विशेष प्रतिनिधी
मुंबई : Uddhav Thackeray केंद्रातील नरेंद्र मोदी सरकारने संसद भवनात वंदे मातरम म्हणण्यावर बंदी घातल्याचा दावा शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे यांनी केला. सरकारने संसदेत वंदे मातरम म्हणण्यास मनाई करणारी अधिसूचना जारी केली आहे. ही काय गोष्ट आहे? यामागे कुणाचे डोके आहे? माझे खासदार संसदेत जाऊन वंदे मातरम म्हणतील. भाजपमध्ये हिंमत असेल तर त्यांनी त्यांना बाहेर काढून दाखवावे, असे ते म्हणाले. भाजपचे हिंदुत्त्व ढोंगी आहे. भाजपचे मुंह में राम बगल में अदानी, असल्याचा टोलाही उद्धव ठाकरे यांनी लगावला. अदानी हा शब्द कॉन्ट्रॅक्टरचा प्रतीक झालाय, अशी पुस्तीही त्यांनी जोडली. कुंभमेळ्याचे कारण सांगून नाशिकमध्ये वृक्षतोडीचा घाट घातला जातोय. ही जागा कॉन्ट्रॅक्टरच्या घशात घातली जातेय, असा आरोपही त्यांनी केला.Uddhav Thackeray
उद्धव ठाकरे यांनी शुक्रवारी पत्रकारांशी संवाद साधला. त्यात ते म्हणाले, राज्यात सध्या निवडणुकांचे वातावरण आहे. मुख्यमंत्री व दोन्ही उपमुख्यमंत्र्यांसह त्यांचे सर्वच सरकार प्रचारासाठी फिरत आहेत. गावोगावी किंवा जिथे कुठे निवडणूक आहे, तिथे जाऊन मते मागत आहेत. या निवडणुकीत केवळ पैशांचा धूर निघताना दिसत आहे. पैशांचे वाटप किंवा पैशाचा पाऊस किंवा अतिवृष्टी ही महाराष्ट्रात भयानक पद्धतीने सुरू आहे. एकप्रकारचा सत्तेचा माज व सत्तेचा दर्प या सर्व राजकर्त्यांच्या वक्तव्यातून व त्यांच्या वागणुकीतून महाराष्ट्र पाहत आहे.Uddhav Thackeray
मी 8-10 दिवसांपूर्वी मराठवाड्यातील शेतकऱ्यांमध्ये जाऊन बसलो होतो. त्यांच्या वेदना, व्यथा समजून प्रयत्न केला. त्यांना धीर दिला. त्यानुसार एकही मंत्री शेतकऱ्यांमध्ये जाऊन बसत नाही. नागरिकांशी बोलत नाही. फक्त जिथे जातात तिथे पैशांच्या थैल्या उधळून मते मागितली जात आहेत. हे चित्र फार भयानक आहे.
मुंबईवर भ्रष्टाचाराच्या प्रदूषणाचे ढग
उद्धव ठाकरे म्हणाले, मुंबईत मागील 2-3 वर्षांत प्रदुषणाची पातळी मोठ्या प्रमाणात वाढली आहे. यंदाही त्याचा अनुभव येत आहे. मुंबईची हवा ही आरोग्यासाठी घातक होत चालली आहे. राज्यकर्ते कदाचित इथियोपियातील ज्वालामुखीचे ढग इकडे आल्याचे कारण देत वेळ मारून नेतील. पण याचा इथियोपियाशी काडीचाही संबंध नाही. हा इथल्या भ्रष्टाचाराच्या ज्वालामुखीचा उद्रेक आहे. त्यातून हे भ्रष्टाचाराच्या प्रदुषणाचे ढग मुंबईवर घोंगावत आहे.
मी मुख्यमंत्री झाल्यानंतर आरेमधील कारशेडला स्थगिती दिली होती. याचा अर्थ मी मेट्रोला विरोध केला नव्हता. पण मेट्रोच्या ऐवजी कांजूर मार्गची जागा सूचवली होती. ही जागा आता या सरकारने घेतली आहे. त्यांनी आरेची झाडे तर यापूर्वीच तोडली आहेत. आता हे जे काही प्रदुषण आहे ते आरेची झाडे तोडल्यामुळे वाढले आहे. नियोजनशून्य विकासामुळे व कंत्राटदारांच्या विकासाच्या आट्यापिट्यामुळे त्याचेच हे प्रदुषण आहे. आत्ता सरकारने संजय गांधी उद्यानाच्या डेव्हलमेंट प्लॅन करत आहे. हे शहरात असणारे जगातील एकमेव जंगल आहे. तिथे केवळ झाडेच नाही तर बिबट्यापासून अनेक प्राणी तिथे राहत आहेत. पण हे सरकार हे राष्ट्रीय उद्यानही बोडखे करण्याचा कट आखत आहे, असे ते म्हणाले.
नाशिकच्या तपोवनातील वृक्षतोडीला विरोध
उद्धव ठाकरे पुढे म्हणाले, सरकार नाशिकमध्येही असाच एक घातक प्रयत्न करत आहे. नाशिकमध्ये पुढच्या वर्षी कुंभमेळा होत आहे. या निमित्ताने तिथे हजारो साधू संत व भाविक येणार आहेत. त्यांची गैरसोय होणार नाही हे पाहण्याचे काम सरकारचे असते. दुर्दैवाने प्रयागराजमध्ये गतवर्षी झालेल्या चेंगराचेंगरीत किती जण मृत्युमुखी पडले किंवा जखमी झाले त्याचा नेमका आकडा अजून आला नाही. यात पारदर्शकता पाहिजे. नाशिकचा पालकमंत्री अजून का नेमला नाही हे कळत नाही. या कोड्याचे उत्तर कुंभमेळ्याच्या खर्चात लपले आहे का हे शोधावे लागेल.
पण या कुंभमेळ्याच्या निमित्ताने साधूग्राम तायर करण्यासाठी हजारो झाडे तोडली जात आहेत. संपूर्ण तपोवन नष्ट केले जात आहे. या तपोवनात प्रभू श्रीराम, माता सीता व लक्ष्मण वास्तव्यास होते अशी मान्यता आहे. श्रीरामाच्या पदस्पर्शाने देशातील ज्या काही मोजक्या जागा पावन झाल्यात त्यात या तपोवनाचा समावेश होतो. खरे म्हटले तर आत्तापर्यंत तिथे श्रद्धेचे एखादे ठिकाण तयार करण्याची गरज होती. तिथे जवळपास 60 प्रकारची वेगवेगळ्या प्रकारची झाडे आहेत. यात औषधी वनस्पतींचाही समावेश आहे. या तपोवनाने आपल्याहून अधिक कुंभमेळे पाहिले असतील. अनुभवले असतील. पण आता साधूग्राम या तपोवनात केले जाणार आहे. यानिमित्ताने वृक्षतोड केली जाणार आहे. आमचा त्याला विरोध आहे, असे उद्धव ठाकरे म्हणाले.
हिंदुत्त्वाच्या नावाखाली भ्रष्टाचार सुरू
उद्धव ठाकरे म्हणाले, नाशिकमध्ये यापूर्वीही कुंभमेळा झाला. त्यावेळी ज्या ठिकाणी साधूग्राम उभारण्यात आले होते, तिथेच यंदाही साधूग्राम तयार केले जावे. सरकार तसे का करत नाही हे कळत नाही. मंत्री गिरीश महाजन यांनी तपोवनातील 1 झाड तोडले तर 10 झाडे लावण्याचे विधान केले आहे. त्यांनी एवढी झाडे लावण्यासाठी जिथे जागा असेल, तिथेच साधूग्राम तयार करावे. म्हणजे आहे ते मारून टाकायचे आणि मारून टाकल्यानंतर पुन्हा तिकडे नव्याने झाडून लावण्याची थाप मारायची हा हिंदुत्त्वाच्या नावाखाली सुरू असणारा भ्रष्टाचार आहे.
सरकार साधूग्रामसाठी कुंभमेळ्याचे कारण देत आहे. पण माझ्या हातात एका टेंडरची कॉपी आली आहे. त्यात स्पष्टपणे सांगण्यात आले आहे की, साधूग्रामच्या जागेवर भविष्यात कॉन्फरन्स हॉल, कनव्हेंशन हॉल आदी गोष्टी केल्या जाणार आहेत. या गोष्टींवर कुणी आक्षेप घेऊ नये म्हणून कुंभमेळ्याचे कारण दिले जात आहे. याचा अर्थ असा की, भाजपचे हिंदुत्त्व थोतांड आहे. कालपरवाच पंतप्रधान नरेंद्र मोदी यांनी अयोध्येत राम मंदिरावर रामध्वजा फडकावली. ते तिकडे जाऊन राम राम करतात आणि इकडे नाशिकमध्ये मुंह मे राम व बगल मे अदानी असे करतात, असे ते म्हणाले.
संसदेत वंदे मातरम म्हणण्यावर बंदी
उद्धव ठाकरे यांनी यावेळी सरकारने संसदेत वंदे मातरम म्हणण्यावर बंदी घालणारी अधिसूचना जारी केल्याचाही दावा केला. ते या प्रकरणी पीएम मोदी व भाजपवर निशाणा साधत म्हणाले, संसदेत वंदे मातरम म्हणू शकत नाही. ही काय गोष्ट आहे? यामागे कुणाचे डोके आहे? कधीकाळी भाजपचेच लोक ओरडून सांगत होते की, या देशात राहायचे असेल तर वंदे मातरम म्हणावे लागेल. माझे खासदार तिथे जाऊन वंदे मातरम म्हणतील. भाजपमध्ये हिंमत असेल तर त्यांनी माझ्या खासदारांना बाहेर काढून दाखवावे. हिंमत नसेल तर ही गोष्ट कुणी केली त्याला समोर आणावे. त्याला पाकिस्तानात पाठवा. हा भाजपचा दुटप्पीपणा आहे. ढोंगीपणा आहे. ते हिंदूही नाहीत आणि देशप्रेमीही नाहीत.
शिंदे किती दूर जाऊन पडतील माहिती नाही
उद्धव ठाकरे यांनी भाजप प्रदेशाध्यक्ष रवींद्र चव्हाण यांच्या आपल्याला युती 2 डिसेंबरपर्यंत टिकवायची आहे या विधानाचाही समाचार घेतला. तसेच एकनाथ शिंदे यांचा भाजपसाठी वापर संपल्यासाचाही दावा केला. रवींद्र चव्हाण यांच्या महायुतीवरील विधानाचा अर्थ वापरा आणि फेकून द्या असा आहे. आता भाजप त्यांना (शिंदे) फेकून देईल. त्यानंतर ते किती दूर जाऊन पडतील हे माहिती नाही.
महत्वाच्या बातम्या
To be published, comments must be reviewed by the administrator.*
Our website uses cookies to improve your experience. Learn more
Download App