उझबेकिस्तानातील वैद्यकीय विद्यार्थिनीच्या मृत्यूची राष्ट्रीय महिला आयोगाने घेतली स्वतःहून दखल

By, wankhadepravin - July 12, 2026 09:26:23

0

विशेष प्रतिनिधी

नवी दिल्ली: उझबेकिस्तानमध्ये शिक्षणासाठी गेलेल्या केरळमधील 21 वर्षीय वैद्यकीय विद्यार्थिनी सावरिया बसंथ हिच्या कथित छळ आणि हत्येच्या प्रकरणाची राष्ट्रीय महिला आयोगाने (NCW) स्वतःहून (Suo Motu) दखल घेतली आहे.

मृत्यूपूर्वी तिच्यावर शारीरिक अत्याचार, सातत्याने छळ तसेच जबरदस्तीने धर्मांतर करण्याचा प्रयत्न झाल्याचे गंभीर आरोप समोर आल्याने आयोगाने तीव्र चिंता व्यक्त केली आहे.

या प्रकरणाची सखोल आणि जलद चौकशी व्हावी, यासाठी राष्ट्रीय महिला आयोगाने केरळचे पोलीस महासंचालक (DGP) यांना पत्र पाठवले आहे. या पत्रात परराष्ट्र व्यवहार मंत्रालय (MEA) आणि ताश्कंद येथील भारतीय दूतावासाशी समन्वय साधण्याचे निर्देश देण्यात आले आहेत. तसेच या प्रकरणातील सर्व महत्त्वाचे पुरावे सुरक्षित ठेवणे, उपलब्ध कायदेशीर आणि प्रत्यार्पणासंदर्भातील पर्यायांची तपासणी करणे आणि मृत विद्यार्थिनीच्या कुटुंबाला आवश्यक ती सर्व मदत उपलब्ध करून देण्याच्या सूचना आयोगाने केल्या आहेत.

CM Devendra Fadnavis : विनाअट सरसकट शेतकरी कर्जमाफी जाहीर; शेतकऱ्यांना 2 लाखांपर्यंत कर्जमाफी मिळणार, 56 लाख शेतकऱ्यांना लाभ – CM देवेंद्र फडणवीस

या प्रकरणात आतापर्यंत झालेल्या कारवाईचा सविस्तर अॅक्शन टेकन रिपोर्ट (ATR) सात दिवसांच्या आत सादर करण्याचे आदेशही महिला आयोगाने केरळच्या पोलीस महासंचालकांना दिले आहेत.

याशिवाय, उझबेकिस्तानमधील भारतीय राजदूतांनाही आयोगाने पत्र पाठवून स्थानिक प्रशासनाशी समन्वय साधण्याचे, आवश्यक कायदेशीर मदत उपलब्ध करून देण्याचे आणि तपास प्रक्रियेस पूर्ण सहकार्य करण्याचे आवाहन केले आहे.

राष्ट्रीय महिला आयोगाने आपल्या निवेदनात म्हटले आहे की, या प्रकरणात पीडितेला न्याय मिळावा यासाठी भारतातील उपलब्ध सर्व कायदेशीर आणि राजनैतिक मार्गांचा अवलंब केला जाईल. तसेच मृत विद्यार्थिनीच्या कुटुंबाला न्याय मिळवून देण्यासाठी आयोग कटिबद्ध असल्याचेही स्पष्ट करण्यात आले आहे.