६५ कोटींच्या मिठी नदी गैरव्यवहारात बॉलिवूड कनेक्शन! डिनो मोरियाची आठ तास चौकशी

By, wankhadepravin - October 3, 2026 07:30:59

0

विशेष प्रतिनिधी

मुंबई : मिठी नदी गाळ काढण्याच्या कामातील कथित आर्थिक गैरव्यवहार प्रकरणात बॉलिवूड अभिनेता डिनो मोरिया याच्या अडचणी वाढण्याची शक्यता आहे. मुंबई पोलिसांच्या आर्थिक गुन्हे शाखेने शुक्रवारी (२ ऑक्टोबर) त्याची तब्बल आठ तास चौकशी केली. चौकशीनंतर रात्री त्याला घरी जाण्याची परवानगी देण्यात आली. तपासात आवश्यकता भासल्यास त्याला पुन्हा चौकशीसाठी बोलावले जाऊ शकते, अशी माहिती समोर आली आहे. Actor Dino Morea

या प्रकरणात गेल्या वर्षी मे महिन्यातही डिनो मोरियाची सुमारे आठ तास चौकशी करण्यात आली होती. त्याच्या निवासस्थानी छापेमारी झाल्याची माहितीही समोर आली आहे. मात्र, चौकशीनंतर त्याला अटक होणार असल्याच्या चर्चेला अद्याप अधिकृत दुजोरा मिळालेला नाही.

६५ कोटींच्या कथित गैरव्यवहाराचा तपास

मुंबईतील मिठी नदीतील गाळ काढणे आणि स्वच्छतेच्या कामांमध्ये २०१७ ते २०२१ या कालावधीत कथित गैरव्यवहार झाल्याचा आरोप आहे. या कामांसाठी देण्यात आलेल्या कंत्राटांमध्ये अनियमितता झाल्याचा संशय तपास यंत्रणांना आहे. काही ठरावीक कंत्राटदार आणि यंत्रसामग्री पुरवठादारांना फायदा मिळवून देण्यासाठी निविदांच्या अटींमध्ये फेरफार केल्याचा आरोप करण्यात आला आहे.

गाळ उपसण्यासाठी वापरण्यात येणाऱ्या विशेष यंत्रसामग्रीच्या भाड्याचे दर अवाजवी दाखवण्यात आल्याचा तसेच नदीतून काढलेला गाळ मुंबईबाहेर वाहून नेल्याचे दाखवण्यासाठी बनावट लॉगशीट, करार आणि बिले सादर केल्याचा आरोप आहे. या माध्यमातून मुंबई महापालिकेची सुमारे ६५ कोटी रुपयांची फसवणूक झाल्याचा संशय व्यक्त करण्यात आला आहे.

चाकण-हिंजवडीच्या 1,826 कोटींच्या आराखड्याला फडणवीसांची तत्त्वतः मंजुरी; डिसेंबरपासून कामांना सुरुवात

डिनो मोरियाचे नाव तपासात कसे आले?

या प्रकरणातील मुख्य आरोपी केतन कदम याच्याशी डिनो मोरिया आणि त्याचा भाऊ सँटिनो मोरिया यांचा संपर्क असल्याचे तपासात समोर आल्याचा दावा केला जात आहे. केतन कदम याच्या मोबाईल फोनमधील कॉल डिटेल्सची तपासणी केली असता डिनो मोरिया आणि त्याच्या भावाशी अनेकदा संवाद झाल्याचे आढळल्याची माहिती आहे.

या संपर्कामागे नेमके काय कारण होते, तसेच संबंधित व्यक्ती किंवा कंपन्यांचा कथित कंत्राट व्यवहारांशी काही संबंध होता का, याचा तपास आर्थिक गुन्हे शाखेकडून केला जात आहे. संशयास्पद आर्थिक व्यवहार झाले होते का, याचाही तपास सुरू असल्याचे समजते. मात्र, या संदर्भातील आरोप अद्याप तपासाच्या अधीन असून डिनो मोरियाची दोषी म्हणून पुष्टी झालेली नाही.

राजकीय आरोप-प्रत्यारोपांनाही सुरुवात

मिठी नदी गाळ काढण्याच्या कथित गैरव्यवहारावरून भाजप आणि उद्धव ठाकरे यांच्या शिवसेनेमध्ये आरोप-प्रत्यारोप सुरू झाले आहेत. मुंबई महापालिकेतील तत्कालीन सत्ताकाळातील कंत्राटांवरून हा मुद्दा पुन्हा चर्चेत आला आहे.

दरम्यान, आर्थिक गुन्हे शाखेकडून या प्रकरणाचा तपास सुरू असून डिनो मोरियाला पुन्हा चौकशीसाठी बोलावले जाणार का, तसेच तपासात आणखी कोणती नावे समोर येणार, याकडे लक्ष लागले आहे.