लखनऊच्या कोर्टात मुख्तार गँगचा शूटर जीवाची हत्या : वकिलाच्या पेहरावातील हल्लेखोराला अटक, सीएम योगींनी स्थापन केली एसआयटी

By, Pravin Wankhade - June 8, 2023 07:50:41

0

प्रतिनिधी

लखनऊ : लखनऊच्या कैसरबाग येथील न्यायालयात हजर झालेला गुन्हेगार संजीव माहेश्वरी ऊर्फ जीवा (48) याची बुधवारी दुपारी गोळ्या झाडून हत्या करण्यात आली. हल्लेखोर वकिलाच्या वेशात आला होता. दुपारी 3.50 वाजता त्याने कोर्टात 9 एमएम पिस्तुलातून 5-6 राउंड फायर केले. या हल्ल्यात जीवाचा जागीच मृत्यू झाला. गोळीबारात एक मुलगी, तिची आई आणि दोन पोलीस जखमी झाले आहेत. जीवा हा मुख्तार अब्बास टोळीचा कुख्यात शूटर होता. Mukhtar gang shooter jiva killed in Lucknow court

घटनेनंतर घटनास्थळावरून पळून जाणाऱ्या हल्लेखोराला वकिलांनी पकडले. त्याला मारहाण केली. पोलिसांनी कशीतरी वकिलांच्या हातून त्याची सुटका केली. विजय यादव असे हल्लेखोराचे नाव आहे. तो जौनपूरचा रहिवासी आहे. त्याने जीवाला का मारले? याबाबत अद्याप काहीही माहिती समोर आलेली नाही. न्यायालयाचे छावणीत रूपांतर झाले आहे. या घटनेनंतर वकिलांमध्ये खळबळ उडाली. त्यांची पोलिसांशी बाचाबाची झाली. अनेक पोलिसांना गेटमधून बाहेर काढल्यानंतर गेट बंद करण्यात आले.

अतीकच्या हत्येनंतर मुख्तार अन्सारीची टरकली; पोलीस बंदोबस्तातही लखनऊ न्यायालयात यायला नकार

मुख्यमंत्री योगी आदित्यनाथ यांनी या घटनेच्या तपासासाठी एसआयटी स्थापन केली आहे. 7 दिवसांत अहवाल मागवला आहे. एडीजी टेक्निकल मोहित अग्रवाल, निलब्जा चौधरी आणि अयोध्या आयजी प्रवीण कुमार यांचा एसआयटीमध्ये समावेश करण्यात आला आहे. यापूर्वी 15 एप्रिल रोजी प्रयागराजमध्ये माफिया अतिक अहमद आणि त्याचा भाऊ अशरफ यांची पोलिस बंदोबस्तात असताना हत्या करण्यात आली होती. म्हणजेच 53 दिवसांतील पोलीस कोठडीतील ही तिसरी हत्या आहे.

संजीव जीवा पोलिस कोठडीत होता, 4 ते 5 गोळ्या झाडल्या

प्रत्यक्षदर्शींनी दिलेल्या माहितीनुसार, ही संपूर्ण घटना दुपारी 3.50 ते 3.55 या 5 मिनिटांच्या दरम्यान घडली. जॉईंट सीपी उपेंद्र अग्रवाल म्हणाले, “पोलिसांनी संजीव जीवाला ताब्यात घेतले आणि एससी/एसटी कोर्टात पोहोचले. ते सुनावणीची वाट पाहत होते. कोर्टात प्रवेश करताच मागून गोळ्या झाडण्यात आल्या. तेथे उपस्थित हल्लेखोराने जीवाला लक्ष्य करत गोळीबार सुरू केला. त्यामुळे तेथे एकच पळापळ उडाली होती. कोर्टात जीवा जमिनीवर कोसळला.

हल्लेखोर विजय यादवला पकडल्यानंतर वकिलांनी त्याला बेदम मारहाण केल्याचे सांगण्यात येत आहे. त्यानंतर हत्येचे कारण विचारले असता त्याने जीवाला मारण्यासाठी आलो असल्याचे सांगितले. जीवा आणि हल्लेखोर विजय यांचा थेट संबंध पोलिसांना अद्याप सापडलेला नाही. न्यायालयातील सुरक्षेतील त्रुटींबाबत विचारलेल्या प्रश्नावर जॉइंट सीपी म्हणाले, “सुरक्षेत त्रुटी आहे की नाही हे आम्ही नंतर पाहू. तूर्तास, घटनेचा खुलासा करणे आवश्यक आहे.”