सलमान खानने सांगितले लॉरेन्स बिश्नोई त्याला का धमकावत आहे?

By, Pravin Pawar - July 9, 2024 10:00:29

0

आरोपपत्रातील निवेदनातून केले आहेत अनेक खुलासे

विशेष प्रतिनिधी

मुंबई : एप्रिलमध्ये अभिनेता सलमान खानच्या वांद्रे येथील निवासस्थानावर झालेल्या गोळीबारप्रकरणी मुंबई पोलिसांनी सोमवारी विशेष न्यायालयात आरोपपत्र दाखल केले. त्यानुसार सलमान खानने आपल्या वक्तव्यात म्हटले आहे की, आपण काहीही चुकीचे केले नाही, तरीही त्याला आणि त्याच्या संपूर्ण कुटुंबाला टार्गेट करून त्रास दिला जात आहे.Salman Khan says why is Lawrence Bishnoi threatening him

आरोपपत्रानुसार, सलमानचे म्हणणे आहे की गँगस्टर लॉरेन्स बिश्नोई त्याच्याकडून पैसे उकळण्यासाठी हे करत आहे. अशा अनेक घटनाही त्याने पोलिसांना सांगितल्या, जिथे त्याला धमक्या आल्या. बिश्नोई टोळीच्या सततच्या धमक्यांमुळे त्याचे कुटुंब भयभीत होते असे त्याला वाटत असल्याचे सलमानने सांगितले.

सलमान खानच्या पनवेल फार्महाऊसवरून महिलेला अटक; लग्नासाठी आली होती क्रेझी फॅन

या वर्षी 14 एप्रिल रोजी सकाळी वांद्रे येथील सलमान खानच्या गॅलेक्सी अपार्टमेंटबाहेर दोन मोटरसायकलस्वारांनी चार गोळ्या झाडल्या होत्या. मुंबई पोलिसांनी दाखल केलेल्या आरोपपत्रात 6 अटक आरोपी आणि तुरुंगात बंद गँगस्टर लॉरेन्स बिश्नोईसह 3 वाँटेड व्यक्तींची नावे आहेत. गुन्हे शाखेने विशेष मकोका न्यायालयात दाखल केलेल्या 1,735 पानांच्या आरोपपत्रात तीन खंडांमध्ये तपासाची विविध कागदपत्रे आहेत.

आरोपपत्रातील पुराव्यामध्ये 46 साक्षीदारांचे जबाब आणि CrPC कलम 164 अन्वये दंडाधिकाऱ्यांसमोर नोंदवलेल्या साक्षीदारांच्या जबाबांचा समावेश आहे. याशिवाय, MCOCA (महाराष्ट्र संघटित गुन्हेगारी नियंत्रण) कायद्यांतर्गत कबुली जबाब, एकूण 22 पंचनामे आणि तांत्रिक पुरावे देखील आरोपपत्राचा भाग आहेत.

मुंबई क्राइम ब्रँचने दाखल केलेल्या आरोपपत्रात म्हटले आहे की, गँगस्टर लॉरेन्स बिश्नोईचे लक्ष्य भारताच्या उत्तर-पश्चिम भागात यशस्वी झाल्यानंतर महाराष्ट्रात वर्चस्व प्रस्थापित करणे हे होते. बिश्नोईने पैसे उकळण्यासाठी आणि त्याचे खंडणी रॅकेट पुढे नेण्याच्या उद्देशाने भीती निर्माण करण्यासाठी सलमान खानला लक्ष्य केले.