Aam Aadmi Party :दिल्लीत MCD स्थायी समिती निवडणुकीपूर्वी ‘आप’ला मोठा धक्का!

By, Pravin Wankhade - September 25, 2024 06:28:51

0

दोन नगरसेवकांचा भाजपमध्ये प्रवेश.

विशेष प्रतिनिधी

नवी दिल्ली : दिल्ली महानगरपालिकेच्या (एमसीडी) उद्या होणाऱ्या अत्यंत महत्त्वाच्या स्थायी समिती निवडणुकीपूर्वी भाजपने आम आदमी पक्षाला ( Aam Aadmi Party ) (आप) मोठा धक्का दिला आहे. आम आदमी पक्षाच्या (आप) नगरसेवक प्रीती आणि सरिता फोगट यांनी बुधवारी दिल्लीत भारतीय जनता पक्षात (भाजप) प्रवेश केला. प्रीती या वॉर्ड क्रमांक 217 दिलशाद कॉलनीतून नगरसेविका आहेत, तर फोगट या वॉर्ड क्रमांक 150 ग्रीन पार्कमधून नगरसेविका आहेत. दिल्ली भाजपचे अध्यक्ष वीरेंद्र सचदेवा आणि केंद्रीय राज्यमंत्री हर्ष मल्होत्रा यांच्या उपस्थितीत दोन्ही आप नेत्यांनी भाजपात प्रवेश केला.

भाजपमध्ये प्रवेश केल्यानंतर प्रीती म्हणाल्या की मी चार वेळा नगरसेवक राहिले आहे व नेहमीच लोकांमध्ये राहिले आणि नागरी समस्यांशी संबंधित त्यांच्या समस्या सोडवण्याचा प्रयत्न केला. त्या म्हणाल्या की, केजरीवाल आणि त्यांच्या पक्षाला काहीतरी वेगळं करायचं आहे या विचाराने मी सामील झाले होते, पण आता मला आप सोडावं लागलं कारण तिथे वेगळं वातावरण आहे आणि ते मला असह्य झालं आहे. एमसीडी कौन्सिलरने मुख्यमंत्री आतिशी आणि त्यांच्या भागातील स्थानिक आमदार यांच्यावरही टीका केली आणि दावा केला की जर कोणी नाले आणि दूषित पाणीपुरवठा यासारख्या लोकांच्या तक्रारी मांडल्या तर दिल्लीतील सत्ताधारी पक्षातील कोणीही त्यांचे ऐकले नाही.

Yogi government : योगी सरकारने मोठे निर्णय, यूपीत खाद्यपदार्थांच्या दुकानांत नेमप्लेट अनिवार्य, रेस्तरॉंमध्ये CCTV,मास्कही गरजेचे

मिळालेल्या माहितीनुसार, गुरुवारी दिल्ली महानगरपालिकेच्या (एमसीडी) सभागृहाची बैठक होणार आहे. यामध्ये स्थायी समितीच्या एका सदस्याची निवड करायची आहे. कमलजीत शेरावत खासदार झाल्यानंतर स्थायी समितीचे एक सदस्यपद रिक्त झाले होते. ज्यावर उद्या निवडणूक होणार आहे. अर्थात, दिल्लीत आम आदमी पक्षाचा महापौर आहे, मात्र दोन नगरसेवक भाजपमध्ये गेल्याने स्थायी समिती सदस्य आणि सभापतीपदाच्या निवडणुकीत भाजपचा दावा बळकट होऊ शकतो.

याआधीही ऑगस्ट महिन्यात आम आदमी पक्षाचे पाच नगरसेवक भाजपमध्ये दाखल झाले होते. भाजपमध्ये दाखल झालेल्या नगरसेवकांमध्ये रामचंद्र (प्रभाग 28), पवन सेहरावत (प्रभाग 30), ममता पवन (प्रभाग 177), सुगंधा बिधुरी (प्रभाग 178) आणि मंजू निर्मल (प्रभाग 180) यांचा समावेश आहे. रामचंद्र आणि सेहरावत हे दोन नगरसेवक नरेला झोनचे आहेत, तर बाकीचे सेंट्रल झोनचे आहेत.