मोहित कंबोज संतापले; खोट्या बातम्यांवरून कठोर कारवाईचा इशारा

By, wankhadepravin - August 31, 2026 11:30:51

0

विशेष प्रतिनिधी

मुंबई : समाजमाध्यमांवर आपल्याविरोधात जाणीवपूर्वक खोट्या, बनावट आणि दिशाभूल करणाऱ्या बातम्या प्रसारित केल्या जात असल्याचा आरोप व्यावसायिक मोहित कंबोज भारतीय यांनी केला आहे. कथित बदनामीची मोहीम तातडीने थांबवावी, अन्यथा संबंधित व्यक्ती, डिजिटल खाती आणि माध्यमांविरोधात दिवाणी तसेच फौजदारी कायदेशीर कारवाई केली जाईल, असा इशारा कंबोज यांनी दिला आहे. Mohit Kamboj

गेल्या काही दिवसांपासून सुनियोजित कटाचा भाग म्हणून आपली सामाजिक आणि सार्वजनिक प्रतिष्ठा मलिन करण्याचा प्रयत्न सुरू असल्याचा दावा कंबोज यांनी केला. वैयक्तिक आकसातून अप्रमाणित माहिती तयार करून ती विविध माध्यमे आणि समाजमाध्यमांवर जाणीवपूर्वक प्रसारित केली जात असल्याचे त्यांनी म्हटले आहे.

रिक्षा-टॅक्सीचालकांना मराठीसाठी आणखी एक वर्षाची मुदतवाढ

“माझी प्रतिमा मलीन करण्याच्या उद्देशाने सातत्याने खोटे आणि दिशाभूल करणारे दावे तयार करून प्रसारित केले जात आहेत. असा मजकूर तयार करणारे, प्रसिद्ध करणारे किंवा समाजमाध्यमांवर पुढे पाठवणारे सर्व संबंधितांनी ही कृती तत्काळ थांबवावी,” असे कंबोज यांनी म्हटले.

अन्यथा कोणतीही पूर्वसूचना न देता संबंधितांविरोधात कठोर कायदेशीर कारवाई केली जाईल, असा स्पष्ट इशाराही त्यांनी दिला आहे. कथित अपप्रचारात सहभागी असलेल्या समाजमाध्यम खात्यांची आणि व्यक्तींची माहिती तसेच संबंधित मजकुराचे पुरावे संकलित केले जात असल्याचे त्यांच्या भूमिकेतून स्पष्ट झाले आहे.

सार्वजनिक प्रतिष्ठेला हानी पोहोचवणारा मजकूर संबंधित व्यासपीठांवरून हटवला नाही, तर न्यायालयीन प्रक्रिया सुरू करण्याची तयारी कंबोज यांनी दर्शवली आहे.

यापूर्वीही पाठवली होती कायदेशीर नोटीस

जुलै २०२६ मध्ये मोहित कंबोज, त्यांची अल्पवयीन मुलगी आणि ॲस्पेक्ट समूहाने ४पीएम न्यूज नेटवर्क तसेच त्याचे मुख्य संपादक संजय शर्मा यांना बदनामीच्या आरोपावरून कायदेशीर नोटीस पाठवली होती.

३० जून रोजी यूट्यूब, इन्स्टाग्राम आणि ‘एक्स’वर प्रसिद्ध करण्यात आलेल्या मजकुरात कंबोज, त्यांच्या कुटुंबीयांबाबत तसेच महाराष्ट्रातील सरकारी निर्णयांवर त्यांच्या कथित प्रभावासंदर्भात निराधार दावे करण्यात आल्याचा आरोप नोटिशीत करण्यात आला होता.

संबंधित मजकूर सर्व डिजिटल व्यासपीठांवरून हटवावा, बिनशर्त सार्वजनिक माफी मागावी आणि भविष्यात अशा प्रकारचे आरोप केले जाणार नाहीत, याची हमी द्यावी, अशा मागण्या नोटिशीत करण्यात आल्या होत्या. कथित प्रतिष्ठाहानीबद्दल १,००० कोटी रुपयांची भरपाई देण्याची मागणीही करण्यात आली होती.