विशेष प्रतिनिधी
पुणे : देहविक्री करणा-या महिलांच्या खात्यामध्ये ७ कोटी रुपयांचे अर्थसहाय्य जमा केले आहे, अशी माहिती जिल्हा महिला व बालविकास अधिकारी श्रीमती अश्विनी कांबळे यांनी दिली. prostitutes in Pune 7 crore financial assistance deposited in the account
कोरोनाच्या पार्श्वभूमीवर अनैतिक व्यापार प्रतिबंध अधिनियमांतर्गत सुटका केलेल्या पिडीतांना तसेच वेश्या व्यवसाय करुन कुटुंबाचा उदरनिर्वाह करणा-या महिलांना ही मदत दिली. पुणे जिल्हयातील बँक खाते असलेल्या 5 हजार 296 महिलांच्या बँक खात्यामध्ये ७ कोटी ९४ लाख ४० हजार रुपये दोन टप्प्यात भरले आहेत.
वेश्या व्यवसायावर अवलंबून असणा-या महिलांना कोरडे अन्नधान्य व रोख आर्थिक सहाय्य या सारख्या मुलभूत सेवा ओळखपत्राची विचारणा न करता पुरविण्याचे आदेश सर्वोच्च न्यायालयाने २१ सप्टेंबर २०२० रोजी दिले होते.
त्यानुसार जिल्हाधिकारी राजेश देशमुख यांच्या अध्यक्षतेखाली समिती नेमली होती. या समितीमध्ये सदस्य सचिव म्हणून जिल्हा महिला व बाल विकास अधिकारी श्रीमती अश्विनी कांबळे यांचा समावेश आहे.
निधीचे वाटप असे झाले
- पिडीता तसेच वेश्या व्यवसाय करुन कुटुंबाचा उदरनिर्वाह करणा-या महिलांना प्रतीमहा पाच हजार
- मुले शाळेत जातात अशा महिलांना अतिरिक्त
२ हजार ५०० रुपये आर्थिक सहाय्य - पुणे जिल्हयासाठी ११ कोटी २६ लाख ६५ हजार रुपयांचा निधी मुख्यमंत्री सहाय्यता निधीमधून जिल्हाधिकारी, पुणे यांच्या खात्यामध्ये ऑक्टोंबर ते डिसेंबर २०२० साठी आला होता.
- पहिल्या टप्प्यात फेब्रुवारीमध्ये जिल्हा एडस प्रतिबंध व नियंत्रण विभाग, पुणे यांचेकडून ७ हजार ११ पैकी १ हजार ७६५ वेश्या व्यवसाय करणा-या महिलांच्या बँक खात्याचा तपशिलाप्रमाणे प्रती महिना ५ हजार प्रमाणे ऑक्टोंबर ते डिसेंबर २०२० या तीन महिन्याचे रुपये १५ हजार प्रमाणे २ कोटी ६४ लाख ७५ हजार वितरीत केले आहेत.
- दुस-या टप्प्यात ३ हजार ५३१ वेश्या व्यवसाय करणा-या महिलांच्या बँक खात्यात प्रती महिना ५ हजार प्रमाणे ऑक्टोंबर ते डिसेंबर २०२० या तीन महिन्याचे रुपये १५ हजार प्रमाणे ५ कोटी २९ लाख ६५ हजार अर्थसहाय्य वितरीत केले.