Indo-Pak border : BSF भारत-पाक सीमेवर तैनाती वाढवण्याच्या तयारीत; महिला सैनिक करणार पेट्रोलिंग

By, Pravin Wankhade - August 26, 2024 04:00:47

0

वृत्तसंस्था

नवी दिल्ली : पंजाबमधील सीमा सुरक्षा दल (बीएसएफ) ( BSF ) अंमली पदार्थ, दारूगोळा तस्करी आणि घुसखोरी रोखण्यासाठी दक्षता वाढवण्याच्या तयारीत आहे. पठाणकोट परिसरातून दहशतवाद्यांच्या घुसखोरीच्या अंदाजानंतर आता बीएसएफ संवेदनशील भागात आपल्या सैनिकांची संख्या वाढवू शकते. एवढेच नाही तर सीमेवर माऊंटेड सैनिकही तैनात करण्याचा विचार सुरू आहे.

राजस्थान-पाकिस्तान सीमेवर ज्याप्रमाणे सैनिक उंटावर गस्त घालतात, त्याचप्रमाणे पंजाब सीमेवर घोड्यावर स्वार झालेले सैनिक तयार केले जात आहेत. यासाठी महिला सैनिकांच्या तुकडीला विशेष प्रशिक्षणही दिले जात आहे. पठाणकोटमध्ये पाकिस्तानी दहशतवाद्यांच्या घुसखोरीची माहिती मिळाल्यानंतर घुसखोरी रोखण्यासाठी गुरदासपूर सेक्टरमध्ये (अमृतसरमधील अजनाळा ते पठाणकोट) अधिक सैन्य तैनात करण्यात आले.

Jammu and Kashmir : जम्मू-काश्मीर विधानसभा निवडणुकीसाठी भाजपची निम्म्याहून अधिक उमेदवारांची नावे ठरली

500 किमी. 20 बटालियन या परिसराचे संरक्षण करतात

पंजाबमध्ये बीएसएफची 500 किलोमीटरहून अधिक लांबीची सीमा आहे. सध्या पंजाबमध्ये बीएसएफच्या सुमारे 20 बटालियन कार्यरत आहेत. यापैकी 18 सीमेवर तैनात आहेत, तर उर्वरित 2 अमृतसरमधील अटारी एकात्मिक चेक पोस्ट आणि गुरुदासपूर जिल्ह्यातील कर्तारपूर कॉरिडॉर डेरा बाबा नानक येथे आवश्यकतेनुसार तैनात करण्यात आले आहेत.

ड्रोनच्या हालचालीवर लक्ष ठेवण्यासाठी बटालियनची मागणी

बीएसएफच्या एका वरिष्ठ अधिकाऱ्याने सांगितले की, पंजाब सीमेवर ड्रोनच्या हालचालींवर लक्ष ठेवण्यासाठी बीएसएफची बटालियन वाढवण्याची मागणी केंद्राकडे पाठवण्यात आली आहे. 2019 पासून अमृतसर आणि तरनतारन या सीमावर्ती जिल्ह्यांमध्ये ड्रोनची हालचाल लक्षणीयरीत्या वाढली आहे. हे पाहता केंद्रीय गृहमंत्रालयाला या मागणीवर विचार करण्यास सांगितले आहे.

पंजाब आणि दिल्लीच्या अधिकाऱ्यांच्या म्हणण्यानुसार, पंजाब सीमेवरील नदीच्या भागांचे प्रभावीपणे संरक्षण करण्यासाठी आणखी सैन्य तैनात केले जाणार आहे. पंजाब सीमेवर रावी आणि सतलज नद्यांवर 48 कल्व्हर्ट बांधले जात आहेत, त्यापैकी 25 पूर्ण झाले आहेत.