पंतप्रधान नरेंद्र मोदी यांना सायप्रसमध्ये सर्वोच्च नागरी पुरस्कार प्रदान!

By, Pravin Wankhade - June 16, 2025 07:00:57

0

पंतप्रधान मोदी रविवारी या भूमध्यसागरीय बेट देशात पोहोचले आहेत.

विशेष प्रतिनिधी

नवी दिल्ली – PM Modi भारताचे पंतप्रधान नरेंद्र मोदी यांना सायप्रसचा सर्वोच्च नागरी पुरस्कार प्रदान करण्यात आला आहे. २३ वर्षांत सायप्रसला भेट देणारे पहिले भारतीय पंतप्रधान नरेंद्र मोदी यांना सायप्रसचे अध्यक्ष निकोस क्रिस्टोडौलिडेस यांनी ग्रँड क्रॉस ऑफ द ऑर्डर ऑफ मकारिओस III प्रदान केले. पंतप्रधान मोदी रविवारी या भूमध्यसागरीय बेट देशात पोहोचले जिथे राष्ट्रपती निकोस यांनी त्यांचे विमानतळावर स्वागत केले.PM Modi

हा सन्मान स्वीकारल्यानंतर पंतप्रधान नरेंद्र मोदी म्हणाले, “राष्ट्रपती, ग्रँड क्रॉस ऑफ द ऑर्डर ऑफ मकारिओस III बद्दल मी तुमचे, सायप्रस सरकारचे आणि सायप्रसच्या लोकांचे मनापासून आभार मानतो. हा केवळ नरेंद्र मोदींचा नाही तर १४० कोटी भारतीयांचा सन्मान आहे. त्यांच्या क्षमता आणि आकांक्षांचा हा सन्मान आहे. हा आपल्या संस्कृतीचा, बंधुत्वाचा आणि वसुधैव कुटुंबकमच्या विचारसरणीचा सन्मान आहे. मी हा सन्मान भारत आणि सायप्रसमधील मैत्रीपूर्ण संबंधांना, आपल्या सामायिक मूल्यांना आणि परस्पर समंजसपणाला समर्पित करतो… सर्व भारतीयांच्या वतीने, मी हा सन्मान मोठ्या नम्रतेने आणि कृतज्ञतेने स्वीकारतो. हा पुरस्कार शांतता, सुरक्षा, सार्वभौमत्व, प्रादेशिक अखंडता आणि आपल्या लोकांप्रती असलेल्या आपल्या अटळ वचनबद्धतेचे प्रतीक आहे.”

Devendra Fadnavis : पैसा नाही तर माणूस हेच आज खरे भांडवल, मुख्यमंत्री देवेंद्र फडणवीस यांचे प्रतिपादन

तसेच “…मला विश्वास आहे की येणाऱ्या काळात आपली सक्रिय भागीदारी नवीन उंची गाठेल. एकत्रितपणे, आपण केवळ आपल्या दोन्ही देशांच्या प्रगतीलाच बळकटी देणार नाही, तर शांततापूर्ण आणि सुरक्षित जागतिक वातावरणाच्या निर्मितीमध्येही योगदान देवू” असंही पंतप्रधान मोदींनी सांगितलं.

याशिवाय, पंतप्रधान मोदी पुढे म्हणाले की, दोन दशकांहून अधिक काळानंतर, भारतीय पंतप्रधान सायप्रसला भेट देत आहेत. परस्पर संबंधांमध्ये एक नवीन अध्याय लिहिण्याची ही सुवर्णसंधी आहे. आज राष्ट्रपती आणि मी द्विपक्षीय संबंधांच्या सर्व पैलूंवर व्यापक चर्चा केली. सायप्रसच्या व्हिजन २०३५ आणि विकसित भारत २०४७ च्या अनेक पैलूंमध्ये समानता आहे, म्हणून आपण एकत्रितपणे भविष्य घडवूयात. आपल्या भागीदारीला धोरणात्मक दिशा देण्यासाठी, आपण पुढील पाच वर्षांसाठी एक ठोस रोडमॅप बनवू. संरक्षण आणि सुरक्षा सहकार्य मजबूत करण्यासाठी, द्विपक्षीय संरक्षण सहकार्य कार्यक्रमांतर्गत संरक्षण उद्योगावर भर दिला जाईल. सायबर आणि सागरी सुरक्षेवर स्वतंत्र संवाद सुरू केला जाईल. असंही मोदींनी यावेळी सांगितलं.