इस्रायल-हमास युद्धात आतापर्यंत 1,730 मृत्यू: बायडेन यांची नेतन्याहूंशी चर्चा, परराष्ट्र मंत्री ब्लिंकन आज इस्रायल भेटीवर

By, Pravin Wankhade - October 11, 2023 10:15:52

0

वृत्तसंस्था

तेल अवीव : इस्रायल आणि हमास यांच्यातील युद्धात आतापर्यंत 1,730 लोकांचा मृत्यू झाला आहे. दरम्यान, अमेरिकेचे राष्ट्राध्यक्ष जो बायडेन आणि उपराष्ट्रपती कमला हॅरिस यांनी इस्रायलचे पंतप्रधान बेंजामिन नेतन्याहू यांच्याकडून युद्धाच्या परिस्थितीची माहिती घेतली.1,730 dead in Israel-Hamas war so far Biden talks with Netanyahu

यानंतर जो बायडेन यांनी मंगळवारी रात्री उशिरा व्हाईट हाऊसमधून केलेल्या भाषणात अमेरिका इस्रायलसोबत असल्याचे सांगितले. हमासच्या इस्रायलवरील हल्ल्याबाबत ते म्हणाले की, येथे एक हजार लोकांची निर्घृण हत्या करण्यात आली आहे.

यामध्ये 14 अमेरिकन नागरिकांचा मृत्यू झाला होता. इस्रायलमध्ये नरसंहार झाला आहे. या हल्ल्याला उत्तर देण्याचा अधिकार इस्रायलला आहे. हे दहशतवादाचे कृत्य आहे, परंतु दुर्दैवाने, ज्यू लोकांसाठी हे काही नवीन नाही.

हमासच्या 25 दहशतवाद्यांना मारणारी इस्रायली वीरांगना इनबल लिबरमॅन!!; इस्रायली भारतीयांनी केले वंदन!!

अमेरिकेच्या परराष्ट्र मंत्रालयाने सांगितले की, अमेरिकेचे परराष्ट्र मंत्री ब्लिंकन बुधवारी (11 ऑक्टोबर) इस्रायलशी एकता दाखवण्यासाठी इस्रायलला भेट देणार आहेत. गुरुवारी ते इस्रायलला पोहोचण्याची शक्यता आहे.

लेबनॉनने इस्रायलवर पुन्हा 15 रॉकेट डागले

इस्रायल-हमास युद्धादरम्यान लेबनॉनने पुन्हा इस्रायलवर हल्ला केला. टाइम्स ऑफ इस्रायलच्या वृत्तानुसार, लेबनॉनमधून 15 रॉकेट डागण्यात आले. हे रॉकेट इस्रायलच्या पश्चिमेकडील गॅलील शहर आणि दक्षिणेकडील किनारी शहर अश्केलॉनमध्ये पडले.

प्रत्युत्तरादाखल इस्त्रायली सैन्याने लेबनीज दहशतवादी संघटना हिजबुल्लाहच्या 3 ठाण्यांवर हल्ला केला आहे. यापूर्वी 8 ऑक्टोबर रोजी हिजबुल्लाहने इस्रायलवर गोळीबार केला होता आणि लेबनॉन सीमेवरून बॉम्ब फेकले होते.

इस्रायलच्या i24 न्यूजनुसार, 7 ऑक्टोबरपासून सुरू झालेल्या हमाससोबतच्या युद्धात 40 नवजात मुलांसह 900 इस्रायली लोक मारले गेले आहेत, तर 2300 लोक जखमी झाले आहेत. गाझा पट्टीमध्ये 140 मुले आणि 120 महिलांसह 830 पॅलेस्टिनी ठार झाले आहेत. तर 3,726 लोक जखमी झाले आहेत.

नेतान्याहू यांचा मोदींना फोन

पंतप्रधान बेंजामिन नेतन्याहू यांनी 10 ऑक्टोबरच्या संध्याकाळी पंतप्रधान नरेंद्र मोदींना फोन केला होता. त्यांनी मोदींना युद्धाची संपूर्ण माहिती दिली. यानंतर मोदींनी ट्विट केले की- या कठीण काळात भारतातील जनता इस्रायलसोबत आहे. आम्ही सर्व प्रकारच्या दहशतवादाच्या विरोधात आहोत.

इस्रायलने गाझा सीमा ताब्यात घेतली

10 ऑक्टोबर रोजी इस्रायली सैन्याने घोषणा केली की- आम्ही गाझाची सीमा ताब्यात घेतली आहे आणि ती पूर्णपणे सील केली आहे. खरं तर 9 ऑक्टोबर रोजी इस्रायल सरकारने आपल्या सैन्याला संपूर्ण गाझा पट्टी ताब्यात घेण्याचे आदेश दिले होते.

इस्रायलने गाझा सीमेवर 1 लाख सैनिक तैनात केले होते. तसेच 3 लाख सैनिकांना तयार राहण्यास सांगितले होते. इस्रायलचे संरक्षण मंत्री योव गॅलंट यांनीही गाझा पट्टीला अन्न, पाणी, वीज आणि इंधनाचा पुरवठा बंद करण्याचे आदेश अधिकाऱ्यांना दिले होते.