उत्तर प्रदेशचे मुख्यमंत्री योगी आदित्यनाथ यांना बॉंबने उडवून देण्याची धमकी देणाऱ्या कामरान खानने धक्कादायक माहिती दिली आहे. योगींना मारण्यासाठी आपल्याला एक कोटी रुपयांची ऑफर देण्यात आल्याचे त्याने पोलीसांना सांगितले आहे.
वृत्तसंस्था
लखनऊ : उत्तर प्रदेशचे मुख्यमंत्री योगी आदित्यनाथ यांना बॉंबने उडवून देण्याची धमकी देणाऱ्या कामरान खानने धक्कादायक माहिती दिली आहे. योगींना मारण्यासाठी आपल्याला एक कोटी रुपयांची ऑफर देण्यात आल्याचे त्याने पोलीसांना सांगितले आहे.उत्तर प्रदेश मधील लखनऊ येथे
पोलिसांच्या वतीने नागरिकांच्या मदतीसाठी सोशल मीडिया डेस्क सुरू करण्यात आला होता. या डेस्कसाठी असलेल्या मोबाइल क्रमांकावर मुख्यमंत्री योगी आदित्यनाथ यांना बॉंम्बने उडवून देण्याचा एक निनावी संदेश आला होता.
या संदेशामुळे उत्तर प्रदेशमधील पोलिस यंत्रणा दक्ष होत तपास करत होती. याबाबत लखनऊ येथील गोमतीनगर पोलिस ठाण्यात गुन्हाही दाखल करण्यात आला. हा फोन महाराष्ट्रातून आल्याचे कळताच याबाबतची माहीती उत्तर प्रदेश पोलिसांनी एटीएसला दिली आणि तपासाची चक्रे फिरली. तांत्रिक पुराव्यांच्या आधारे महाराष्ट्र एटीएसच्या पथकाने कामरान खान या तरुणाला चुनाभट्टी येथील म्हाडा कॉलनीतून शोधून काढले.
कामरान सध्या उत्तर प्रदेश पोलिसांच्या एसटीएफच्या ताब्यात असून त्याची चौकशी सुरू आहे. चौकशी दरम्यान कामराननं योगी आदित्यनाथ यांना धमकी देण्यासाठी आपल्याला एक कोटींची ऑफर देण्यात आली होती, असे कामरानने सांगितले. परंतु, पैशांची ही ऑफर कामरानला कुणी दिली होती हे अद्याप त्याने सांगितलेले नाही.
कामरान हा मुंबईचा रहिवासी आहे. काही वर्ष झवेरी बाजारात तो सिक्युरिटी गार्ड म्हणून नोकरीला होता. २०१७ साली त्याच्यावर स्पाईन टीबीची शस्त्रक्रिया पार पडल्यानंतर त्याला नोकरी सोडावी लागली. सध्या तो बेरोजगार आहे. कामरानच्या कुटुंबात आई, बहिण आणि एक भाऊ आहे.
उल्लेखनीय म्हणजे, कामरानच्या अटकेनंतर पुन्हा एकदा पोलिसांनी धमकीचा कॉल आला. महाराष्ट्र एटीएसच्या म्हणण्यानुसार, हा धमकीचा फोन लखनऊ पोलिसांच्या स्पेशल मीडिया डेस्कला आला होता. ‘अटक करण्यात आलेल्या व्यक्तीला सोडावं अन्यथा वाईट परिणाम भोगावे लागतील’ अशी धमकी फोनवरून देण्यात आली. या धमकीच्या फोननंतर महाराष्ट्र एटीएसला पुन्हा एकदा सूचना देण्यात आली. एटीएसच्या नाशिक युनिटनं २० वर्षांच्या एका तरुणाला या धमकीच्या कॉलसाठी नाशिकच्या भद्रकाली भागातून अटक केलीय.