Lata Mangeshkar : १९८३चा वर्ल्डकप जिंकल्यानंतर टीम इंडियासाठी BCCIकडे नव्हते पैसे, लतादीदींनी मोफत केला होता कॉन्सर्ट

गानसरस्वती भारतरत्न लता मंगेशकर आता आपल्यात नाहीत. लता मंगेशकर यांनी रविवारी मुंबईतील ब्रीच कँडी रुग्णालयात अखेरचा श्वास घेतला. भारतरत्न पुरस्कार विजेत्या लता मंगेशकर या ९२ वर्षांच्या होत्या. त्यांच्या पार्थिवावर रविवारी सायंकाळी मुंबईतील शिवाजी पार्क येथे अंत्यसंस्कार करण्यात येणार आहेत. Lata Mangeshkar BCCI did not have money for Team India after winning the 1983 World Cup, Lata had a free concert


विशेष प्रतिनिधी

मुंबई : गानसरस्वती भारतरत्न लता मंगेशकर आता आपल्यात नाहीत. लता मंगेशकर यांनी रविवारी मुंबईतील ब्रीच कँडी रुग्णालयात अखेरचा श्वास घेतला. भारतरत्न पुरस्कार विजेत्या लता मंगेशकर या ९२ वर्षांच्या होत्या. त्यांच्या पार्थिवावर रविवारी सायंकाळी मुंबईतील शिवाजी पार्क येथे अंत्यसंस्कार करण्यात येणार आहेत.

लता दीदींनी भारतीय क्रिकेटसाठी दिलेले योगदान कधीही विसरता येणार नाही. 1983मध्ये भारतीय संघ चॅम्पियन झाला तेव्हा भारतीय क्रिकेट नियामक मंडळाकडे (BCCI) खेळाडूंना देण्यासाठी पैसे नव्हते. जगातील सर्वात श्रीमंत क्रिकेट बोर्ड असलेल्या बीसीसीआयची आर्थिक स्थिती त्यावेळी अत्यंत बिकट होती. बीसीसीआयचे तत्कालीन अध्यक्ष एनकेपी साळवे यांना खेळाडूंना पुरस्कार देण्याची इच्छा होती, मात्र पैशांअभावी ते रखडले होते.

या गंभीर परिस्थितीतून बाहेर पडण्यासाठी साळवे यांनी गानसरस्वती लता मंगेशकर यांची मदत घेतली. भारतीय संघाच्या विजयाचा आनंद साजरा करण्यासाठी दिल्लीतील इंदिरा गांधी इनडोअर स्टेडियमवर लता मंगेशकर यांच्या मैफलीचे आयोजन करण्यात आले होते. ही मैफल प्रचंड गाजली आणि 20 लाख रुपये जमा झाले. नंतर भारतीय संघातील सर्व सदस्यांना प्रत्येकी एक लाख रुपये बक्षीस म्हणून देण्यात आले.

‘भारत विश्वविजेता’ हे गाणे प्रसिद्ध झाले

या मैफलीत लता मंगेशकर यांनी अनेक गाणी गायली, पण ‘भारत विश्वविजेता’ या गाण्याला खूप दाद मिळाली. या गाण्याचे संगीत लता मंगेशकर यांचे बंधू हृदयनाथ मंगेशकर यांनी दिले, तर त्याचे बोल प्रसिद्ध बॉलिवूड गीतकार ‘इंदिवर’ यांनी लिहिले आहेत. विशेष म्हणजे जेव्हा लता मंगेशकर स्टेजवर हे गाणे गात होत्या, तेव्हा भारतीय क्रिकेट संघाचे खेळाडूही मागून लताजींच्या आवाजात स्वरात स्वर मिसळत होते.



या कॉन्सर्टसाठी लता मंगेशकर यांनी बीसीसीआयकडून कोणतेही शुल्क घेतले नाही. लता मंगेशकर यांचे हे योगदान बीसीसीआय आणि तत्कालीन खेळाडूंनी नेहमी लक्षात ठेवले. बीसीसीआयने तर लतादीदी हयात असेपर्यंत भारतातील प्रत्येक स्टेडियममध्ये सामना पाहण्यासाठी एक जागा राखून ठेवली जाईल, असा प्रस्ताव दिला होता.

BCCIने केले चॅरिटी मॅचचे आयोजन

1983 च्या विजयानंतर 20 वर्षांनी 2003 मध्ये जेव्हा लता मंगेशकर यांना त्यांच्या हॉस्पिटलसाठी निधीची गरज होती, तेव्हा बीसीसीआय जुने कर्ज फेडण्यासाठी पुढे आली. बीसीसीआयने हॉस्पिटलसाठी निधी उभारण्यासाठी एक चॅरिटी मॅच आयोजित केली. हा चॅरिटी सामना 2003च्या विश्वचषकानंतर भारत आणि श्रीलंका यांच्यात खेळला गेला होता, ज्यातून जमा झालेला पैसा मंगेशकर हॉस्पिटलमध्ये गेला होता. लताजींच्या वडिलांच्या स्मृतिप्रीत्यर्थ बनवलेले दीनानाथ मंगेशकर हॉस्पिटल आणि रिसर्च सेंटर पुण्यात आहे.

Lata Mangeshkar BCCI did not have money for Team India after winning the 1983 World Cup, Lata had a free concert

महत्त्वाच्या बातम्या