय काम करण्याऐवजी डॉक्टर घरी जात असतील आणि आंदोलनाच्या नावाखाली डॉक्टर आपल्या बॉयफ्रेंडसोबत बाहेर पडत असतील तर नक्कीच जनक्षोभ होईल, असेही ते म्हणाले.

Eknath shinde : मुख्यमंत्र्यांसाठी एक कोटी राख्यांचा संकल्प, राज्यातील बहिणींची कृतज्ञता

रुग्णालयातील सेवा विस्कळीत राहिल्यास संताप पसरू शकतो

माचांतला येथील रॅलीत चक्रवर्ती यांनी विरोधकांच्या निदर्शनांवर टीका केली आणि आंदोलन करणाऱ्या कनिष्ठ डॉक्टरांना कामावर परतण्याचा इशारा दिला. रुग्णालयातील सेवा विस्कळीत होत राहिल्यास लोकांमध्ये रोष पसरू शकतो, असा इशाराही त्यांनी दिला. त्यांनी पोलिसांच्या एका विभागावर विरोधकांना पाठिंबा दिल्याबद्दल निंदा केली आणि त्यांना राज्य सरकारच्या सूचनांचे पालन करण्याचे आवाहन केले. तसेच जनक्षोभ भडकू शकतो, रुग्णांचे बळी गेले तर जनतेत रोष निर्माण होईल, असेही म्हटले. ते म्हणाले की, उपचाराविना रुग्णाचा मृत्यू झाला तर रुग्णाचे कुटुंबीय तुम्हाला सोडतील का?”

सीपीएमने चक्रवर्ती यांच्या वक्तव्याचा तीव्र निषेध केला

त्यांनी पोलिसांनाही धारेवर धरले. काही पोलिस असे आहेत जे निष्पक्षपणे काम करत नाहीत. ते सरकारच्या अंतर्गत काम करतात, याची आठवणही त्यांनी करून दिली. हे त्यांनी ध्यानात ठेवावे. आमच्याकडे अशा बातम्या आहेत आणि आम्ही उच्च स्तरावर तक्रार करू. त्याचवेळी सीपीएमने चक्रवर्ती यांच्या वक्तव्याचा तीव्र शब्दांत निषेध केला आहे आणि जनक्षोभाच्या पार्श्वभूमीवर विरोधक, आंदोलक डॉक्टर आणि अगदी पोलिसांसह प्रत्येकजण विरोधक म्हणून पाहत असल्याचा आरोप त्यांच्यावर केला आहे.

काय आहे प्रकरण?

9 ऑगस्ट 2024 रोजी कोलकाता येथील आरजी कार मेडिकल कॉलेज आणि हॉस्पिटलच्या सेमिनार हॉलमध्ये पोस्ट ग्रॅज्युएट प्रशिक्षणार्थी डॉक्टर मृतावस्थेत आढळली होती. बलात्कारानंतर तिची हत्या करण्यात आली. या घटनेमुळे संपूर्ण देशात संतापाची लाट उसळली असून, त्यानंतर देशभरात निषेध व्यक्त होत आहे. कोलकात्यात वैद्यकीय क्षेत्राशी निगडित अनेक लोक न्यायाची मागणी करत आहेत.

कोलकाता बलात्कार-हत्या प्रकरणातील आरोपी संजय रॉयची पॉलीग्राफी चाचणी करण्याची परवानगी सीबीआयला मिळाली आहे. तपास यंत्रणेने न्यायालयात अर्ज दाखल केला होता. याआधी एजन्सीने आरोपीची मानसिक चाचणी केली होती. आता पॉलीग्राफी चाचणीद्वारे आरोपी किती खोटे बोलतोय आणि किती सत्य आहे हे कळू शकणार आहे. सीबीआयला रुग्णालयाचे माजी प्राचार्य संदीप घोष यांचीही पॉलीग्राफी चाचणी करायची आहे.