थरारक सामन्यात वेस्ट इंडिजचा बांगलादेशवर चार धावांनी दणदणीत विजय

By, Pravin Wankhade - March 18, 2022 02:30:23

0

भारताला मागे टाकत गुणतालिकेत तिसऱ्या स्थानावर पोहोचला

विशेष प्रतिनिधी

माउंट मनगनुई : महिला विश्वचषकात वेस्ट इंडिज संघाने तिसरा सामना जिंकला आहे. या विजयासह विंडीजचे पाच सामन्यांतून सहा गुण झाले असून गुणतालिकेत संघ तिसऱ्या स्थानावर पोहोचला आहे.
In a thrilling match, West Indies beat Bangladesh by four runs Reached third place in the table behind India

बांगलादेशविरुद्धच्या पाचव्या सामन्यात वेस्ट इंडिजने चार धावांनी रोमहर्षक विजयाची नोंद केली आहे. या सामन्यात वेस्ट इंडिजने प्रथम फलंदाजी करत 140 धावा केल्या, त्याला प्रत्युत्तर म्हणून बांगलादेशचा संघ 136 धावांवर ऑलआऊट झाला. पुन्हा एकदा अखेरच्या षटकात धावांचा बचाव करत विंडीजने विजय मिळवला आहे. याआधी कॅरेबियन संघाने इंग्लंड आणि न्यूझीलंडविरुद्ध अखेरच्या षटकात रोमांचक विजयाची नोंद केली होती.

वेस्ट इंडिजच्या या विजयामुळे भारताच्या अडचणी वाढल्या आहेत. उपांत्य फेरी गाठण्यासाठी भारताला आता तीनपैकी दोन सामने जिंकावे लागतील आणि स्पर्धेत आतापर्यंत अपराजित राहिलेल्या ऑस्ट्रेलिया किंवा दक्षिण आफ्रिकेला पराभूत करावे लागेल.

वेस्ट इंडिजच्या फलंदाजांचा फ्लॉप शो

नाणेफेक हरल्यानंतर फलंदाजीचा निर्णय घेतलेल्या वेस्ट इंडिजची सुरुवात खराब झाली. डॉटिन आणि मॅथ्यूजने पहिल्या विकेटसाठी 29 धावांची भागीदारी केली. यानंतर वेस्ट इंडिजचे फलंदाज एक एक करून पॅव्हेलियनमध्ये परतले आणि संपूर्ण संघ 140 धावांत गारद झाला. वेस्ट इंडिजकडून विकेटकीपर कॅम्पबेलने 53 धावा केल्या. त्यांच्याशिवाय डॉटिनने 17, मॅथ्यूजने 18 आणि फ्लेचरने 17 धावा केल्या. याशिवाय एकाही कॅरेबियन फलंदाजाला दुहेरी आकडा स्पर्श करता आला नाही.

बांगलादेशकडून सलमा खातून आणि नाहिदा अख्तरने प्रत्येकी दोन गडी बाद केले. तर रितू मोनी, रुमाना अहमद आणि जहाँआरा आलम यांना प्रत्येकी एक विकेट मिळाली.

गोलंदाजांच्या जोरावर विंडीजने विजय मिळवला

140 धावांच्या सोप्या लक्ष्याचा पाठलाग करताना बांगलादेशची सुरुवात अत्यंत खराब झाली आणि एका धावेवर संघाची पहिली विकेट पडली. यानंतर शर्मीन अख्तर आणि फरगाना हक यांनी उपयुक्त खेळी करत संघाची धावसंख्या 60 पर्यंत नेली पण नंतर वेस्टइंडिजने 60 धावांवर बांगलादेशचा अर्धा संघ पॅव्हेलियनमध्ये पाठवला. मात्र, बांगलादेशच्या शेपटीच्या फलंदाजांचा संघर्ष सुरूच राहिला, मात्र अखेरच्या षटकात कर्णधार टेलरने पुन्हा एकदा लक्ष्याचा बचाव केला.

बांगलादेशकडून कर्णधार सुलताना आणि नादिया अख्तरने 25-25 धावा केल्या. तर फरगाना हक आणि सलमा खातून यांनी 23-23 धावा केल्या. शर्मीन अख्तरने 17 धावा केल्या. वेस्ट इंडिजकडून मॅथ्यूजने चार, फ्लेचर आणि टेलरने प्रत्येकी तीन बळी घेतले.