ऑनलाईन प्रेम प्रकरणाचा भयानक शेवट; ‘ISI’च्या षडयंत्रात अडकलेल्या विद्यार्थ्याला हेरगिरीच्या आरोपात जावे लागले तुरुंगात!

By, Sachin Sutar - May 1, 2023 02:25:09

0

दिल्लीतील पाकिस्तानी उच्चायुक्तालयाचे अधिकारीदेखील षडयंत्रात आढळले सहभागी

विशेष प्रतिनिधी

नवी दिल्ली : पुण्यातील एक विद्यार्थी २००५ मध्ये इंटरनेटवर ओळख झालेल्या फातिमा या पाकिस्तानी मुलीशी चॅटिंग करताना, तिच्या प्रेमात पडला. याच्या दोन वर्षांनंतर, ऑनलाइन चॅट, शेकडो फोन कॉल्स, पाकिस्तानच्या दोन सहली आणि इस्लाम धर्म स्वीकारण्याचे वचन यातून सुरू झालेले प्रेमप्रकरण अखेर विशाल या विद्यार्थ्याला हेरगिरी प्रकरणात अटक होऊन, सात वर्षांच्या तुरुंगवासाची शिक्षा झाल्याने संपले. Terrible End of Online Love Affair A student involved in the conspiracy of ISI had to go to jail on charges of espionage

आयएसआय एजंट आणि पाकिस्तान उच्चायुक्तालयातील दोन अधिकार्‍यांशी संबंध असल्याच्या प्रकरणाने पुणे पोलिसांनी परराष्ट्र मंत्रालयाकडे मदत मागितली होती. सोळा वर्षांनंतर, कथित ISI एजंट सल्लाहुद्दीन शा आणि त्याची मुलगी फातिमा शा यांचे नाव २००७च्या हेरगिरी प्रकरणामध्ये अजूनही ‘वॉन्टेड’ म्हणून नमूद आहे.

झारखंडमधील मध्यमवर्गीय कुटुंबातून आलेला विशाल २००४ मध्ये शिक्षणासाठी पुण्यात आला होता आणि अटक झाली त्यावेळी तो हडपसर कॉलेजमध्ये शिकत होता. २००५ मध्ये विशालचा याहू मेसेंजरच्या माध्यमातून एका तरुणीशी संपर्क झाला. तिने स्वत:ची ओळख पाकिस्तानातील कराची शहरातील “फातिमा सलाहुद्दीन शाह” अशी सांगितली. पोलिसांनी सांगितले की तो फातिमाशी चॅट करण्यासाठी इंटरनेट कॅफेमध्ये जात असे आणि ते दररोज तासनतास गप्पा मारत असत. दोघांनी त्यांच्या कुटुंबाचे तपशील एकमेकांना सांगितले होते आणि पोलीस रेकॉर्डनुसार, फातिमाने सलाहुद्दीन हा निवृत्त पाकिस्तानी लष्करी अधिकारी असल्याचे सांगितले होते.

इस्लाम धर्म स्वीकारण्याची अट –

कालांतराने विशाल फातिमाच्या प्रेमात पडला आणि त्याने तिच्यासमोर लग्नासाठी प्रस्ताव ठेवला, ज्यावर फातिमा देखील तयार झाली. पोलीस रेकार्डनुसार तिने मग एक पाकिस्तानी फोन नंबर त्याला पाठवला होता. ज्यावर विशाल स्थानिक एसटीडी बुथवरून तिला फोन करायचा, ज्याच्या बिलाची रक्कम तब्बल दीड लाख रुपये आली होती, ही माहिती एसटीडी बुथ चालकाने पोलिसांना दिली. तर विशालने केवळ ४० हजार रुपयेच भरले होते अशी माहिती पोलिसांनी दिली. तसेच, विशालने पाकिस्तानातील फातिमाच्या आई-वडिलांशीही फोनवर संपर्क साधला. पोलिसांच्या नोंदी सांगतात की त्यांनी सुरुवातीला त्यांच्या लग्नाचा प्रस्ताव नाकारला, पण नंतर इस्लाम धर्म स्वीकारण्याच्या अटीवर सहमती दर्शवली. फातिमा आणि तिच्या वडिलांनी विशालला पाकिस्तानला बोलावले होते आणि लग्नानंतर तो लंडनमध्ये स्थायिक होऊ शकतो व तेथे व्यवसाय सांभाळू शकतो, असे सांगून तिच्या वडिलांनी त्याला भुरळ घातली होती.

पाकिस्तानला दोनदा जाऊन आला –

विशालने पाकिस्तानच्या व्हिसासाठीही अर्ज केला पण त्याचा अर्ज फेटाळण्यात आला. पोलिसांनी दिलेल्या माहितीनुसार, सलाहुद्दीनने त्याला नवी दिल्लीतील पाकिस्तानी उच्चायुक्तालयातील कर्मचारी सय्यद एस हुसेन तिरमिझीचा संपर्क क्रमांक दिला. तिरमिझी आणि पाकिस्तान उच्चायुक्तालयातील आणखी एक कर्मचारी जावेद उर्फ अब्दुल लतीफ यांचीही या प्रकरणात प्रतिवादी आणि सह-षड्यंत्रकार म्हणून नावे आहेत. विशालने तिरमिझी यांना फोन करून त्याची कागदपत्रे दिल्याचा आरोप आहे. या काळात तो दिल्लीच्या पहाडगंज भागातील एका वसतिगृहात राहून फातिमा आणि तिच्या वडिलांकडून पैसे घेत असे. पुणे पोलिसांनी ऑगस्ट ते डिसेंबर २००६ दरम्यान अशा नऊ आर्थिक व्यवहारांचा तपशील न्यायालयासमोर सादर केला. तिरमिझी आणि लतीफ यांनी पाकिस्तानात जाण्यासाठी व्हिसाची व्यवस्था केली होती, असे पोलिसांनी सांगितले. चौकशीत असे दिसून आले की विशालने दोनदा पाकिस्तानला भेट दिली १४ ऑक्टोबर २००६ रोजी चार दिवसांसाठी आणि पुन्हा २३ जानेवारी २००७ रोजी दोन आठवड्यांपेक्षा जास्त काळ होता.

हेरगिरीच्या आरोपाखाली अटक –

या प्रकरणातील तपास अधिकारी आणि पुणे शहर गुन्हे शाखेचे तत्कालीन पोलिस निरीक्षक भानुप्रताप बर्गे यांनी सांगितले होते की, “आम्हाला माहिती मिळाली की विशाल पाकिस्तानातून परतला होता आणि पुण्यात व आसपासच्या लष्करी संस्था, धार्मिक स्थळांची छायाचित्रे असलेली काही वर्गीकृत कागदपत्रे आणि सीडी घेऊन गेला होता. आम्हाला माहिती होती की तो पाकिस्तानमधील कोणाला तरी महत्त्वाची माहिती देण्याचा विचार करत होता, म्हणून आम्ही पाळत ठेवणे सुरू केले.” यानंतर विशालला पुणे शहर पोलिसांनी ८ एप्रिल २००७ रोजी हेरगिरीच्या आरोपाखाली अटक करण्यात आली.

तपासादरम्यान पुण्यातील नॅशनल डिफेन्स अॅकॅडमी (एनडीए), बॉम्बे इंजिनिअरिंग ग्रुप (बीईजी), सदर्न कमांड इत्यादी विविध लष्करी संस्थांच्या इमारतींचे फोटो असलेल्या सीडी पोलिसांनी जप्त केल्या. याचबरोबर त्यांनी प्रसिद्ध श्रीमंत दगडूशेठ गणपती मंदिर, शहरातील संघकार्यालय मोतीबाग या सारख्या संवेदनशील स्थळांची छायाचित्रेही जप्त केली होती. याशिवाय पोलिसांनी सांगितले की त्यांच्याकडे लष्करी अधिकाऱ्यांच्या फोन नंबरच्या फोटोकॉपी, फातिमाचे फोटो आणि सलाहुद्दीन शाह यांना उद्देशून लिहिलेला लिफाफाही जप्त करण्यात आला होता.

विशालचा सहभाग षडयंत्रच्या खोलापर्यंत होता –

पोलिसांनी सांगितले की, पुणे शहर पोलिसांनी पाकिस्तान उच्चायुक्तालयातील कर्मचाऱ्यांच्या भूमिकेची चौकशी करण्यासाठी परराष्ट्र मंत्रालयाच्या अधिकाऱ्यांची मदत घेतली, परंतु त्यांच्यावर कोणतीही कारवाई होऊ शकली नाही. जुलै २००७ मध्ये पोलिसांनी विशालविरुद्ध पुणे न्यायालयात आरोपपत्र दाखल केले. त्याने आरोप फेटाळून लावले आणि सांगितले की मी दोनदा पाकिस्तानला भेट दिली परंतु केवळ प्रेमप्रकरणामुळे. तथापि, न्यायालयाने सांगितले की, पुराव्यांवरून असे दिसून आले आहे की विशालचा सहभाग षडयंत्रच्या खोलापर्यंत होता.

सात वर्षांच्या कारावासाची शिक्षा –

२९ मार्च २०११ रोजी मुख्य न्यायाधीश सुचित्रा गोडकी यांच्या न्यायालयाने विशालला इराकी दंड संहितेच्या कलम 120B आणि OSA च्या कलमांखाली दोषी ठरवले आणि त्याला सात वर्षांच्या कारावासाची शिक्षा सुनावली. येरवाडा मध्यवर्ती कारागृहात शिक्षा भोगल्यानंतर त्याची सुटका करण्यात आल्याचे पोलिसांनी सांगितले. ही एक हायप्रोफाईल केस होती. तपासादरम्यान, आम्ही केंद्रीय यंत्रणेशी समन्वय साधला आणि केवळ ISIच नाही तर दिल्लीतील पाकिस्तानी उच्चायुक्तालयाचे अधिकारी देखील भारतविरोधी कारवाया कशा करत आहेत हे उघड केले.