Pink e rickshaw महिलांसाठी महिलांद्वारे संचालित ‘पिंक ई-रिक्षा’!

By, Pravin Wankhade - April 21, 2025 05:00:23

0

पिंक ई-रिक्षा योजनेच्या माध्यमातून महिला सशक्तीकरण केले जाणार आहे.

विशेष प्रतिनिधी

नागपूर : मुख्यमंत्री देवेंद्र फडणवीस यांच्या हस्ते ‘पिंक ई-रिक्षा वितरण समारंभ, नागपूर जिल्हा’ येथे 50 महिला लाभार्थ्यांना पिंक ई-रिक्षाचे वितरण करण्यात आले. यावेळी मुख्यमंत्री देवेंद्र फडणवीस यांनी उपस्थितांना संबोधित केले. महिला व बालविकास विभागामार्फत पिंक ई-रिक्षा योजनेची अंमलबजावणी चांगल्या पद्धतीने केल्याबद्दल मुख्यमंत्री देवेंद्र फडणवीस यांनी विभागाचे अभिनंदन केले.

नागपूर येथे 2000 पिंक ई-रिक्षा महिलांना देण्यात येणार असून या योजनेचा मुख्य उद्देश म्हणजे महिला सशक्तीकरणाला चालना देणे आहे. महिलांसाठी सुरक्षित आणि विश्वासार्ह प्रवासाचा पर्याय म्हणून पिंक ई-रिक्षा महत्त्वाची ठरेल, असे मुख्यमंत्री देवेंद्र फडणवीस यांनी सांगितले.

मुख्यमंत्री देवेंद्र फडणवीस म्हणाले की, पिंक ई-रिक्षामुळे कुठलेही प्रदूषण होणार नाही. गुलाबी रंगामुळे ही रिक्षा उठून दिसेल. प्रामुख्याने महिलांच्या सुरक्षेसाठी, महिलांद्वारे संचालित अशा पिंक ई-रिक्षाचा वापर सर्वसामान्य जनता करू शकते.

नवीन प्रणालीद्वारे होणार सार्वजनिक तक्रारींचे निवारण

मेट्रो स्थानकांवर फिडर सेवा म्हणून पिंक ई-रिक्षाचा वापर करण्यात येईल. या उपक्रमाअंतर्गत महिलांना निश्चित रोजगार उपलब्ध करून देण्यासाठी मेट्रो प्रशासनासोबत करार करण्यात आला आहे. यावेळी मंत्री आदिती तटकरे यांनी सुचविल्याप्रमाणे फिडर सर्व्हिसची आवश्यकता असणाऱ्या ठिकाणी पिंक ई-रिक्षांना प्राधान्य देण्यात यावे अशा सूचना परिवहन व पर्यटन विभागाला देणार असल्याचे मुख्यमंत्री देवेंद्र फडणवीस यांनी सांगितले. याप्रसंगी सर्व पिंक ई-रिक्षा चालक महिलांना मुख्यमंत्री देवेंद्र फडणवीस यांनी शुभेच्छा दिल्या.

या योजनेंतर्गत पुणे, नाशिक, नागपूर, अहिल्यानगर, अमरावती, छत्रपती संभाजीनगर, सोलापूर, कोल्हापूर या जिल्ह्यांत महाराष्ट्र शासनाकडून इच्छुक महिलांना रिक्षा खरेदी करण्यासाठी अर्थसहाय्य व ई-रिक्षा चालवण्यासाठी सोयी सुविधा उपलब्ध करून देण्यात येणार आहे. यावेळी मंत्री आदिती तटकरे, राज्यमंत्री मेघना बोर्डीकर, आमदार आशिष देशमुख, आमदार संदीप जोशी, लाभार्थी आणि इतर मान्यवर उपस्थित होते.