पुण्यात शिवशाही बसमध्ये तरुणीवर बलात्कार; स्वारगेट बसस्थानकावर पहाटे घडली धक्कादायक घटना

By, Pravin Wankhade - February 27, 2025 08:30:15

0

प्रतिनिधी

पुणे : पुण्यातील स्वारगेट बसस्थानकावर उभ्या असलेल्या एका शिवशाही बसमध्ये 26 वर्षीय तरुणीवर बलात्कार झाल्याची धक्कादायक घटना समोर आली आहे. ही घटना मंगळवारी पहाटे 5.30 वाजण्याच्या सुमारास घडली असून, यामुळे पुणे तसेच संपूर्ण महाराष्ट्रात संतापाची लाट उसळली आहे.

प्राप्त माहितीनुसार, पीडित तरुणी पुण्याहून फलटणला जाण्यासाठी स्वारगेट बसस्थानकावर थांबली होती. त्याच वेळी, एका अनोळखी व्यक्तीने तिची बस दुसऱ्या ठिकाणी असल्याचे सांगितले. तरुणीने त्याच्या बोलण्यावर विश्वास न ठेवता सावधगिरी बाळगली. मात्र, आरोपीने तिच्या एकटेपणाचा फायदा घेत, तिचा विश्वास संपादन करून तिला जवळच उभ्या असलेल्या शिवशाही बसमध्ये नेले. तिथे त्याने तिच्यावर जबरदस्तीने बलात्कार केला आणि नंतर घटनास्थळावरून फरार झाला.

पीडितेने पोलिसांकडे धाव घेतली

या धक्कादायक घटनेनंतर पीडित तरुणीने तिच्या मित्राला फोन करून संपूर्ण प्रकार सांगितला. त्याने तिला तातडीने पोलिस ठाण्यात जाण्याचा सल्ला दिला. त्यानुसार, तरुणीने स्वारगेट पोलिस ठाणे गाठले आणि तक्रार नोंदवली. तिच्या तक्रारीवरून पोलिसांनी अज्ञात आरोपीविरुद्ध बलात्काराचा गुन्हा दाखल केला आणि तपास सुरू केला. या घटनेची माहिती मिळताच पुणे शहरात मोठी खळबळ माजली.

सरकारी कर्मचाऱ्यांना मुख्यमंत्र्यांची भेट, महागाई भत्त्यात ३ टक्के वाढ

आरोपीचा माग काढला जात आहे

पोलिसांनी स्वारगेट बसस्थानक परिसरातील सीसीटीव्ही फूटेजच्या आधारे आरोपीची ओळख पटवली आहे. वृत्तानुसार, आरोपीचे नाव दत्तात्रय रामदास गाडे असून, तो आधीपासूनच रेकॉर्डवरील गुन्हेगार आहे. त्याच्यावर शिक्रापूर व शिरूर पोलिस ठाण्यात चोरी आणि चेन स्नॅचिंगसारख्या गुन्ह्यांची नोंद आहे. सध्या तो फरार असून पोलिसांचे पथक त्याच्या मागावर आहे. पोलिसांनी आरोपीला लवकरच अटक करण्याचा विश्वास व्यक्त केला आहे.

महिला सुरक्षेवर प्रश्नचिन्ह

स्वारगेट बसस्थानक हे पुण्यातील सर्वात गजबजलेले आणि सुरक्षित समजले जाणारे बसस्थानक आहे. येथे 24 तास प्रवाशांची वर्दळ असते. तरीही, अशा वर्दळीच्या ठिकाणी बलात्कारासारखी गंभीर घटना घडल्याने महिला सुरक्षेवर गंभीर प्रश्नचिन्ह निर्माण झाले आहे. विशेषतः, आरोपी हा गुन्हेगारी पार्श्वभूमीचा असूनही त्याला अशा कृत्यासाठी वाव मिळाला, हे प्रशासनासाठी गंभीर चिंता निर्माण करणारे आहे.

समाजाच्या मानसिकतेवर प्रश्नचिन्ह

या घटनेने समाजाच्या मानसिकतेवरही प्रश्न उपस्थित केले आहेत. पीडित तरुणीला घटनेनंतर त्वरित मदत का मिळाली नाही? तिच्यावर अत्याचार होत असताना किंवा नंतरही कोणी मदतीसाठी पुढे का आले नाही? अशा अनेक प्रश्नांची उत्तरे अद्याप मिळालेली नाहीत.

पोलिस तपास सुरू असून आरोपीला लवकरच अटक करून कठोर कारवाई केली जाईल, अशी अपेक्षा आहे. मात्र, या घटनेमुळे महिला सुरक्षेच्या दृष्टीने अधिक कडक उपाययोजनांची आवश्यकता भासते.