Manikrao Kokate रमी प्रकरणात कोकाटेंवर कारवाई; कृषी खाते गेले, क्रीडा मिळाले; भरणेंची कृषी खाते देऊन नाराजी दूर

By, Pravin Wankhade - August 1, 2025 08:30:20

0

विशेष प्रतिनिधी

मुंबई : विधानसभेत अधिवेशनादरम्यान रमी (पत्ते) खेळतानाचा व्हिडिओ व्हायरल झाल्याने वादात अडकलेले कृषी मंत्री माणिकराव कोकाटे यांच्यावर अखेर कारवाई झाली आहे. त्यांच्याकडील महत्त्वाचे कृषी खाते काढून घेण्यात आले असून ते दत्तात्रय भरणे यांच्याकडे सोपवण्यात आले आहे. कोकाटेंना आता भरणेंकडील क्रीडा व युवक कल्याण मंत्रालय दिले आहे. त्यामुळे त्यांचे मंत्रिपद सध्या तरी वाचले आहे. Manikrao Kokate

मुख्यमंत्र्यांच्या बैठकीत निर्णय, शिंदे अनुपस्थित

गुरुवारी रात्री उशिरा मुख्यमंत्री देवेंद्र फडणवीस, उपमुख्यमंत्री अजित पवार, आणि राष्ट्रवादी प्रदेशाध्यक्ष सुनील तटकरे यांच्यात बैठक झाली. यामध्ये कोकाटेंच्या खातेबदलाचा निर्णय अंतिम करण्यात आला. एकनाथ शिंदे दिल्ली दौऱ्यावर असल्याने ते उपस्थित नव्हते. राष्ट्रवादीने कोकाटेंच्या बदलीचा आग्रह धरला होता, तर भाजप त्यांचा राजीनामा मागत होते. पण शिंदे गटातील अन्य मंत्रीही वादात अडकलेले असल्याने, कोकाटेंवर सौम्य कारवाई करत त्यांना दुय्यम खाते देण्याचा निर्णय घेण्यात आला.

भरणेंची नाराजी दूर, बारामतीचे बळ दिसले

दत्तात्रय भरणे हे अजित पवारांचे जवळचे सहकारी आहेत. त्यांना निवडणुकीनंतर मिळालेले क्रीडा खाते हीन दर्जाचे वाटत असल्यामुळे ते नाराज होते. आता त्यांच्याकडे कृषी खाते देण्यात आले, त्यामुळे त्यांची नाराजी दूर करण्यात यश आले. त्यांनी यावर प्रतिक्रिया देताना म्हटले, “बारामती योग्य वेळी योग्य संधी देते.”

चुकार मंत्र्यांना झापले की नाही??, फडणवीस म्हणाले, मंत्रिमंडळात जे बोललो, ते बाहेर सांगणार नाही!!

धनंजय मुंडेंचे प्रयत्न

कृषी खाते रिकामे होताच माजी मंत्री धनंजय मुंडे यांनी पुन्हा मंत्रिपदासाठी लॉबिंग सुरू केले. त्यांनी फडणवीस, अजित पवार आणि तटकरे यांची भेट घेतली. मात्र बीडमधील एका सरपंच हत्येच्या प्रकरणामुळे त्यांचे नाव वादात असल्यामुळे त्यांना मंत्रिपद मिळाले नाही.

शिंदे गटावरही वादांचा घेराव

शिंदे गटातील मंत्री आणि आमदारही अलीकडच्या काळात अनेक विवादांत अडकले आहेत:

आमदार संजय गायकवाड यांच्यावर विधिमंडळात कर्मचाऱ्याला मारहाण केल्याचा आरोप.
मंत्री संजय शिरसाट यांच्याजवळ पैसे असलेली बॅग असल्याचा व्हिडिओ.
भरत गोगावले यांच्यावर जादूटोण्याचे आरोप.
त्यामुळे एकट्या कोकाटेंवर कारवाई करणे भाजपसाठी आणि शिंदे गटासाठी राजकीय दृष्टिकोनातून अवघड ठरत होते.

शिंदे दिल्लीत, पक्ष चिन्हाच्या खटल्यावर चर्चा

शिंदे हे सध्या दिल्लीतील खासदार श्रीकांत शिंदे यांच्या निवासस्थानी असून, तिथे शिवसेनेच्या खासदारांसोबत संसद अधिवेशनातील मुद्द्यांवर चर्चा करत आहेत. सुप्रीम कोर्टात शिवसेना पक्ष नाव आणि चिन्हावर अंतिम सुनावणी होणार आहे. त्यासाठी ते दिल्लीतील वकिलांशी चर्चा करत असल्याची माहिती मिळाली आहे.

कोकाटेंनी अधिवेशनात २२ मिनिटे पत्ते खेळले

राष्ट्रवादीचे आमदार रोहित पवार यांनी आरोप केला की, कोकाटे अधिवेशन चालू असताना १८ ते २२ मिनिटे रमी खेळत होते. यावर सामाजिक कार्यकर्त्या अंजली दमानिया यांनी प्रतिक्रिया दिली होती की, “पत्ते खेळणाऱ्या मंत्र्याचा तत्काळ राजीनामा घेतला पाहिजे.”

ठळक घडामोडी…