NCP – MIM Alliance : राष्ट्रवादीला आघाडीसाठी फक्त ISIS चा प्रस्ताव येणे बाकी!!; नितेश राणेंचा टोला

By, Pravin Wankhade - March 19, 2022 08:45:33

0

प्रतिनिधी

मुंबई : एमआयएमचे खासदार इम्तियाज जलील यांनी राष्ट्रवादी काँग्रेसला आघाडीची ऑफर दिल्यानंतर महाराष्ट्रात राजकीय वादळ उठले आहे. शिवसेनेचे प्रवक्ते खासदार संजय राऊत यांनी अशा प्रकारची आघाडी झटकली आहे, तर भाजपच्या नेत्यांनी या आघाडीच्या मुद्द्यावर राष्ट्रवादीला जोरदार टोले हाणले आहेत. NCP – MIM Alliance The only thing left for the NCP to do is to propose ISIS

आपल्या नेहमीच्या आक्रमक शैलीत शिवसेनेवर टीका करणा-या भाजप आमदार नितेश राणे यांनी शिवसेनेवर बोचरी टीका केली आहे. कट्टरपंथीयांना सुद्धा शिवसेना आपलीशी वाटायला लागली आहे. आता फक्त ISIS चा प्रस्ताव येणे बाकी आहे, असे ट्विट करत नितेश राणे यांनी शिवसेनेवर टीका केली आहे.

– सुप्रिया सुळेंकडून स्वागत

समविचारी पक्ष एकत्र येत असेल तर आनंदच आहे. महाराष्ट्राच्या हितासाठी आणि विकासासाठी समविचारी पक्षांनी एकत्र यावे अशी प्रतिक्रिया खासदार सुप्रिया सुळे यांनी व्यक्त केली आहे.

वाह.. AIMIM ची महाविकास आघाडी मध्ये येण्याची तयारी..
कट्टरपंथीना पण शिवसेना आपलीशी वाटायला लागली आहे..
आता फक्त ISIS चा प्रस्ताव येणे बाकी आहे..
खरंच, करून दाखवलं!!

— nitesh rane ( Modi ka Parivar ) (@NiteshNRane) March 19, 2022

ISIS आंतरराष्ट्रीय दहशतवादी संघटना

ISIS ही आंतरराष्ट्रीय इस्लामी कट्टरपंथी दहशतवादी संघटना आहे. सीरिया आणि अन्य आफ्रिकन देशांमध्ये या संघटनेने प्रचंड दहशतवाद माजवून मोठा हिंसाचार केला आहे. नितेश राणे यांनी ISIS या संघटनेचे नाव घेत राष्ट्रवादी काँग्रेसवर टीकास्त्र सोडले आहे.

– फडणवीसांचेही टीकास्त्र

राष्ट्रवादी काँग्रेस सध्या शिवसेनेसोबत राज्याच्या सत्तेत असल्यामुळे, यावरुन आता भाजपने शिवसेनेला टार्गेट केले आहे. विरोधी पक्षनेते देवेंद्र फडणवीस यांनी देखील शिवसेनेवर टीकेची झोड उठवली आहे. शिवसेना आता सत्तेसाठी काय करते, तेच आम्हाला पहायचे आहे. तसंही शिवसेनेने आता “हिंदुहृदयसम्राट” बाळासाहेब ठाकरे ऐवजी “जनाब” बाळासाहेब ठाकरे स्वीकारले आहे. त्यांच्याकडून अजानच्या स्पर्धांचं आयोजन करण्यात येत आहे, त्यामुळे एमआयएमने दिलेल्या ऑफरचा आता काय परिणाम होतो ते बघू या, असे म्हणत फडणवीस यांनी शिवसेनेला टोला लगावला आहे.