वर्क फ्रॉम होम ऐकलं होतं, वर्क फ्रॉम जेल पहिल्यांदाच पाहिलं, राजनाथ सिंग यांचा केजरीवालांना टोला!!

By, Pravin Pawar - May 26, 2024 09:11:00

0

विशेष प्रतिनिधी

नवी दिल्ली : कोरोना काळात वर्क फ्रॉम होम ऐकलं. अनेकांनी वर्क फ्रॉम होम केलं, पण वर्क फ्रॉम जेल हे मात्र संपूर्ण देशाने पहिल्यांदाच पाहिलं, अशा परखड शब्दांमध्ये संरक्षण मंत्री राजनाथ सिंह यांनी दिल्लीचे मुख्यमंत्री अरविंद केजरीवाल यांना टोला हाणला.Heard of work from home, saw work from jail for the first time

फतेहगढ साहिबमधील भारतीय जनता पक्षाचे उमेदवार गेझा राम वाल्मिकी यांच्या समर्थनार्थ खन्ना येथे निवडणूक रॅलीला संबोधित करताना सिंह म्हणाले, आम आदमी पार्टी येथे सत्तेवर आहे. ती कोणत्या प्रकारचे काम करत आहे हे तुम्हाला जास्त सांगण्याची गरज नाही. दारू घोटाळ्यात पैसा खाऊन आणि तो पैसा गोवा निवडणुकीत वापरून दिल्लीचे मुख्यमंत्री तुरुंगात गेले. पण तुरुंगात गेल्यानंतरही त्यांच्याकडे नैतिकता नव्हती त्यामुळे त्यांनी मुख्यमंत्री पदाचा राजीनामा दिला नाही ते खुर्चीला चिकटून राहिले.

राजनाथ सिंह म्हणाले की, कोणत्याही नेत्यावर आरोप झाले तर ते आरोपातून मुक्त होईपर्यंत पदाचा राजीनामा देण्याचे नैतिक धैर्य असले पाहिजे. पण केजरीवाल यांना दारू घोटाळ्यात तुरुंगात टाकण्यात आले आहे. त्यानंतरही मुख्यमंत्रीपदावर कायम राहणार असल्याचे ते सांगतात. तुरुंगातून काम करणार असल्याचे ते सांगतात. सर्वोच्च न्यायालयाने केजरीवाल यांना १ जूनपर्यंत अंतरिम जामीन मंजूर केला असून त्यांना २ जून रोजी आत्मसमर्पण करून पुन्हा तुरुंगात जाण्याचे निर्देश दिले आहेत. तुरुंगातूनच दिल्लीचे राज्य चालवण्याचा केजरीवालांचा इरादा दिसतो आहे.

मला कार्यालयातून काम करणे माहिती आहे, मी घरून काम करण्याबद्दल ऐकले आहे, परंतु मी पहिल्यांदाच तुरुंगातून काम ऐकत आहे. केजरीवाल अण्णा हजारेंसोबत आंदोलन करत होते, तेव्हा हजारे यांनी त्यांना सांगितले होते की, हे आंदोलन काँग्रेसच्या भ्रष्टाचाराविरुद्ध असून, त्याचे यश राजकीय फायद्यासाठी वापरू नये आणि कोणताही राजकीय पक्ष काढू नये. पण केजरीवालांनी आपले गुरु अण्णा हजारे यांचा विश्वासघात केला, असा आरोप राजनाथ सिंह यांनी केला.

ते म्हणाले की, पण केजरीवाल यांनी त्यांच्या गुरूचे ऐकले नाही आणि आम आदमी पार्टी स्थापन केली. केजरीवाल यांनी मुख्यमंत्री झालो तर कधीच सरकारी निवासस्थानी राहणार नाही, असे सांगितले होते, असा दावा सिंह यांनी केला. ते म्हणाले, पण नंतर त्यांनी मुख्यमंत्र्यांच्या निवासस्थानाचे शीशमहालमध्ये रूपांतर केले. त्यावर जनतेचा करोडोचा पैसा खर्च केला.

राजनाथ सिंग यांनी केजरीवाल यांच्या निवासस्थानी आपच्या राज्यसभा सदस्य स्वाती मालीवाल यांच्यावर त्यांचे सहकारी बिभव कुमार यांनी केलेल्या कथित हल्ल्याचाही उल्लेख केला. या प्रकरणी कुमारला अटक करण्यात आली आहे.

सिंग म्हणाले की, त्यांना (मालिवाल) खूप मारहाण झाली आणि आता ते (केजरीवाल) देशातील जनतेसमोर भाषण देत आहेत. ते म्हणाले की, मी इतका रागाने का बोलत आहे, असा प्रश्न तुम्हाला पडला असेल. आई, बहीण ही कोणत्याही जातीची, समाजाची किंवा राजकीय संघटनेची असू शकते. आमच्यासाठी ती आई आहे, मुलगी आहे. सिंह म्हणाले की, महिलांचा आदर हा भारतीय संस्कृतीचा महत्त्वाचा भाग आहे. केजरीवाल यांनी १५ दिवस या मुद्द्यावर मौन बाळगल्याचा दावा संरक्षणमंत्र्यांनी केला. तुमच्या पक्षाच्या खासदाराला तुमच्या घरात मारहाण केली जाते आणि तुम्ही गप्प बसता. मला तुम्हाला विचारायचे आहे की अशा व्यक्तीला मुख्यमंत्री राहण्याचा अधिकार आहे का??, असा सवाल राजनाथ सिंग यांनी केला.