अदानी Vs हिंडेनबर्ग : अदानी समूहासाठी लढणार वॉचटेल लॉ फर्म, एलन मस्कविरोधात ट्विटरलाही केली होती मदत

By, Pravin Wankhade - February 11, 2023 07:45:13

0

विशेष प्रतिनिधी

भारतातील गर्भश्रीमंत उद्योगपती गौतम अदानी आणि अमेरिकन रिसर्च फर्म हिंडेनबर्ग ही दोन नावे गेल्या काही दिवसांपासून देशात आणि जगभरात चर्चेत आहेत. हिंडेनबर्ग या अमेरिकी शॉर्ट सेलर कंपनीच्या 24 जानेवारी 2023 रोजी प्रकाशित झालेल्या अहवालाने अदानी समूहाच्या साम्राज्याला दिलेल्या हादऱ्यांनी समूहाच्या मार्केट कॅपपैकी जवळपास निम्माच उरला आहे. Adani Vs Hindenburg Watchtel Law Firm To Fight For Adani Group, Helped Twitter Against Elon Musk

आतापर्यंतचा सर्वात मोठा तोटा सहन करणाऱ्या गौतम अदानी यांनी आता हिंडेनबर्गविरोधात कायदेशीर लढाई लढण्यासाठी अमेरिकन लॉ फर्म वॉचटेलला नियुक्त केले आहे. ही फर्म अमेरिकेत हायप्रोफाइल आणि वादग्रस्त केसेस लढण्यात माहिर आहे. अदानींच्या वतीने कायदेशीर लढा देणाऱ्या या कंपनीबद्दल जाणून घेऊया…

राजीव ते मोदी – बोफोर्स ते अदानी नेमका फरक काय??, बोफोर्सकडून चकार शब्द नव्हता, अदानी प्रकरणात प्रत्येक कंपनीचे ताबडतोब खुलासे

करण अदानी यांच्या सासऱ्यांनी साधला होता संपर्क

फायनान्शिअल टाइम्सच्या वृत्तानुसार, अदानी समूहातील उलथापालथ आणि हिंडेनबर्ग अहवालामुळे शेअर्समध्ये आलेली त्सुनामी यातून कंपनी अद्यापही सावरलेली नाही. गुंतवणूकदारांना धीर देण्यासाठी आणि समूहाच्या प्रतिष्ठेला झालेल्या नुकसानीचा बदला घेण्यासाठी गौतम अदानी यांनी आता मोठी तयारी केली आहे. वृत्तात या प्रकरणाची माहिती असलेल्या सूत्रांचा हवाला देऊन म्हटले आहे की, भारताच्या सिरिल अमरचंद मंगलदास फर्मने अदानी-हिंडेनबर्ग खटल्यासाठी अमेरिकन लॉ फर्म वॉचटेलशी संपर्क साधला होता. सिरिल श्रॉफ या भारतीय कंपनीचे नेतृत्व करतात आणि ते गौतम अदानी यांच्या जवळचे आहेत.

ट्विटर डीलमध्ये वॉचटेलची भूमिका

आता वाचटेल लॉ फर्मबद्दल… वादग्रस्त प्रकरणांमध्ये कायदेशीर लढाई लढण्यासाठी त्यांचे नाव जगभरात प्रसिद्ध आहे. गतवर्षी 2022 मध्येही ही फर्म खूप चर्चेत होती. टेस्लाचे सीईओ एलन मस्क यांनी 44 अब्ज डॉलरची ट्विटर डील तोडली तेव्हा मायक्रोब्लॉगिंग साइट ट्विटरने त्यांना कोर्टात खेचण्यासाठी याच वॉचटेलची नियुक्ती केली होती. डेलावेअर न्यायालयात, वॉचटेलने ट्विटरच्या वतीने लॉबिंग करून एलन मस्क यांना करार पूर्ण करण्यास भाग पाडले होते. वॉचटेल लॉ फर्म केवळ केस लढण्याच्या कौशल्यांसाठीच प्रसिद्ध नाही, तर ही सर्वात महागड्या लॉ फर्मपैकी एक आहे.

1965 पासून कार्यरत आहे वॉचटेल

वॉचटेल लिप्टनची स्थापना 1965 मध्ये वकिलांच्या एका लहान गटाने केली होती. सुरुवातीला ही फर्म आपल्या ग्राहकांना कायदेशीर लढाईत सल्ला देत असे. पण नंतर हळूहळू या फर्मचा विस्तार होत गेला आणि वकिलांची संख्याही वाढली. वकिलांच्या मोठ्या आणि तज्ज्ञ संघाद्वारे, कंपनीने विलीनीकरण आणि अधिग्रहण, कॉर्पोरेटशी संबंधित मोठ्या आणि वादग्रस्त प्रकरणे हाताळण्यास सुरुवात केली आणि त्यांचे निराकरण केले.

वॉचटेल हे अमेरिकेसह जगात मोठे नाव बनले आहे. ट्विटर-एलन मस्क यांच्या टेक क्षेत्रातील तिसऱ्या सर्वात मोठ्या डीलच्या वादानंतर, जगभरात चर्चेत आलेल्या गौतम अदानी-हिंडेनबर्गचा खटलाही ही फर्म निकाली काढणार आहे. यानिमित्ताने ही फर्म पुन्हा एकदा चर्चेत आली आहे.

अदानी यांनी फेटाळला होता हिंडेनबर्गचा अहवाल

हिंडेनबर्गचा अहवाल प्रसिद्ध झाल्यानंतर अदानी समूहाने आपली भूमिका मांडताना तो निराधार असल्याचे म्हटले होते. अदानींच्या वतीने संशोधन संस्थेने उपस्थित केलेल्या 88 प्रश्नांना 413 पानांचे उत्तर देण्यात आले. त्यांची बदनामी करण्यासाठी हा अहवाल आणण्यात आल्याचे अदानी ग्रुपच्या वतीने त्यांच्या उत्तरात सांगण्यात आले. अहवाल चुकीच्या समजुतीने प्रेरित आहे. आम्ही सर्व नियमांचे पालन करत कायदेशीर लढाईची तयारी करत आहोत, असा इशाराही ग्रुपने नुकताच दिला होता.