वृत्तसंस्था
कोची : Malappuram केरळमधील मलप्पुरम येथे जप्त करण्यात आलेल्या मोठ्या बेकायदेशीर स्फोटकसाठा प्रकरणात राष्ट्रीय तपास संस्थेने (एनआयए) मोठी कारवाई करत केरळ, कर्नाटक आणि तामिळनाडू या तीन राज्यांतील १९ ठिकाणी एकाचवेळी छापे टाकले. या कारवाईत स्फोटकांच्या पुरवठा साखळी, वाहतूक नेटवर्क आणि संबंधित व्यक्तींबाबत महत्त्वाचे पुरावे मिळाल्याची माहिती समोर आली आहे.Malappuram
एनआयएच्या तपासानुसार, हे प्रकरण फेब्रुवारी २०२६ मध्ये मलप्पुरम जिल्ह्यात जप्त करण्यात आलेल्या प्रचंड स्फोटकसाठ्याशी संबंधित आहे. केरळ पोलिसांनी एका ट्रकमधून ८९,६०० जिलेटिन कांड्या आणि १०,५०० डेटोनेटर जप्त केले होते. हा साठा कांद्याच्या पोत्यांखाली लपवण्यात आला होता. या प्रकरणात आतापर्यंत सहा जणांना अटक करण्यात आली आहे.Malappuram
पाच जिल्ह्यांमध्ये धाडसत्र
शनिवारी झालेल्या कारवाईत मलप्पुरम, कोझिकोड, पालक्काड, कन्नूर आणि कासारगोड या केरळमधील जिल्ह्यांसह कर्नाटक आणि तामिळनाडूतील काही ठिकाणांवर छापे टाकण्यात आले. ट्रक मालक, त्याचे सहकारी, स्फोटकांचा कथित वापर करणाऱ्या व्यावसायिकांशी संबंधित ठिकाणे आणि संशयितांच्या घरांची झडती घेण्यात आली.
राष्ट्रीय सुरक्षेची चिंता
एनआयएने या प्रकरणात राष्ट्रीय सुरक्षेच्या दृष्टीने गंभीर बाबी आढळल्याचे म्हटले आहे. इतक्या मोठ्या प्रमाणात स्फोटके कोणत्या उद्देशाने जमा करण्यात आली, त्यांचा अंतिम वापर कुठे होणार होता आणि त्यामागे मोठे नेटवर्क आहे का, याचा तपास सुरू आहे. स्फोटकांची खरेदी आणि साठवणूक करण्यासाठी आवश्यक परवानग्या नसल्याचेही तपासात समोर आले आहे.
खाण प्रकल्पासाठी असल्याचा दावा
प्राथमिक तपासात काही आरोपींनी ही स्फोटके खाण प्रकल्पासाठी आणल्याचा दावा केला होता. मात्र संबंधितांकडे वैध खाण परवाना नसल्याचे उघड झाल्यानंतर संशय अधिक बळावला. त्यानंतर प्रकरणाचा तपास राज्य पोलिसांकडून एनआयएकडे सोपवण्यात आला.
आणखी अटक होण्याची शक्यता
ताज्या छाप्यांमधून मिळालेल्या कागदपत्रे, डिजिटल उपकरणे आणि इतर पुराव्यांच्या आधारे एनआयए आता स्फोटक पुरवठादार आणि आर्थिक व्यवहारांची चौकशी करत आहे. या प्रकरणात आणखी काही जणांना अटक होण्याची शक्यता तपास यंत्रणांनी व्यक्त केली आहे.
देशाच्या सुरक्षेशी संबंधित संभाव्य धोका लक्षात घेता एनआयएने तपासाची व्याप्ती वाढवली असून दक्षिण भारतातील स्फोटकांच्या बेकायदेशीर व्यापारावरही विशेष लक्ष केंद्रित केले आहे.
Malappuram Explosives Case: NIA Raids 19 Locations Across Kerala, Karnataka, and Tamil Nadu
महत्वाच्या बातम्या
- राज्यभरात भेसळखोरांवर अभूतपूर्व कारवाई; ३ दिवसांत ५३ धाडी, ३४ ठिकाणी कारवाई, तर ३३ जणांना बेड्या!!
- शिक्षा संस्कृति उत्थान न्यासाची राष्ट्रीय प्रांत संयोजक बैठक पुण्यात सुरू; राष्ट्रीय शैक्षणिक धोरण, भारतीय ज्ञानपरंपरेवर मंथन
- Florida Test : जेफ बेझोस यांच्या ‘ब्लू ओरिजिन’ला मोठा धक्का; फ्लोरिडात चाचणीदरम्यान ‘न्यू ग्लेन’ रॉकेटचा भीषण स्फोट
- NIA : पाकिस्तानशी जोडलेल्या दहशतवादी जाळ्यावर NIAची मोठी कारवाई; राजस्थानसह ४ राज्यांत धाडसत्र