CM Mohan Yadav Profile : MP चे नवे मुख्यमंत्री मोहन यादव; 1984 मध्ये ABVP मधून राजकारणाला सुरुवात

By, Pravin Wankhade - December 12, 2023 09:30:11

0

विशेष प्रतिनिधी

उज्जैन : उज्जैन दक्षिण विधानसभा मतदारसंघाचे आमदार मोहन यादव हे मध्य प्रदेशचे नवे मुख्यमंत्री असतील. यादव यांनी 1984 मध्ये अखिल भारतीय विद्यार्थी परिषद (ABVP) मधून आपल्या राजकीय कारकिर्दीला सुरुवात केली. 1986 मध्ये त्यांना ABVP च्या विभागप्रमुखाची जबाबदारी देण्यात आली. यादव यांची प्रतिमा रस्त्यावरील संघर्षाची आहे.CM Mohan Yadav Profile : New Chief Minister Mohan Yadav of MP; Started politics in 1984 from ABVP

मोहन यादव 2013 मध्ये प्रथमच उज्जैन दक्षिण मतदारसंघातून आमदार म्हणून निवडून आले होते. यानंतर त्यांनी 2018 आणि 2023 च्या विधानसभा निवडणुकाही जिंकल्या. 2 जुलै 2020 रोजी त्यांना शिवराज मंत्रिमंडळात उच्च शिक्षण मंत्री करण्यात आले. 1965 मध्ये उज्जैन येथे पूनमचंद यादव यांच्या पोटी जन्मलेले मोहन यादव हे एमए, पीएचडी आहेत. सीमा यादव यांच्याशी त्यांचा विवाह झाला आहे. त्यांना दोन मुले आणि एक मुलगी आहे.

मध्य प्रदेशात भाजपचा “गुजरात प्रयोग”; रेस मध्ये नाव नसलेले मोहन यादव मुख्यमंत्री; तर जगदीश देवरा – राजेंद्र शुक्ला उपमुख्यमंत्री!!

उज्जैनच्या मास्टर प्लॅनबाबत काँग्रेसने निवडणुकीपूर्वी यादव यांच्यावर गंभीर आरोप केले होते. मोहन यादव यांनी कुटुंबातील सदस्यांना फायदा व्हावा यासाठी चुकीच्या पद्धतीने मास्टर प्लॅन पास केला, असे काँग्रेसने म्हटले होते. यानंतर सरकारने उज्जैनच्या मास्टर प्लॅनच्या अंमलबजावणीवर बंदी घातली होती. मात्र, मोहन यादव यांनी हे सर्व आरोप फेटाळून लावले होते.

मोहन यादव 2003 मध्ये बडनगरमधून निवडणूक लढवण्याच्या तयारीत होते. नावही जाहीर झाले पण स्थानिक नेते व कार्यकर्त्यांनी विरोध केला. यानंतर संघटनेशी सहमती दर्शवत यादव यांनी तिकीट परत केले. पक्षाने येथून शांतीलाल धाबाई यांना उमेदवारी दिली होती.

मोहन यादव यांना 2013 मध्ये उज्जैन दक्षिण मतदारसंघातून तिकीट मिळाले आणि त्यांनी निवडणूक जिंकली. तेव्हापासून ते या जागेवरून सातत्याने विजयी होत आहेत. यावेळी ते तिसऱ्यांदा आमदार झाले आहेत.

मोहन यादव हे माजी मुख्यमंत्री उमा भारती यांच्या जवळचे असल्याचेही म्हटले जाते. 30 नोव्हेंबर 2003 रोजी उमा भारती निवडणुकीच्या प्रचारासाठी उज्जैनला पोहोचल्या होत्या. मोहन यादव यांनी हरसिद्धी धर्मशाळेत उमा यांच्या मुक्कामाची व्यवस्था केली. दुसऱ्या दिवशी सकाळी त्या यादव यांच्या गाडीने भोपाळला परतल्या. उमा भारती मुख्यमंत्री झाल्यावर त्यांनी मोहन यादव यांना उज्जैन विकास प्राधिकरणाचे अध्यक्ष केले. 2010 पर्यंत ते या पदावर होते.