कुस्तीपटूंचे आंदोलन : बजरंग पुनिया, साक्षी आणि विनेश यांच्याविरुद्ध एफआयआर, दंगल भडकावण्यासह या कलमांत गुन्हा दाखल|Wrestlers' protest: FIR filed against Bajrang Punia, Sakshi and Vinesh under these sections including inciting riots

कुस्तीपटूंचे आंदोलन : बजरंग पुनिया, साक्षी आणि विनेश यांच्याविरुद्ध एफआयआर, दंगल भडकावण्यासह या कलमांत गुन्हा दाखल

प्रतिनिधी

नवी दिल्ली : भारतीय कुस्ती महासंघाचे अध्यक्ष बृजभूषण शरण सिंह यांच्याविरोधात निदर्शने करणाऱ्या कुस्तीपटूंवर दिल्ली पोलिसांनी गुन्हा दाखल केला आहे. ज्या कुस्तीपटूंवर गुन्हा दाखल करण्यात आला आहे त्यांच्यात विनेश फोगाट, साक्षी मलिक आणि बजरंग पुनिया या नामवंत कुस्तीपटूंचा समावेश आहे. दिल्ली पोलिसांनी रविवारी (28 मे) संसद भवनाच्या दिशेने निघालेल्या विरोधक कुस्तीपटूंना पोलिसांच्या ताब्यात घेतल्यानंतर काही तासांनी ही कारवाई केली.Wrestlers’ protest: FIR filed against Bajrang Punia, Sakshi and Vinesh under these sections including inciting riots

दिल्ली पोलिसांनी सांगितले की, कुस्तीपटू बजरंग पुनिया, साक्षी मलिक, विनेश फोगाट आणि इतर आयोजकांविरुद्ध गुन्हा दाखल करण्यात आला आहे. काही पहिलवान रात्री उशिरा जंतरमंतरवर आले होते; मात्र त्यांना परवानगी न मिळाल्याने परत पाठवण्यात आले.

कुस्तीपटूंचे दुसऱ्यांदा धरणे, विनेश फोगाटचे पोलिसांवर गंभीर आरोप, खाणेपिणे बंद करून खेळाडूंना त्रास दिला

नवा इतिहास लिहिला जातोय – विनेश

एफआयआरला उत्तर देताना विनेश फोगाट म्हणाली की, नवा इतिहास लिहिला जात आहे. फोगटने आपल्या ट्विटर पेजवर लिहिले आहे, “आमचे लैंगिक शोषण करणाऱ्या बृजभूषण विरोधात एफआयआर नोंदवायला दिल्ली पोलिसांना 7 दिवस लागले आणि शांततेने आंदोलन केल्यामुळे आमच्याविरोधात एफआयआर नोंदवायला 7 तासही लागले नाहीत. या देशात हुकूमशाही सुरू झाली आहे का? सरकार आपल्या खेळाडूंशी कसे वागते हे सारे जग पाहत आहे. नवा इतिहास लिहिला जात आहे.”

बजरंग पुनियाचा अटकेवर सवाल

रविवारी (२८ मे) आंदोलक कुस्तीपटूंनी संसद भवनासमोर महिला सन्मान महापंचायतीची घोषणा केली होती. पोलिसांनी ही परवानगी दिली नाही. असे असूनही कुस्तीपटूंनी संसदेच्या दिशेने ‘शांततापूर्ण मोर्चा’ काढला, त्यानंतर पोलिसांनी त्यांना ताब्यात घेतले. साक्षी मलिक आणि विनेश फोगाट यांना काही तासांनंतर सोडण्यात आले तर पुनियाला रात्री उशिरा सोडण्यात आले. पुनियाने आपल्या पोलीस कोठडीबाबत प्रश्नचिन्ह उपस्थित केले आहे.

पुनियाने ट्विटरवर लिहिले की, मी अजूनही पोलिसांच्या ताब्यात आहे. काहीही सांगत नाहीयेत. मी काही गुन्हा केला आहे का? बृजभूषण तुरुंगात असायला हवे होते. आम्हाला तुरुंगात का ठेवले आहे?

या कलमान्वये गुन्हा दाखल

ज्या कलमांतर्गत खेळाडूंवर गुन्हे दाखल करण्यात आले आहेत त्यामध्ये कलम 147 (दंगल), कलम 149 (बेकायदेशीर सभा), 186 (लोकसेवकाला कर्तव्यात अडथळा आणणे), 188 (लोकसेवकाने दिलेल्या आदेशाची अवज्ञा करणे), 332 , 353 सह, सार्वजनिक मालमत्तेचे नुकसान प्रतिबंधक कायद्याच्या कलम 3 अंतर्गतदेखील आरोप ठेवण्यात आले आहेत.

जंतरमंतर येथे आंदोलनाची सांगता

कुस्तीपटूंवर कारवाई करण्याबरोबरच पोलिसांनी जंतरमंतर येथील आंदोलनस्थळावरील सर्व सामान हटवले असून जागा स्वच्छ करण्यात आली आहे. याचा अर्थ आता खेळाडू परत धरणे देऊ शकणार नाहीत.