दांडियाच्या मंडपाबाहेर आरोग्य सुविधा, रुग्णवाहिका ठेवणे आयोजकांवर बंधनकारक; मुख्यमंत्र्यांचे निर्देश Health facility outside Dandiya Mandap and ambulance

दांडियाच्या मंडपाबाहेर आरोग्य सुविधा, रुग्णवाहिका ठेवणे आयोजकांवर बंधनकारक; मुख्यमंत्र्यांचे निर्देश

विशेष प्रतिनिधी

मुंबई : आगामी शारदीय नवरात्रीच्या पार्श्वभूमीवर सार्वजनिक आरोग्याच्या दृष्टीने शिंदे – फडणवीस सरकारने महत्त्वपूर्ण निर्णय घेतला आहे. नवरात्र उत्सवा निमित्ताने राज्यभरात दांडिया रास तसेच गरबा कार्यक्रमांचे आयोजन केले जाते. रास दांडियाच्या आयोजकांना सहभागी लोकांच्या आरोग्याची काळजी घ्यावी लागणार आहे. राज्यातील सर्व दांडिया आयोजकांना यंदा आयोजनाचा ठिकाणी प्राथमिक आरोग्य सुविधा आणि रुग्णवाहिका तैनात ठेवणे बंधनकारक करण्याचे निर्देश मुख्यमंत्री एकनाथ शिंदे यांनी दिले आहेत. Health facility outside Dandiya Mandap and ambulance

राज्यात नवरात्रीच्या नऊ दिवसांत मोठया प्रमाणात रास दांडियाचे आयोजन करण्यात येते. अनेक राजकीय पक्ष दांडियाचे मोठ्या प्रमाणात आयोजन करतात. त्यात आयोजकांच्या वतीने अनेकदा प्राथमिक आरोग्य सुविधा उपलब्ध करून दिली जात असली तरीही काही आयोजक त्याकडे सोयीस्करपणे दुर्लक्ष करतात. त्यामुळे दांडियाचे आयोजन करताना प्राथमिक आरोग्य सुविधा आणि आयोजनाचा जागी सर्व सुविधांनी सुसज्ज अशी रुग्णवाहिका ठेवणे आयोजकांना बंधनकारक करण्याचे निर्देश मुख्यमंत्री एकनाथ शिंदे यांनी दिले आहेत.

रास दांडिया खेळताना अनेकदा लोकं भान विसरून नाचतात, अशावेळी काही वेळा हृदयावर अतिरिक्त ताण येऊन हृदयविकाराचा झटका येण्यासारख्या घटना यापूर्वी अनेकदा घडल्या आहेत. कोरोना कालखंडानंतर अनेकांची रोगप्रतिकारक शक्ती कमी झाल्याचे देखील अनेक अहवालातून समोर आले आहे, त्यामुळे अनेक जीवनशैली विकार असलेल्या रुग्णांची संख्या वाढली आहे.

त्यामुळे कोणतीही वैद्यकीय आणीबाणीची परिस्थिती उदभवल्यास त्या व्यक्तीला तत्काळ वैद्यकीय सुविधा उपलब्ध होणे गरजेचे असते. ही गरज लक्षात घेऊनच मुख्यमंत्र्यांनी अशी सुविधा सर्व आयोजकांनी यावेळी उपलब्ध करून द्यावी असे निर्देश राज्यातील सर्व जिल्हाधिकाऱ्यांना दिले आहेत.